Read Siyin Chin Jeremiah 14 Bible Online

Jeremiah 14 - Siyin Chin bible

Jeremiah 14

¹Nguatui hanna taw kisai in TOPA in kei tungah,

²“Judah kap in om a; a khuapite bo dedek hi, a mite khuangai in lei ah bok uh a, Jerusalem in huna ngenin au hi.

³Sumhau mite in a naseamte tui toai tu in sawl a; amate tuikhukte ah a pai uh le, tui om ngawlin a bealhawm nguak taw heak kik uh hi. Thinkiam lungmangin, amate in a mai uh seal hi.

⁴Nguazu ngawl ahikom leiko ngawp a, lothote lungmang mama in, a mai uh seal hi.

⁵A neak tu lopa om ngawl ahikom ngam sungah sangaipui in a no suaktuung sia nusia hi.

⁶Ngam laate in mualte dawn ah dingin ngam uite bangin husamh in hu diik vahut uh hi; a neak tu lopa om ngawl ahikom a mitte khuamu thei ngawl uh hi.

⁷Ka mite in kei hong oksan in, ‘Ka mawnate uh in ko maw hong suan ahitazong, TOPA awng, nong kamciamsa bangma in kote hong hu ta'n. Kote in nang kung pan tamvei ma ka puapial zo uh a; nang tungah kong maw zo uh hi.

⁸Nangma bekma Israel ii lametna na hi a; nangma bekma in kote tuasiat natu pan hong ngum pa na hi hi. Banghangin ka ngamsung uh ah khualmi khat bangin na om a, zan khat bek a taam khualhaw pa bangin om ni ziam?

⁹Banghangin muanmawk khol ngawl patauna nei mihing khat bangin, kuama a hu zo ngawl ngalkap khat bangin om ni ziam? TOPA awng, a tatakin, nang in ko taw nong omkhawm hi! Kote in na mite ka hi uh hi; hong nusia heak in’ a ci uh hi,” hong ci hi.

¹⁰Hi mihingte taw kisai in TOPA in, “Amate in kei kung pan tai nuam uh a, tuaciang amate le amate ki uk zo ngawl tu hi. Tua ahikom amate tungah ka lungkim ngawl hi. Khialna a vawt nate ka ciamtee tu a, a mawnate hu in amate daan ka pia tu hi,” ci hi.

¹¹TOPA in kei tungah, “Hi mihingte hu tu in kei tungah huna hong ngen heak in.

¹²Amate an a tang hial zonghin hu ngenin a auna aw ka ngai buatu hi; meihal biakpiakna le antang taw biakpiakna te hong piak uh hang zong, amate ii tungah ka lungkim ngawl tu hi. Amate sia ngal sungah ahizong kialpi tunna le natna taw ahizong ka thatlum zawsap tu hi,” hong ci hi.

¹³Tuaciang keima in, “Vaanglianpipa TOPA awng, kamsaangte ii hi ngam ah ngal kidona ahibuale kialpi tunna om ngawl tu hi, banghang ziam cile nangma in ih ngam sungah kilemna bek om tu in hong kamciam ci in mipite tungah a son sia na he hi,” ka ci hi.

¹⁴Ahihang TOPA in, “Tua kamsaangte sia keima min suangin leilot thu son uh hi; amate ka sawl bua a, amate tungah thupiak ka nei bua hi, amate kam khat beak zongh ka paupui bua hi. Amate ii a son mukholna sia kei kung pan hi ngawl hi; mailam thu piang tu a sonkhol thute sia amate ngaisut tawm, kimanna a nei ngawl thu ahi hi.

¹⁵Keima, TOPA in ka sawl ngawl bulin ka min suangin hi ngam ah ngal kidona le kial tung ngawl tu hi ci a, a son kamsaangte tungah bang law tu khi ziam ci sia no tungah kong son hi — ngal kidona le kialpi taw amate ka thatlum tu hi.

¹⁶Amate ii hi thute a sonna mihingte, hi bangma in kithatlum tu hi. A luangte sia Jerusalem khua lampi tungah kilawn thal tu a, a phum tu kuama om ngawl tu hi. Hi thu sia amate a vekpi — a zite, a tapate le a tanute theampo tung zongh ah tung tu hi. Amate ii seksolna thaman amate in ka thuaksak tu hi.”

¹⁷TOPA in ka khuangaina thute mipite tungah hi bangin son tu in kei hong sawl hi: “Sun zong zan zong ka thitui luang tahen, tawp hun nei ngawlin kap ka tong, banghang ziam cile ka mite nasia tatakin kiliamsak a, na sa uh hi.

¹⁸Lote sungah ka pai ciangin, ngal kisimna a, a kithat mithi luangte ka mu hi; khuate sungah ka pai ciangin a pukthi mite ka mu hi. Kamsaangte le thiampite in amate ii nasep tek seam uh ahihang, amate in bang seam ci zongh he meal ngawl uh hi.”

¹⁹TOPA awng, Judah te nialcip zo ni ziam? Zion mite ngaimaw ni ziam? Banghangin a dam zo nawn ngawl tuza dongin ko hong liamsak ni ziam? Thinnopna ka zong uh hi, ahihang phatna bangma hong piang bua hi, ciidam tu ka lamen uh hi, ahihang launa bek hong tung zaw hi.

²⁰TOPA awng, nang tungah kong maw zo uh hi; koma ii mawnate le ka taanghpupite ii mawnate kong pualaak uh hi.

²¹Nong kamciamnate phawk in a, kote hong ngaimaw heak in; na minthanna tokhum omna mun Jerusalem mindaisak heak in. Ko taw na vawt thuciamna sia paltan heak in.

²²Minamte ii milimte in nguazusak thei ngawl hi; van in ama ii thu taw nguazusak thei ngawl hi. TOPA kote Pathian awng, hite a vawt pa nangma na hikom nang sungah lametna kong nei uh hi.