Read Siyin Chin Jeremiah 11 Bible Online

Jeremiah 11 - Siyin Chin bible

Jeremiah 11

¹TOPA in kei tungah,

²“Hi thuciamna thute ngai in. Judah mite le Jerusalem khua mite tungah

³hi thuciamna a zui ngawl mi sim ii tungah Israel te ii TOPA Pathian keima in haamsiatna ka tunsak sia son in.

⁴Hi thuciamna sia pummei lingh taw a kibang Egypt ngam pan amate ka paipui lai in, a taanghpupite taw ka vawt uh thuciamna ahi hi. Ka thu hong nit natu le ka thupiak theampo vawt tu in amate ka son hi. Ka thu hong ni uh le, amate sia ka mite hi tu uh a keima in amate ii Pathian ka hi tu hi ci in amate ka son hi.

⁵Tuabangin ahi uh le tu a amate ii neisa ngamhoi ngampha sia kong pia tu hi ci a, a taanghpupite tungah ka piak kamciam sia keima in ka taangtungsak tu hi,” hong ci hi. Keima in, “Hi hi, TOPA awng,” ka ci hi.

⁶Tuaciang TOPA in keima tungah, “Judah ngam khuapite le Jerusalem khua sung lampite ah va pai ta'n. Tua munah ka thu thangsak ta'n a, thuciamna thute ngai in, a zui natu mihonpite tungah son ta'n.

⁷A taanghpupite Egypt ngam pan ka paipui lai in, ka thu hong nit natu in amate nasia takin ka hil a, tuni dong ma a kidop natu in ka hihil lai hi.

⁸Ahihang amate in ka thu hong ngai ngawl, hong ni ngawl uh hi. A vekpi in a ngei ma ngei in a thin uh pui a, ngilo veve uh hi. Thuciamna a zui tu in thu ka pia zo hi, ahihang hong nial uh hi. Tua ahikom thuciamna sungah a om daan theampo amate tungah ka tungsak hi,” hong ci hi.

⁹Tuaciang TOPA in kei tungah, “Judah mite le Jerusalem khua mite in kei hong thasawm uh hi.

¹⁰Amate in ka thu hong nial, a taanghpupite ii mawna khialna teng ma vawt kik uh hi; Amate in pathian dangte bia uh hi. Israel le Judah mite in a taanghpupite taw ka vawt khop thuciamna paltan zo uh hi.

¹¹Tua ahikom tu in, keima, TOPA in amate tungah siatna ka tunsak tu le kuama a suatak ngawl natu in thu ka sonkhol hi. Amate kapin huna hong nget ciang zong ka ngai buatu hi.

¹²Tuasia ciang Judah mite le Jerusalem khua mite sia a piakkhiatna taw a biak a pathiante kungah pai tu a, huna ngenin kap tu uh hi. Ahihang tua pathiante in hi siatna hun a thet ciang amate hun ngawl tu hi.

¹³Judah mite in a khuapi a nei zaza ma milim pathian tam mama nei uh a, Jerusalem khua ah a teang mite in khuapi sungah om lampite za ma in a kiihuai Baal pathian biaknatau tam mama vawt uh hi.

¹⁴Jeremiah awng, hi mihingte taangin kei tungah thu hong ngen heak in a, hong pakaai heak in. Amate sia ngim nga in a hu tu in kei hong sap ciang amate ka ngai buatu hi,” hong ci hi.

¹⁵TOPA in, “Ka it mihingte in a sia vawt uh hi. Ka Biakinnpi sungah a om natu bang thu nei thei nawn tu ziam? Amate in kamciam piakna le sangaw biakpiakna taw in tuasiatna khaam thei tu in ki um uh ziam? Tuasia in amate lungdamsak tu ziam?

¹⁶Khatvei lai in amate sia a nga pha nga thiam a, tee a hau olive kung khat taw ka sontee hi; ahihang tu in, keima in vanto bangin hawkin a teete mei taw halin a baakte ka thiaktan tu hi.

¹⁷“Keima, Vaanglianbelpa TOPA in Israel le Judah ka phut hi; ahihang tu in kong tuasiasak tu hi ci in ka tawng hi. Hi siatna sia amate tungah amate ma in a tungsak ahi hi, banghang ziam cile amate in khialna vawt uh hi; Baal tungah biakpiakna a piak hu in amate in kei hong thin uuksak hi,” ci hi.

¹⁸Ka ngalte ii kei hong thasawmna thu TOPA in kei hong son hi.

¹⁹Thalup tu a, a kipaipui a tote a muang tuuno khat bang ka hi a, amate ii a sia hong sawmnate ahi hunlam ka he bua hi. “Thingkung a nga thiam laitakin phuktan tawng; ama sia kuama ii a phaw nawn ngawl natu in thatlum tawng,” amate in ci uh hi.

²⁰Tuaciang keima in thungen in, “Vaanglianbelpa TOPA awng, nangma in thutang a khen thukhenmang khat na hi hi; mihingte ii ngaisutna le thinsung na sittel hi. Na khut sungah ka thu kong aap zo hi; tua ahikom hi mihingte tungah phu na laakna sia hong ensak ta'n,” ka ci hi.

²¹Anathoth mite in kei sia hong kithatlum le hong oai hi, tuaciang TOPA ii thu na thangsak lai le kong thatlum tu hi hong ci uh hi.

²²Tuasia ciang Vaanglianbelpa, TOPA in, “Amate daan ka pia tu hi! A tangvalte ngal sungah kithatlum tu a; a patangte sia ngilkialin pukthi tu uh hi.

²³Anathoth mite tungah tuasiatna ka tunsak tu hun ka khensat zo hi. Tuasia hun a thet ciang, kuama suakta ngawl tu uh hi,” ci hi.