Read Siyin Chin Jeremiah 10 Bible Online

Jeremiah 10 - Siyin Chin bible

Jeremiah 10

¹Israel mite awng, note atu in TOPA’ thupuak sia ngai vun.

²Ama in, “Minam dangte omzia zui heak vun; minam dangte in van ah a lamdang a kimute kiita in lau hikale note in na thin nawngkaisak heak vun.

³Hi mite ii biakna sia mannung ngawl hi. Duisung ah thingkung khat kiphuk a; tua sia thingngel thiampa in a hiamh zakte taw sui in

⁴ngunn le khamh taw zeam hi. A puk ngawl natu in thikpim taw kilh hi.

⁵Tua milimte sia tangmai lo sungah lohunnate taw kibang hi; tua milimte pau thei ngawl a; lampai thei ngawl ahikom puak kul hi. Tuate kiita heak vun: Na siat natu uh bangma vawt thei ngawl a, na phat natu bangma vawt thei ngawl hi,” ci hi.

⁶TOPA awng, nang taw a kibang kuama om ngawl hi; nang na thahat a, na min lian in vaang nei hi.

⁷Minam theampo ii kumpipa ahi nang sia, akua in zakta ngawlin a om tu ziam? Nang sia zatakna piak tu in na kilawm hi. Minamte ii mipilte theampo sung pan hikale amate ii kumpite sung pan hikale nang taw a kibang kuama om ngawl hi.

⁸Amate theampo ngoai in mawmaw uh hi. Thing taw kivawt milimte kung pan amate in bang sin thei tu ziam?

⁹A milimte sia Spain ngam pan a piang ngunn taw, Uphaz ngam pan a piang khamh taw kituam a, limsuai thiamte ii vawt veu hi siat hi; tuate sia thiamtak thiamte ii a taa puan sandupciik le puan sandupte kisilhsak hi.

¹⁰Ahihang TOPA, nangma in Pathian tatak na hi a, a nungta Pathian le tawntung kumpipa na hi hi. Na thin uuk ciangin leitung liing a; minamte in na thin uukna thuak zo ngawl uh hi.

¹¹(Lei le van a vawt ngawl pathiante sia kisiacipsak tu hi ci in no mihingte in amate son tu nu hi. Amate sia leitung koima ma ah om nawn ngawl tu hi.)

¹²TOPA in a vaangletna taw leitung vawt a; a ciimna taw leitung bitphua in vantungte zalh hi.

¹³Ama ii thupiakna taw in van ii tungsia ah a om tuite hawk hi; ama in leimong panin meeite hong paipui hi. Ama in nguatui sungah khualeng sakin a vanh kholna sung panin vuivasak hi.

¹⁴Hi thu a mu uh ciang, mihingte mawmaw kisa in lung amh uh hi; tua milim a vawtte in a maan sia mu uh hi; banghang ziam cile amate vawt pathiante maan ngawl a, nuntakna nei ngawl uh hi.

¹⁵Tuate sia mannung ngawlin kinomu tu hi; Amate thukhenin TOPA hong pai ciang amate kisusia tu hi.

¹⁶Jacob ii Pathian sia amate bang hi ngawl hi; ama in na theampo a vawt pa hi a, ama mi tatak tu in Israel mite teal zo hi. Ama min sia Vaanglianbelpa, TOPA ahi hi.

¹⁷Jerusalem mite awng, note sia hong ki uumci hi! Na neisate uh kaikhawm vun.

¹⁸TOPA in hi ngamsung pan note hong lawnthal tu hi; khat zongh kikhe ngawl dongin hong sucip tu hi. TOPA in ci zo hi.

¹⁹Jerusalem mite in, “Nasia takin ih liam hi! ih liammate dam ngawl tu hi. Hite sia ih thuak zawk tu khat po hi vak ci in ih ngaisun hi!

²⁰Ih puan bukte kisia zo a; a sawmna khaute tattan zo hi. Ih tate uh le tai siat zo a; ih puan bukte hong saksak kik tu kuama om nawn ngawl hi; A kongkha puante uh a khaisak tu kuama om ngawl hi,” ci in au uh hi.

²¹Keima in, “Ih lampuite mawmaw a; lamlak tu in TOPA thu dongh ngawl hi. Tuasia hu in amate nguallelin, ih mite kithethaang hi.

²²Ngai vun! Thu khat hong theng zo hi! Saksang ngam khat sungah buaina lian khat om hi; a ngalkaphon in Judah ngam khuapite sia ngiate teenna sennealngam suaksak tu hi,” ci in ka zo hi.

²³TOPA awng, kuama in ama ii maisang nuntakna a zeak thei ngawl hunlam ka he hi; kuama in ama nuntakna uk ngawl hi.

²⁴TOPA awng, na mite hong puua ta'n; ahihang a nasia lei in hong hi heak in, tua hibuale na thin uuk ciang daan hong pia heak in; tuabang nong hi le thi tu khu hi.

²⁵Na thin uukna sia nang hong bia ngawl minamte tung le nang hong nial mite tungah tungsak in. Amate in na mite that a; ko hong susia cipin ko ngam a sia sa in nusia uh hi.