Read Siyin Chin Jeremiah 16 Bible Online

Jeremiah 16 - Siyin Chin bible

Jeremiah 16

¹TOPA in hi bangin kei hong paupui leleau hi.

²“Hi bang munah zi zongh ta zongh nei heak in.

³Hi munah a piang tate tung le a nu a pate ii tungah bang thupiang tu cisia na tungah kong son tu hi.

⁴Amate a lauhuai natnate taw in thi tu uh hi, kuama in amate kaa ngawl tu, phum ngawl tu hi. Amate ii luangte lei ah eaklei bangin kithu tu hi. Amate sia ngal sungah kithat tu a, ahibuale ngilkial pukthi in thi tu hi, a luangte sia vacimte le ngamsate ii an hi tu hi.

⁵“Mithi kikaana inn sungah tum heak in. Kuama khuangai pui heak in. Ka mite sia thinnopna thupha ka pia nawn buatu a, itna le hesuakna ka lak nawn buatu hi.

⁶Hi ngam ah a hau le a zawngte thi tu uh a, kuama in amate phum ngawlin, kaa ngawl tu hi. A khuangaina a lak natu in kuama in ama le ama nam taw ki at ngawl tu a, a sam uh meet ngawl tu hi.

⁷A it khat a thi ciang heenepna in, kuama in ama tui le an neak pui ngawl tu hi. A pa ahibuale a nu a thite ngawngawn kuama in khuangai pui ngawl tu hi.

⁸“Anneakpoai vawtna inn sungah tum heak in. Anne tuidawn tu in amate taw tokhawm heak in.

⁹Vaanglianbelpa TOPA Israel te ii Pathian keima ii ka son tu thute ngai in. Ngualnopna awte, lungdamna le mopoai ngualnopna awte ka thimsak tu hi. Hi lai ah a om mihingte, hi thupiang sia mu tu in nungta tu uh hi.

¹⁰“Hi thu teng amate tungah na son ciang, amate in, banghangin keima in daan nasia mama piak tu in khensat khi ziam ci sia nangma hong dongh tu hi. A khialna lian sia a bang hi a, TOPA, a Pathian tungah bang mawna khialna vawt ziam ci sia amate kidongh tu uh hi.

¹¹Tuasia ciang TOPA ii hi bangin a ci sia amate tungah va son ta'n hong ci hi, ‘Na taanghpupite in kei kung pan puapial a ngamdang pathiante bia in a na seam uh hi. Amate in kei hong nusia a ka hil thute ni ngawl uh hi.

¹²Ahihang no sia na taanghpupite uh sangin a sia zaw vawt nu hi. Na vekpi in a thinpui le a ngilote na hi uh hi, ka thu nong ni bua uh hi.

¹³Tua ahikom hi ngam panin noma le na taanghpupite ii heak ngeingawlna ngam ah kong notkeak tu hi. Tuasia ciang tua munah a sun a zanin pathian dangte ii na na seam tu uh a, keima in no kong hesuak buatu hi.’ ”

¹⁴TOPA in, “Egypt ngam pan Israel mite a paipui, a nungta Pathian ka hina bangin keima min taw mihingte a kiciam nawn ngawl hun hong theng tu hi.

¹⁵Amate in, saksang ngam pan le amate ka thethaangna ngamdang theampo panin Israel mite hong paipui, a nungta Pathian, keima min taw kiciam zaw tu uh hi. A taanghpupite tungah ka piaksa amate ngam ah ka ciasak kik tu hi. Keima TOPA in ka son zo hi,” ci hi.

¹⁶TOPA in, “Ngasa mante tam mama hong pai natu in ka vaitha tu a, hi mite ka mansak tu hi. Tua zawkciang savaite tam mama ka vaitha tu a, muallian mualno tung theampo le suangkawm suanghawngte sungah amate ka vaisak tu hi.

¹⁷Amate vawt theampo ka mu hi. Ka mai ah a kiseal bangma om ngawl hi; amate ii mawna khialnate ka mu ngawl, bangma om ngawl hi.

¹⁸Amate ii mawna khialna le seksol nate hu in a zaa nii ka liausak tu hi, banghang ziam cile mithi luangte bang a nuntakna a nei ngawl milimte taw amate in ka ngam ninsak uh a, amate ii a maan ngawl pathiante ka ngamsung kidimsak hi,” ci hi.

¹⁹TOPA awng, nangma in kei hong dal a thahatna hong pia pa na hi hi; ka ngim nga laitakin nong hu hi. Leimong panin minamte nang kungah hong pai tu uh a, “Ka taanghpupite in pathian maan ngawlte le kimanna a nei ngawl milimte simngawl bangma dang nei ngawl hi.

²⁰Mihingte in aituam pathiante vawt thei tu ziam? Vawt thei ngawl tu hi, a vawt a ahile, tuate in pathian tatak hi ngawl tu hi,” hong ci tu uh hi.

²¹TOPA in, “Tua ahile, tawntung atu in khatvei ka vaangletna le ka thahatna sia minamte in ka hesak tu hi; amate in TOPA ka hi sia he tu uh hi,” ci hi.