Read Siyin Chin Jeremiah 18 Bible Online

Jeremiah 18 - Siyin Chin bible

Jeremiah 18

¹TOPA in kei tungah,

²“Beal seakpa ii inn ah haw in a, tua munah thu kong son tu hi,” hong ci hi.

³Tua ahikom tua munah ka pai a, beal seakpa sia bealseakna muipei sia taw naseam in om ka mu hi.

⁴Beal a seak ciang a tungman a pha tak bua ahile tua tungman sia nadang khat in vawt kik hi.

⁵Tuaciang TOPA in kei tungah,

⁶“Beal seakpa in tungman taw a dei babang a vawt bangma Israel mihing note tungah ka dei babang vawt theina thu nei hi ngawl khi ziam? Beal seakpa khut sungah a om tungman bangin note in ka khut sungah na om uh hi.

⁷Hun khat pawpo ciang minam khat ahibuale kumpi ukna ngam khat sia a zung pan longh tu khi hi, thiaktan tu khi hi, ahibuale susia tu khi hi ci ka hi ta zong,

⁸tua minam in ngitlona panin a kikheal kik a ahile vawt tu ka ci sa sia ka vawt buatu hi.

⁹Ahitazong, minam khat ahibuale ngam khat ka phut tu, ka sa tu hi ka ci zawkciang,

¹⁰tua minam in ka thu hong ni bua a, a sia a vawt veve le tua minam tungah phatna ka vawt tu ka ci sate ka vawt nawn buatu hi.

¹¹Tua ahikom tu in, Judah mite le Jerusalem mite kungah amate siatsak tu tupna nei a daan pia tu in a kinging sa in ka om sia son in. Mawna khialna vawtin a nuntaknate a kheal natu — a omziate le a nasepte a lai natu in amate tungah son in.

¹²Amate in, ‘Hi ngawl hi, banghang khealin laih tu khu ziam? Koma uuk bangin mihing a thinpui le a ngilo ma hi tu khu hi,’ ci in zo tu uh hi,” hong ci hi.

¹³TOPA in, “Nidang in tuabang thu a piang ngei zo ziam, minam theampo tungah dongh vun. Israel mite in a cizathuai na khat vawt zo uh hi!

¹⁴Lebanon suangmual saangte vuuk in tuam ngawlin om ngei ziam? Mualtung pan hong luang a vot luite kang ngei ziam?

¹⁵Ahihang ka mite in kei hong mangil zo uh a; milimte kungah ngimnamtui hal uh hi. A tot natu lampi ah lutu zo a, lamluite zui nawn ngawl hi; a kisial ngawl lamzinte tawn uh hi.

¹⁶Amate in hi ngam sia a tawntung a kinomu tu in a lipkhaphuai ngam suaksak uh hi. Tua mun a kaantan mihingte theampo in tua ngam a mu uh ciang a thin patau tu uh a, lamdang sa in a lu pei tu uh hi.

¹⁷Keima in ka mite sia a ngalte mai ah, nisuana sang vui ii leivui a seamkeak bangin ka thethaang tu hi. Amate ka nungngat tu a; tuasiatna hong thet ciang ka hu buatu hi,” ci hi.

¹⁸Tuaciang mite in, “Jeremiah taw kisai in na pawlkhat seam sin tawng! Hong hil tu in thiampite, ngaisutna hong pia tu in miciimte le Pathian ii thupuak a thangsak tu in kamsaangte om tawntung tu hi. Ama tungah thu ih vawt tu a, ama thuson peuma ih ngai buatu hi,” ci uh hi.

¹⁹Tuaciang hi bangin thu ka ngen a, “TOPA awng, ka sawsonte hong ngai ta'n a kei thu taw kisai in ka ngalte ii sonnate ngai in.

²⁰A pha sia, a sia taw lo kik tu ahi ziam? Tua hi napi amate in ka taaksuk natu in leidum khat to zo uh hi. Na kungah kong pai a, na thin uukna taw amate na vawtsiat ngawl natu in amate luangin kong son sia phawk in.

²¹Ahihang tu in TOPA awng, a tate ngilkial in pukthisak in; amate ngal sungah thalup thuaksak in. Nupite a pasalte le a tate in thi sansak in; pasalte sia natna taw thisak in, tangvalte ngal kisimna ah thalup thuaksak in.

²²Hil khol ngawlin a ngilo nuam honkhat amate inn phuul tu in paisak in; amate lau in ausak in. Amate in ka taak natu in dum khat to uh a, hong mat natu in thaang hong sia uh hi.

²³Ahihang TOPA awng, amate ii kei hong thasawmnate theampo na he hi. Amate ii ngitlona ahibuale a mawna maisak heak in. Na thin uuk laitak ma in amate nguallelcipsak in” ka ci hi.