Read Siyin Chin Jeremiah 25 Bible Online

Jeremiah 25 - Siyin Chin bible

Jeremiah 25

¹Josiah ii tapa Jehoiakim sia Judah kumpi a sua zawk kum lina hunin, Judah mite theampo taw kisai TOPA ii thupuak khat ka nga hi. (Hi hun sia Nebuchadnezzar ii Babylon kumpi a sua a kum khatna hun ahi hi).

²Keima in Judah le Jerusalem mite theampo ii tungah,

³“Amon ii tapa Josiah sia Judah kumpi a sep kum sawm le kum thumna pan kipan tuni ciang dong ma, kum kul le kum thum sung, TOPA in ka tungah thu hong son zo a, ama ii a sonte hong son ngawlin ka om ngei bua hi. Ahihang bangma na nadon bua uh hi.

⁴TOPA in ama naseam kamsaangte hong puak tawntung hi napi a thu na ngai bua a, na awlmawk bua uh hi.

⁵Nang le na taanghpupite ii a tawntung na lua tu in TOPA ii hong piaksa ngam sungah na teen tan thei natu uh in, na seksolnate le a sia na ngamtatnate panin na kikheal natu uh kamsaangte in no tungah hong son zo hi.

⁶Pathian dang na biak ngawl natu uh le tuate ii na na sep ngawl natu uh, na vawttawm uh milimte biakna taw TOPA na thin uuksak ngawl natu in kamsaangte in no hong son hi. TOPA thu na ni uh le, ama in note daan hong pia ngawl tu hi.

⁷Ahihang TOPA ama mama in ka thu ngai nuam ngawl nu hi hong ci hi. Tuasia luangin, noma ii milimte taw ama thin uuksak a, daan hong piakna sia noma le noma ii kivawt ahi hi.

⁸“Tuabang a, a thuson na ngai nop ngawl uh manin Vaanglianbelpa TOPA in,

⁹‘Keima in saksang ngam ah a om mihingte theampo le ka naseam Babylon kumpipa Nebuchadnezzar ka sam tu hi. Keima in Judah le a ngam sungah a teang mihingte theampo le a kiim a paam a om minamte theampo sim tu in amate ka paisak tu hi. Keima in hi ngam le a kiim a paam minamte ka susia tu hi, tuaciang a tawntungin a siacipin ka nusia tu a, a lauhuai le diipkuathuai mun suak tu hi. Keima, TOPA in ka ci zo hi.

¹⁰Amate lungdam in a au nate, lungdam lawpna le mopoai sung lungdamna awngingte ka thimsak tu hi. Amate in a meiinnte atu in meitui nei ngawl tu uh a, neak tu antang om nawn ngawl tu hi.

¹¹Hi ngam buppi a siathamin kinusia tu a, a ngamkhing mun suak tu hi, a kiim ah minamte in kum sawmsali sung tawntung Babylon kumpipa ii na seam tu uh hi.

¹²Tua zawkciang Babylon le a kumpipa sia a mawna uh hu in daan ka pia tu hi. Tua ngam ka susia tu a, a tawntung lalcip in ka nusia tu hi.

¹³Jeremiah tungtawn a ka son lai in minamte tungah ka thengsak tu ci a ka tawnna tuasiatnate theampo — hi laibu sungah a kikhum tuasiatnate theampo taw Babylon daan ka pia tu hi.

¹⁴Amate ii sep sa bangin Babylon te ka thuk kik tu a, minam tam mama le kumpi liante in amate sila in kai tu uh hi, a ci hi,’ ” ka ci hi.

¹⁵TOPA Israel ii Pathian in keima tungah, “Hi lai ah ka thin uukna taw a kidim sapittui hai khat om hi. Kong paisakna minamte theampo kungah tua hai paipui in tua hai sung pan amate in nesak in.

¹⁶Amate in tua hai sung pan a neak uh ciang soai vadeng tu uh a, a thin uh amh tu uh hi, banghang ziam cile amate a do tu ngal ka puak hang ahi hi,” hong ci hi.

¹⁷Tuasia ciang tua hai sia TOPA ii khut tung panin ka la a, TOPA hong sawlna minamte theampo tungah pia in tua hai sung panin ka nesak hi.

¹⁸Amate sennealngam khat, a lauhuai, diipkuathuai mun a sua natu le, mihingte ii ama te min sia haamsiatna in a zak natu in — tu hun dong a kizak lai bangma Jerusalem le Judah ngam khuapite theampo, a kumpite uh le a lampuite uh taw tua hai sung panin kidawnsak hi.

¹⁹Tua hai sung pan a ne tu a dangte theampo ii min tepteena sia hi bang ahi hi: Egypt kumpipa, a khutnuai uliante le lampuite; Egypt mite theampo le Egypt ngam sungah a om ngamdangmite theampo; Uz ngam ah kumpite theampo; Philistine ngam ah Ashkelon, Gaza, Ekron khuapite ii kumpi theampo le Ashdod khuapi ah a taang laite; Edom, Moab le Ammon mite theampo; Tyre ngam le Sidon ngam kumpite theampo; Mediterranean tuipi hui a om ngamte ii kumpite theampo; Dedan, Tema, le Buz ii khuapite; a sam uh a tomin a meet mite theampo; Arabia ngam kumpite theampo; sennealngam minamte ii kumpite theampo; Zimri, Elam, le Media ngam kumpite theampo; saksang ngam kumpite theampo, a khuala a nai ci om ngawlin, khat zawkciang khat cite ahi hi. Leitung ah a om minam theampo in ne tu uh hi. A khak belin Babylon kumpipa in ne tu hi.

²⁷Tuaciang TOPA in keima tungah, “Mipite tungah son in. Keima, Vaanglianbelpa TOPA, Israel ii Pathian in, amate tungah ngal ka thetsak hu in amate kham in a luak dong, pukin a thaw kik zawk ngawl za dong a neak tu in thu ka piak sia son in.

²⁸Amate in na khut tung panin hai la nuam ngawlin a dawn nuam bua uh le a dawn nanak uh kul lai tu hi, Vaanglianbelpa TOPA in a ci sia amate son in.

²⁹Keima khuapi sungah suksiat nasep ka kipan tu hi. Daan thuak ngawl tu in kingaisun uh ziam? Hi ngawl hi, amate sia daan kipia tu hi, banghang ziam cile leitung mite theampo tungah ngal ka thengsak tu hi. Keima, Vaanglianbelpa TOPA in ka ci zo hi.

³⁰“Jeremiah awng, ka son theampo nangma in taangko tu ni hi. Hi mihingte tungah, ‘TOPA in vantung panin hawk tu a, vantung a saangna panin vanto tu hi. Ama in a mite hawksan tu a; sapitnga a cilpa khat bangin ama au tu hi. Leitung ah a om theampo in ama aw za tu a,

³¹leimong dongin a aw hawl tu hi. TOPA in minamte tungah thu vawt khat nei hi. Ama in mihingte theampo thu sit tu in paipui tu a, mi seksolte thisak tu hi. TOPA in son zo hi,’ ci in,” son tu ni hi.

³²Vaanglianbelpa TOPA in tuasiatna sia ngam khat zawkciang ngam khat ah theng tu a, vuipi suangval khat sia leimong a khuala na munah va tu hi, ci hi.

³³Tua ni in TOPA ii thalup sa mithi luangte sia leimong khat panin leimong khat ah kithethaang in om tu hi. Kuama in amate kaa ngawl tu a, a luangte phaam in phum ngawl tu hi. Amate sia ninthuk kiseng bangin lei tungah kiseng tu hi.

³⁴No lampuite awng, kap vun, ka mite a cing a keamte awng, a ngingin kap vun! Tau in leivui sungah liik vun. Note hong kithalup tu hun hong theng zo a, tuutalte bangin note hong kisem tu hi.

³⁵Na suatakna tu uh lampi om ngawl tu hi.

³⁶Thinngimin tau in kap vun, banghang ziam cile TOPA in a thin uukna taw in na minam hong susia zo a, na ngamnuam uh a siacipsa in nusia zo hi.

³⁸Tawpi khat in akua a nusiat bangin TOPA in a mite nusia zo hi. A lauhuai ngal kidona le TOPA ii a kiitakhuai thin uukna in hi ngam sennealngam suaksak zo hi.