Read Siyin Chin Jeremiah 3 Bible Online

Jeremiah 3 - Siyin Chin bible

Jeremiah 3

¹TOPA in, “Pasal khat in a zi khul a, tua nu in ama nusia in ngualdang khat ii zi a suak le, ama in tua nu la kik thei ngawl tu hi. A la kik ahile a ngam ninsak siat tu hi. Ahihang Israel awng, nang in lawm tam mama na nei zawkciang tu in ka kung nong zuan kik nuam hi!

²Mualdawnte ento in. Pumpi kizuak khat bang a na ngamtat ngawlna mun a om ziam? Arab mite in a suam tu mite sennealngam sungah a pan bangin nang in lam dung ah lawm na pang hi. Na pumpi kizuakna taw in ngam na ninsak zo hi.

³Tua hu in nguatui hang a, khuapi nguazu ngawl hi. Numei kizuak khat taw na kibang hi; maizumna na nei bua hi.

⁴“Tu in kei tungah, ‘Nangma in ka pa na hi a, ka no lai pan kipan kei nong it zo hi.

⁵Kei tungah nong thin uuk tawntung buatu a; kei tungah na thin nong ngam tawntung buatu hi’ nong ci hi. Israel awng, tua in nangma ci hi a, ahihang a sia na vawt thei theampo na vawt hi” ci hi.

⁶Josiah, kumpi in a maan lai in, TOPA in kei tungah, “Tua a thumaan ngawl numei, Israel ngamtatna na mu zo ziam? Ama in kei hong taisan zo a, mual saangna theampo tung le thingkung hing theampo nuai ah pumpi kizuak numei khat bangin ngamta zo hi.

⁷Ama in hi teng theampo a vawt siat zawkciang, kei kung hong zuan kik nanak tu in ka ngaisun hi. Ahihang ama hong heak kik ngawl a, a thumaan ngawl ama ii suapuinu Judah in tuate theampo mu siat hi.

⁸Israel sia keima kung pan tai zo a, pumpi kizuak numei khat suak zo ahi hu in ama khul a, ka nawkeakna thu sia Judah zongh in mu hi. Ahihang Israel ii a thumaan ngawl a suapuinu Judah sia lau ngawl hi. Ama zongh pumpi kizuak khat suak a,

⁹a maizum ngawl het hi. Ama in ngam ninsak hi, suangtum le thingkungte a biakna taw in palngul khialna vawt hi.

¹⁰Hi bang teng zawkciang Israel ii a thumaan ngawl, a suapuinu Judah in ka kungah heak kik tu in hong kinei theam bek a; a thin tatak taw hi ngawl hi. TOPA, keima in ka son zo hi,” hong ci hi.

¹¹Tuaciang TOPA in kei tungah, Israel sia ama kung pan heak kik ahitazong, a thumaan ngawl Judah sangin phazaw ngawp lai hi, ci in hong son hi.

¹²Ama in kei tungah Israel te kung pai in hong sawl a, “Thumaan ngawl Israel awng, ka kungah hong pai kik ta'n. Keima in ka hesuak thei a, ka thin uuk ngawl tu hi; nang tungah a tawntungin ka thin a uuk buatu hi.

¹³Na khialna le TOPA na Pathian na langpannate thiang takin pualaak po in. Thingkung hing theampo ii nuai ah ngamdang pathiante na thangaina taw kong thupiakte na nit ngawlnate pualaak in. TOPA keima in ka son zo hi.

¹⁴“Thumaan ngawl mite awng, hong pai kik tavun; keima ii neisa na hi uh hi. Khuapi sim panin khat tek le bee le phung sim panin nii tek kong la tu a, Zion mual ah kong puak kik tu hi.

¹⁵Ka thu hong ni ngamukte kong pia tu a, amate in pilna le telthiamna taw note hong uk tu uh hi.

¹⁶Tuaciang tua ngam sungah pungin mihing na tam zawk uh ciang, mihingte in ka Thuciamna Thingkuang ii thu son nawn ngawl tu uh hi. Amate in tua thu ngaisun nawn ngawl tu a, zongh phawk nawn ngawl tu uh hi; amate in kul zongh sa ngawl tu uh a, a dang vawt tuan ngawl tu uh hi.

¹⁷Tua hun hong thet ciang, Jerusalem sia ‘TOPA ii Kumpi Tokhum,’ kici tu a, minam theampo tua munah keima bia tu in kikhawm tu uh hi. Amate in a thin puina le a thin siatnate ii sawlna bangin seam nawn ngawl tu uh hi.

¹⁸Israel sia Judah taw kikop tu uh a, amate in a saltanna ngamsung saksang pan hong paikhawm tekin, na taanghpupite ii a kip a kho in a nei top tu a piaksa ngam ah cia kik tek tu uh hi,” va ci ta'n, ci a hong sawl hi.

¹⁹TOPA in, “Israel awng, nang sia ka tapa bangin kong saang nuam a, leitung theampo sung pan a et hoibel ngamnuam khat kong pia nuam hi. Kei sia pa nong nak tu le ka kung pan na tai kik ngei nawn ngawl tu ka dei hi.

²⁰Ahihang a thumaan ngawl zi khat bangin, kei tungah nong thumaan bua hi. TOPA keima in ka son zo hi,” ci hi.

²¹Mualdawnte ah awnging khat kiza hi: tua in Israel mite kaana le thuumna aw ahi hi, banghang ziam cile amate nuntakna sia mawna khialna taw kidimin TOPA a Pathian uh a makngil hang ahi hi.

²²TOPA kung pan a puapial note theampo awng, heak kik tavun; ama in note hong damsak tu a, thumaan hong suaksak tu hi. Note in, “Hi hi, ama in ih Pathian ahi manin eite TOPA kungah ih pai hi.

²³Mualdawn ah ih doai biakna in ei hong hu vet ngawl hi. Israel te atu huna sia TOPA ih Pathian kung pan bekin hong pai hi.

²⁴Ahihang maizumna pathian, Baal biakna in, ih tuu honte le khui honte, tapate le tanute — taanghlai pan kipan ih taanghpupite ii a thalaw sa theampo hong sumsisak siat zo hi.

²⁵Eite maizum in, lum in ih maimawlna in hong seal tahen. Eima le ih taanghpupite sia TOPA ih Pathian tungah ih khial tawntung zo hi; ama ii thupiakte ih zui ngei bua hi,” ci nu hi.