Read Siyin Chin Jeremiah 31 Bible Online

Jeremiah 31 - Siyin Chin bible

Jeremiah 31

¹TOPA in, “Israel minamte theampo ii Pathian ka hi hun hong theng tu a, amate in ka mite hi tu uh hi.

²Thina pan a suakta tua mite sennealngam sungah hesuakna ka lak hi. Israel mite toithaina a thangai uh ciang,

³a khualana pan amate kungah ka kilangh hi. Israel mite awng, no kong it tawntung hi, tua ahikom itna kip kong lak tan tu hi.

⁴Khatvei ma kong pua kik tu hi. Khatvei ma na daalkual khuangnote na la kik tu uh a, lungdam in na laam tu uh hi.

⁵Khatvei ma Samaria mual tungah sapithuan na vawt kik tu uh a, tua sapit a suante in sapithuan pan a piangte ne tu nu hi.

⁶Hi hi, ngalvilte in Ephraim mualtung panin, ‘Ih TOPA Pathian kung Zion ah paito ka tawng’ ci in a sam tu hun hong theng tu hi,” ci hi.

⁷TOPA in, “Minamte sung panin a lianbel, Israel atu in lungdamin lasa vun. Pokna lasa vun, ‘TOPA in a mite ngum zo a; a taanglaite theampo suatak zo hi,’ ci vun.

⁸Keima in amate saksang pan ka paipui tu a, leimong pan ka kaikhawm tu hi. Mittaw peangbaite, numei naupaaite le nausuak dektakte zongh amate taw hong pai tu uh hi, Amate sia minam lian khatin hong cia kik tu uh hi.

⁹Ka mite lampui in ka heakpui kik laitak amate kap kawm, thungen kawmin hong heak kik tu uh hi. Tui omna lui ah amate lam ka pui tu a, lam nuamna ah amate lutu ngawl tu uh hi. Keima in Israel te ii pa khat bang ka hi a, Ephraim sia ka tapa lianbel ahi hi,” ci hi.

¹⁰TOPA in, “Minamte awng, hong ngai tavun a, ka kammalte a khuala na tuipi vaalbo ah thangsak vun. Ka mite ka thethaang hi, ahihang amate ka kaikhawm tu a, tuucing pa in a tuuhon a cin bangin ka keam tu hi.

¹¹Israel mite ka suaktasak zo a, a thahat minam khat ii khut sung panin ka hun zo hi.

¹²Amate hong pai in Zion mual tungah lungdam in lasa tu uh a, ka letsongte taw lungdam mama tu uh hi — Ka letsongte sia antang, sapittui, olive thau, tuu le khuite ahi hi. Amate sia pha tak a, tui a kibuak husuan khat taw kibang tu a; amate in a kisap theampo nei tu uh hi.

¹³Tuaciang ngaknute laam a, lungdam tu uh hi, tuaciang pasal, khangmoi, khanghaam te lawp in om tu hi. Amate ka heeneam tu a, a kaana te thinnopna, a heenate lungdamna ka suaksak tu hi.

¹⁴Thiampite an phabel taw ka vaak tu a, ka mite ii a taangsap theampo ka pia tu hi. Keima, TOPA in ka son zo hi,” ci hi.

¹⁵TOPA in, “Ramah khua ah aw khat kiza a, thin nat tatakna taw kaana aw ahi hi. Rachel sia a tate atu in kap hi; a tate om nawn ngawl a, ama sia heenep tu uuk ngawl hi.

¹⁶Kap nawn heak in a, na thituite nawl in. Na tate atu in na sep theampo thaman nga ngawlin na nguaksuak buatu hi; amate sia ngalte ii ngam panin hong heak kik tu uh hi.

¹⁷Na mai sang atu in lametna om hi; na tate inn hong cia kik tu uh hi. Keima, TOPA in ka ci zo hi.

¹⁸“Israel mite khuangai in a mau ka za hi, ‘TOPA awng, ko sia a kizual ngawl nganhing khat bang ka hi uh hi, ahihang thu ni tu in kote nong hil hi. Ko hong ciapui kik ta'n; na kungah hong cia tu in kithoai khu hi, TOPA kote Pathian awng.

¹⁹Nangma kung pan ka puapial uh hi, ahihang kong heak kik paih nuam uh hi. Daan nong piak zawkciangin khuangai in ka kun uh hi. Ka no lai a mawna khialna ka vawt uh hu in maizum, minpaan in ka om uh hi’.

²⁰“Israel awng, nang sia ka thangaibel ka tapa na hi a, ka itbel ka ta na hi hi. Na min ka law simin itna taw kong phawk hi. Nangma kong ngaisun tawntung a; kong hesuak tu hi.

²¹Lampi ah lamlaknate phutin, lampi ciamtee in; na nusiat lampi sia zong kik in. Hong heak kik tavun, Israel mite awng, na nusiat uh khuate ah hong cia kik tavun.

²²Bang tanvei haisaang tu nu ziam, upna nei ngawl mihingte awng? A thak le a tumdang na khat ka bitphua zo a, numei khat in pasal khat a sungsiat bangin tumdang hi,” ci hi.

²³Vaanglianbelpa TOPA Israel ii Pathian in, “Mihingte a ngam ka piak kik ciang, Judah ngamsung le a khuate sungah amate in, ‘TOPA in Jerusalem mual thiangtho, ama teenna mun thiangtho sia, thupha pia tahen’ khatvei ma ci kik tu uh hi.

²⁴Judah ngamsung le a khuate theampo sungah mihingte teang tu a, lothote, tuucingte, a tuuhonte taw om tu uh hi.

²⁵A ngim a toi mihingte thathak ka nguan tu a, ngilkial in, a tha zawmte theampo an ka vaak tu hi.

²⁶Tuasia ciang mihingte in, ‘Lum in ka mu a, thathak taw ka khanlaw nuam hi,’ ci tu uh hi.

²⁷“Keima, TOPA in Israel le Judah ngam sia mihingte le nganhingte taw ka kidimsak tu hun hong theng tu hi, ka ci hi.

²⁸Kidawm takin amate ka zunglok, ka kaikeak, ka lotthal, ka suksiat le ka lalsak lai bangma in kidawm takin amate ka suan kik tu a ka laamto kik tu hi.

²⁹Tua hun hong thet ciang, mihingte in, ‘Nu le pate in a thuk sapitngate ne a, Ahihang a tate a ha uh khim hi,’ ci nawn ngawl tu uh hi.

³⁰Tuabang hi ngawlin, Sapit nga thuk a ne pawpo a hakhim tu a; a kuama po ama ii mawna hangin thi tu hi,” ci hi.

³¹TOPA in, “Israel mite le Judah mite taw thuciamna thak khat ka vawt tu hun hong theng tu hi.

³²Tua thuciamna sia a taanghpupite a khut uh pan kai in Egypt ngam pan ka pusua pui lai a, a taanghpupite taw ka vawt uh thuciamna lui taw kibang ngawl tu hi. Keima sia amate ii a pasal bang hi napi amate in tua thuciamna zui ngawl uh hi.

³³Israel mite taw ka vawt tu thuciamna thak sia hi bang hi tu hi: amate sung sangah ka thukham ka koi tu a, a lungtang tungah tuate ka at tu hi. Keima in amate ii Pathian ka hi tu a, amate sia ka mite ahi tu uh hi.

³⁴TOPA a heak natu uh in amate sia a mipuite kuama ii thu hil kul ngawl tu hi, banghang ziam cile a nobel pan a lianbel dongin kei hong he siat tu uh hi. Keima in amate ii a mawnate ka maisak tu a, a khialnate ka ciamtee nawn buatu hi. Keima, TOPA in ka son zo hi,” ci hi.

³⁵TOPA in sunin khuavaksak tu in ni hong pia a, zan in a taang tu in tha le aksite hong pia hi. Ama in tuipi kiloksak in hawksak hi; ama ii min sia Vaanglianbelpa TOPA ahi hi.

³⁶Leitung paizia a kip lai theampo in, Israel sia minam khat in om tu hi ci in, kamciam pia hi.

³⁷Vantung a kitee thei ni ciang le lei ii a taw dopphate a ki ettel thei hun khat ni khat ni ciang in amate ii a sep a vawt te theampo hu in ama in Israel mite nial pheang tu hi. TOPA in ci zo hi.

³⁸TOPA in, “Hananel Tausaang panin nitumna sang Kiing Kongpi dong Jerusalem khua buppi sia keima ii khuapi in a kisak kik tu hun hong theng tu hi.

³⁹Tuaciang ngamngi sia tua mun panin nitumna sang Gareb mual dong le Goah kiimkot teng hi tu hi.

⁴⁰Mithi phumna le ninteak vawkna leikuam buppi le Kidron lui tungsia ah lote theampo, nisuana sang Siphu Kongpi ciang dong, keima a tu in mun thiangtho hi tu hi. Khuapi sia kipheltham, kisusia kik ngei nawn ngawl tu hi,” ci hi.