Read Siyin Chin Jeremiah 30 Bible Online

Jeremiah 30 - Siyin Chin bible

Jeremiah 30

¹TOPA, Israel ii Pathian in,

²keima tungah: “Kong son theampo laibu khat sungah at in,

³banghang ziam cile Israel le Judah ka mite a ngam ka piak kik tu hun hong theng tu hi. A taanghpupite tungah ka piaksa ngam ah ka heak kik sak tu a, amate in tua ngam tang kik tu uh hi. Keima, TOPA in ka son zo hi,” hong ci hi.

⁴TOPA in Israel le Judah mite tungah:

⁵“Launa le, patauna aw khat ka za a, thinnopna aw ahi bua hi.

⁶Tu in tawlnga in ngaisun vun! Pasal khat in nau a nei thei ziam? Tua ahile banghangin pasal sim in numei nautun bangin a ngil hum ziam? Banghangin a kuama po a mai daang ziam?

⁷A lauhuai mama ni khat hong theng tu a; nidang taw kitee thei ngawl tu hi — ka mite ii ngimna thuak hun hi tu a, ahihang amate suakta veve tu uh hi,” ci hi.

⁸Vaanglianbelpa TOPA in: “Tua ni hong thet ciang, a ngawng uh ah a kibul hakkol ka thiaktan tu a, a thikkolte ka vawk tu hi, amate in ngamdangmite ii silate hi nawn ngawl tu hi.

⁹Amate in TOPA a Pathian le, kumpi ka suasak tu David ii suan le paal khat ii na seam zaw tu uh hi.

¹⁰“Ka mite awng, lau heak vun; Israel mite awng, patau heak vun. Na thongtaakna a khualana ngam panin kong suatak tu hi. Inn ah nong cia kik tu uh a, thinnuam takin na teang tu uh hi; na ngammuang tu uh a, kuama in no hong lausak ngawl tu hi.

¹¹Note kungah kong pai tu a kong ngum tu hi. Kong thethaangna ngammite theampo ka susia tu a, ahihang no kong susia buatu hi. Daan thuak ngawlin no kong omsak buatu hi; ahihang daan kong piak ciang, a kilawm in kong pia tu hi. Keima, TOPA in ka son zo hi,” ci hi.

¹²TOPA in a mite tungah, “Na meima uhte kibawl thei ngawl a, Na liammate uh kidamsak thei ngawl hi.

¹³No hong ou tu kuama om ngawl a, Na meima bawl natu uh zatui om ngawlin, na dam tu uh sia muanmawk om ngawl hi.

¹⁴Na itte theampo in no hong mangil zo a; amate in no hong awlmaw nawn ngawl hi. Keima in note sia ngal khat bangin kong sim a, na mawnate tam a, na seksolna uh lian ahikom na daan thuak uh nasia mama hi.

¹⁵Na liammate hangin phuphun nawn heak vun; Na kibawl thei buatu hi. Na mawnate tam a, na seksolna uh lian ahikom hi bangin daan kong pia hi.

¹⁶Ahihang tu in no hong valhtumte theampo kivalhtum tu a, na ngalte theampo thongtaak tu in kipaipui tu uh hi. No hong zawthawk vawtte theampo kizawthawk vawt tu a, no hong suttolte theampo sutolna thuak tu hi.

¹⁷No kong damsak kik tu hi; Na ngalte in, ‘Zion sia a kipuavawk sa khat hi a; kuama in awlmaw ngawl uh hi,’ a ci tazong na liammate ka damsak tu hi. Keima, TOPA in ka son zo hi,” ci hi.

¹⁸TOPA in, “Ka mite a ngam ka pia kik tu a, a innkuan sim tungah hesuakna ka nei tu hi; Jerusalem khuapi kisa kik tu a, a kumpi inn sia a omna ngei ma ah kikoi kik tu hi.

¹⁹Tua munah a teang mihingte in pokna lasa tu uh a; lungdam in au tu uh hi. Ka thupha piakna taw amate pung tu uh a; ka thupha piakna in amate upatna ngasak tu hi.

²⁰Nidang a, a nei vaangletna ka pia kik tu a, a minam kip takin ka phut kik tu hi; amate a zothaw theampo daan ka pia tu hi.

²¹Amate a uk tu sia amate ii minam sung pan ma in hong pai tu a, amate ii kumpitapa sia a minam sung pan ma in hong pai tu hi. Ka sam ciang ama in kei hong zuan tu hi, banghang ziam cile sam ngawlin akua hong pai ngam tu ziam? Amate sia ka mite hi tu uh a, keima in amate ii Pathian ka hi tu hi. Keima, TOPA in ka son zo hi,” ci hi.

²³TOPA ii thin uukna sia vuipi nguapi hi a, mi seksolte lu tungah kinuaingawp tu hi. Vawt tu in a tup theampo a taangtun siat mateng in ama tawlnga ngawl tu hi. Maisang hun ah a mite in hi thu telthiang tu uh hi.