Read Siyin Chin Thiampite 7 Bible Online

Thiampite 7 - Siyin Chin bible

Thiampite 7

¹A nuai a te sia khialphel biakpiaknate atu zui tu ngeinate hi a, thiangtho mama hi.

²Meihal biakpiak natu in nganhing kingawna mun, biaknatau saksang ah hi biakpiakna ngan kingo tu a, biaknatau pangh li tengah a chi kithe tu hi.

³A thau theampo la in biaknatau tungah kipia tu a, tuate a meithau, a sungthau,

⁴a nauta le a tuam thau teng, le a thinsa phabel teng hi tu hi.

⁵TOPA tungah an taw biakpiakna bangin thiampipa in a thau theampo biaknatau tungah hal tu hi. Tua in khialphel biakpiakna khat ahi hi.

⁶Thiampi innkuanpui, pa peuma in tua sa ne thei tu a, ahizong tua sa thiangtho mama ahikom mun thiangthona ah kine tu hi.

⁷Mawphel biakpiakna le khialphel biakpiakna ah a kibangin zak tu ngeina khat om a, tua in a sa sia sangaw biakpiakna a pia thiampipa ii neisa hi, cina ahi hi.

⁸Meihal biakpiakna in a kipia nganhing vun sia biakpiakna a pia thiampipa ii neisa ahi hi.

⁹Thik bealpeu sungah a ki em, ahibuale beal baannei le moh emna sungah a kivawt antang biakpiakna peuma, Pathian tungah a pia thiampipa ii neisa hi.

¹⁰Ahizong a kihuan ngawl antang a kipia theampo, sathau taw a kihel ahizong a kihel ngawl ahizong, Aaron suan thiampite neisa hi a, a kikim in a hawm tek tu ahi hi.

¹¹A nuai a te TOPA tungah a kipia kipawlkhop biakpiakna ah zui tu ngeinate ahi hi.

¹²Mihing khat in Pathian tungah lungdamko biakpiakna in hi biakpiakna a vawt le biakpiakna ah a zak tu nganhing taw in, tol saw ngawl anluum piakhawm tu hi, tuate anvui le olive thau a kihel a saa anluumte ahibuale olive thau taw a kizut muhte, ahibuale olive thau taw kihel muhte ahi hi.

¹³Tua dom ngawlin tol kisaw anluumte zongh pia tu hi.

¹⁴Ama in anluum nam simin khen khat tek a tuam vilvel in TOPA tungah pia tu a; tuate nganhing chi la a, biaknatau tungah a the thiampipa ii neisa ahi hi.

¹⁵Biakpiakna nganhing sa sia biakpiakna vawt ni in kine tu a; a zingsang ciang dong koi ngawl tu hi.

¹⁶Mihing khat in kamciam taangtut natu ahizong ama thinzaw biakpiakna taw ahizong a piak pawlkhop biakpiakna hong paipui le biakpiak ni in ne siat ngawl tu a, a taanglai pawpo a zing ciang ne thei tu hi.

¹⁷A ni thum ni in sa taanglai pawpo kihal tu hi.

¹⁸A ni thum ni in a taanglai sa a kine le tua pa biakpiakna Pathian in saang ngawl tu hi. Tua biakpiakna sia ama atu in phattuamna om ngawl tu a, a thiangtho ngawlin kingaisun in, tua sa a ne pawpo in a piang babang thuak tu hi.

¹⁹Tua biakpiakna sa sia biakna taw kisai a thiang ngawl khat pawpo taw a kithutha le kine ngawlin a kihal kul tu hi. Biakna zeksa taw kisai in a thiang khat pawpo in tua sa ne thei tu hi,

²⁰ahizong a thiang ngawl khat pawpo in tua sa a ne le Pathian mi in kingaisun nawn ngawl tu hi.

²¹Mihing khat pawpo in mihing ahibuale nganhing tung pan biakna taw kisai in a thiang ngawl khat pawpo a tham zawkciang hi biakpiakna sa a ne le, ama sia Pathian mi in kingaisun nawn ngawl tu hi.

²²TOPA in Moses tungah,

²³a nuai a, zui tu ngeina teng Israel mite atu in pia hi. Khuithau, tuuthau le kealthau kine ngawl tu hi.

²⁴Ama thu in a thi thawthong nganhing ahibuale ngamsa ii a mat nganhing sia ii thaute kine ngawl tu a, ahizong na dangin kizangh thei tu hi.

²⁵Mihing khat pawpo in TOPA tungah an taw biakpiakna in a kizangh thei nganhing thau a ne le, ama sia Pathian mi in kingaisun nawn ngawl tu hi.

²⁶Koisung po ah a teang zong Israel te in vacim chi le nganhing chi ne ngawl tu hi.

²⁷Hi thukham a paltan pawpo Pathian ii mi khat in kingaisun nawn ngawl tu hi.

²⁸TOPA in Moses tungah

²⁹a nuai a, zui tu ngeina teng Israel mite atu in pia hi. A kuama po in kipawlkhop biakpiakna a piak ciang tua ii sung pan pawlkhat sia TOPA tungah a tuam vilvel letsong in puak hamtang tu a,

³⁰tua letsong sia an taw biakpiakna bangin ama khut vateak taw paipui tu hi. Ama in nganhing thau sia a awmsa taw paipui tu a, TOPA tungah a tuam vilvel letsong in pia tu hi.

³¹Thiampipa in a thaute biaknatau ah hal tu a, ahizong a awmsa sia thiampite in tang tu hi.

³²A ziatsang phei bup sia a tuam vilvel letsong in,

³³a chi le a thau taw in kipawlkhop biakpiakna a pia thiampipa tungah pia tu hi.

³⁴A awmsa sia a tuam vilvel letsong hi a, a ziatsang phei sia Israel mite tung pan TOPA ii a laak, thiampite tungah a piak a tuam vilvel letsong ahi hi. Hisia maisang hun theampo ah Israel mite ii thiampite tungah a piak tu ahi hi.

³⁵Hisia in Aaron le a tapate thiampi in a kikipsak ni a, TOPA tungah a kipia an sung pan amate a kipia an khen khat ahi hi.

³⁶Tua ni in hi biakpiakna sung pan khen khat thiampite tungah piak tu in Israel mite tungah TOPA in thupia hi. Hi sia in Israel mite ii mai sang hun theampo ah a zui tu ngeina khat ahi hi.

³⁷Tua ahiciang, hite in meihal biakpiakna, antang biakpiakna, mawphel biakpiakna, khialphel biakpiakna, kipsakna biakpiaknate, le pawlkhop biakpiakna atu in ngeinate ahi hi.

³⁸Hite sia sennealngam Sinai Mual ah, Israel mite ii zui tu biakpiaknate a vawt natu a son ni in TOPA ii Moses tungah a thupiakte ahi hi.