Read Siyin Chin Jeremiah 26 Bible Online

Jeremiah 26 - Siyin Chin bible

Jeremiah 26

¹Josiah ii tapa Jehoiakim, Judah kumpi a sua zawk po ciang,

²TOPA in keima tungah, “Biakinnpi huang sungah ding in a, Judah ngam khuapite pan tua munah Pathian bia tu in hong pai mihingte tungah son tu a kong sawlte theampo thangsak in. Kheet nei heak in.

³Tua mihingte in na thu hong ngai tu a, a ngamtat siatnate kheal thei tha tu hi. A kikheal uh le, amate ii seksol ngamtatna hang a, amate suksiat tu in ka tup ka ngaisut sia ka kheal kik tu hi,” hong ci hi.

⁴TOPA in mipite tungah son in ci a hong sawlna panin, “Keima, TOPA ii kong hilcianna sia na zuina uh taw ahizong

⁵note kungah kong paisak nithi ka naseam kamsaangte ii kammalte na nadonna uh taw ahizong, ka thu nong nit tu kisamh hi, ci in hong son zo khi hi. Amate ii a sonte na ni ngei bua uh hi.

⁶Thu na ni bua lalai uh le, Shiloh khua tungah ka vawt bangin hi Biakinnpi tungah ka vawt tu a, leitung minamte theampo in hi khuapi ii min sia kihaamsiatna in zangh tu uh hi,” hong ci hi.

⁷Thiampite, kamsaangte le mihing om theampo in Biakinnpi sungah ka son hi thute za uh hi.

⁸TOPA ii hong thupiak theampo ka son tu ka man zawkciang amate in kei hong man in, “Hi bang na son hu in thalup tu in kilawm ni hi!

⁹Banghangin TOPA min suangin hi Biakinnpi sia Shiloh khua bang suak tu a, tuaciang hi khuapi kisusia cip in kuama teang ngawl tu hi ci ni ziam,” ci in au keak uh hi. Tuaciang mihonte in kei hong uumci uh hi.

¹⁰Judah ngam lampuite in hi thu a zaak uh ciang, kumpi inn pan Biakinnpi ah manlangin pai uh a, Kongpi Thak ah omna la uh hi.

¹¹Tuasia ciang thiampite le kamsaangte in ngam lampuite le mihonte tungah, “Hisia pa thidaan piak tu kilawm hi, banghang ziam cile ih khuapi siatson hi. Na bil uh taw na za tek zo uh hi,” ci uh hi.

¹²Tuaciang keima in, “Hi Biakinnpi le hi khuapi ka siat sonna na zaak uhte theampo sia, TOPA in taangko tu a kei hong sawl thute hi.

¹³Na nuntakzia le na sep uhte kheal nanak vun a, TOPA na Pathian thu ni vun. Tuabangin na hi uh le, no tungah siatna thengsak tu in a sonsa sia pan TOPA in a thin kheal tu hi.

¹⁴Kei ka hile, noma khut sungah ka om hi! Pha na sak, maan na sak uh bang pawpo in ka tungah hong vawt tavun.

¹⁵Ahihang hi thu telcian vun: kei nong that uh le noma le hi khuapi sung mihingte sia a mawbaang ngawl mihing khat that a mawnei na tang tu uh hi, banghang ziam cile hi kidop natu thu, no tungah son tu in hong sawl pa sia TOPA ahi hi,” ka ci hi.

¹⁶Tuaciang ngam lampuite le mihonte in thiampite le kamsaangte tungah “Hisia pa in TOPA ih Pathian min suangin ei tungah thu hong son hi; ama kithatlum ngawl tu hi,” ci uh hi.

¹⁷Tua zawkciang, upate pawlkhat ding to in a kikhawm mipite tungah,

¹⁸“Hezekiah sia Judah kumpi ahi lai in, Moresheth khua mi kamsaang Micah in mi theampo tungah Vaanglianbelpa TOPA in hi bangin, ci hi, ‘Zion sia lo khat bangin kitho tu hi; Jerusalem sia ninthuk suak tu a, Biakinnpi dinna mual sia dui suak tu hi.’

¹⁹Hezekiah kumpipa le Judah mite in Micah thatlum ngawl uh hi. Hezekiah in TOPA zatak vawtin TOPA ii mai pha a nga natu in hanciam zaw lai hi. Amate tungah tuasiatna ka thengsak tu hi a ci sia TOPA in a thin kheal kik hi. Tu in eima in a lauhuai tuasiatna khat eima tung ma ah ih thengsak dektak hi!” ci uh hi.

²⁰(Kiriath Jearim khua pan Shemaiah ii tapa Uriah a kici midang khat om hi. Ama in Jeremiah bang keak ma in TOPA min suangin hi khuapi le minamte son sia hi.

²¹Jehoiakim kumpipa le a ngalkapte le uliante in Uriah ii thuson a zaak uh ciang, kumpipa in Uriah a kithalup natu in hanciam hi. Ahihang tua thu Uriah in za hi; tuaciang ama lau in Egypt ngam ah tai a, suakta hi.

²²Ahizong Jehoiakim kumpipa in Achbor ii tapa Elnathan le midang pawlkhat sia Uriah man tu in Egypt ngam ah paisak hi.

²³Amate in Uriah sia Jehoiakim kumpipa kungah puak kik uh hi. Kumpipa in Uriah thatlumsak in a luang sia nautaang kiphumna thaan sungah vawk hi.)

²⁴Ahihang keima sia Shaphan ii tapa Ahikam in hong panpui ahikom thalup tu in mipite khut sungah thalup tu hong ki aap ngawl hi.