Read Siyin Chin Jeremiah 15 Bible Online

Jeremiah 15 - Siyin Chin bible

Jeremiah 15

¹Tuaciang TOPA in kei tungah, “Moses le Samuel ngawngawn hi munah dingin ka tungah hesuak hong ngen hial zongh in, hi mihingte tungah hesuakna ka nei tuan buatu hi. Amate paisak vun; ka muna ah omsak heak vun.

²Koi sungah pai tu khu ziam ci in amate in nang hong dongh uh le, hi bang ka ci teng son in: Pawlkhat sia natna taw thi tu in kisee a — tua mun sia amate pai natu mun ahi hi! A dangte sia ngal sungah thi tu in kisee a — tua mun sia amate pai natu mun ahi hi! Pawlkhat sia pukthi in thi tu in kisee a — tua mun sia amate pai natu mun ahi hi! A dangte sia thongtaakte bangin a kipaipui tu in kisee a — tua mun sia amate pai natu mun ahi hi!

³Keima, TOPA in, a lauhuai thu nam li amate tungah tung tu in ka khensat zo hi: Ngal sungah amate kithatlum tu hi; a luangte ui in kaikeak a; vacimte in ne tu hi, tuaciang a om laiteng ngamsate in ne tu hi.

⁴Hezekiah ii tapa Manasseh in Judah ngam ah kumpi a sep laitakin Jerusalem khua ah a vawt thute huu in tuate taw leitung mite theampo ka liinglawngsak tu hi,” hong ci hi.

⁵TOPA in, “Jerusalem mite awng, akua in no hong hesuak tu ziam, akua in no hong khuangai pui tu ziam? Na om zia uh hong dongh tu in akua in hong ngak man tu ziam?

⁶No, mihingte in kei nong nial zo uh a; nong nungngat zo uh hi, ka thin uukna ka iip na in toi zo ka hikom ka khut zalh in kong susia hi.

⁷Ngamsung khua sim ah taangphaw bangin vui sungah note kong lawn hi. Ka mite awng, note kong susia hi, Na ngitlo ngamtatnate uh na kheal ngawl uh hu in na tate uh ka thatlum hi.

⁸Tuipi hui ah sennealte sangin note ngam sungah meingong tamzaw hi. Na tangvalte uh a khan saan laitakin ka that a, a nute in ka thuaksak hi. Thakhat thu in amate tungah thin natna le launa ka thengsak hi.

⁹A tate sali ii a thi sanh a nu sia butthi in a husamh hi, ama ii sun khuavak sia khuazing suak a, ama sia maimawl in a thinna sa hi. No sung pan a nungta laiteng na ngalte in kong thatlumsak tu hi. Keima, TOPA in ka son zo hi,” ci hi.

¹⁰A lungdam ngawl pa sia keima ka hi hi! Banghangin ka nu in leitung ah kei hong hing ziam? Ngam sungah mihing theampo taw kihau in thu kinial tu ka hi thong hi. Sum ka pukthaak bua a sum ka pu bua hi; tua hi napi ngual theampo in kei hong haamsiat veve hi.

¹¹TOPA awng, nangma ii na pha takin ka seam bua le, ka ngalte ngim nga a natna satna a thuak laitakin amate taangin nangma tungah hesuakna ka ngetsak buale amate ii hong haamsiatnate theampo taangtung tahen. (

¹²Kuama in thik, a tuan in saksang pan hong pai taau taw kihel thik sia thiaktan zo ngawl hi.)

¹³TOPA in keima tungah, “Ngamsung theampo ah mawna khialna a vawt hu in amate daan pia tu in ka mite ii nei le lamh sum le vanh manphate a laaksak tu ngalte ka puak tu hi.

¹⁴A thu a la a heak ngeingawlna ngam ah a ngalte ii na ka seamsak tu hi, banghang ziam cile ka thin uukna sia mei taw kibangin a tawntungin kuang tu hi,” hong ci hi.

¹⁵Tuasia ciang keima in, “TOPA awng, tel ni hi. Hong phawkin hong hu ta'n. Kei hong vawtsiate tungah phu hong lasak ta'n. Amate ii kei hong thalup nop sia a taangtut natu in, amate tungah na thin sausak lei heak in. Nangma hangin kei hong kiselno ahi sia phawk in.

¹⁶Nangma in nong paupui a na kammal theampo kong ngai hi. TOPA, Vaanglianbelpa, Pathian awng, keima in nangma aa ka hi a, tua ahikom na kammalte in ka thin hong nuamsak a hong lungdamsak hi.

¹⁷Keima in midangte taw nui khawmin ngualnop hun ka zangh bua hi. Nong thupiak ka nitna in keima nguakin ka om a, thin uukna taw ka kidim hi.

¹⁸Banghang ngim thuathuak lai khi ziam? Banghangin ka liammate kibawl thei ngawl ziam? Banghangin dam ngawl tu ziam? Khuakhaal sung luitui kang bangin thin kiamsak tu hong sawm ni ziam?” ka ci hi.

¹⁹Hi thu taw kisai in TOPA in, “Nong heak kik ahile kong la kik tu a, ka naseampa na suak kik tu hi. Thu mannung ngawl po na son sangin thu manpha thu taknei na son le, ka kamsaang na suak kik tu hi. Mipite sia nang kung hong zuan kik tu a, amate kungah nang na pai kul ngawlzaw tu hi.

²⁰Hi mite taw na kizopna ah taau ciitak taw a kivawt khua uumna dal taw kong kibang sak tu hi. Amate in nang hong sim uh hangin hong zo buatu hi. Nang hong dal tu le hong keamcing tu in nang taw kong omkhawm tu hi.

²¹Mi seksolte le mi ngoltolte ii khut sung panin nang kong suatak tu hi. Keima, TOPA in kong son hi,” ci in hong zo kik hi.