Read Siyin Chin Jeremiah 33 Bible Online

Jeremiah 33 - Siyin Chin bible

Jeremiah 33

¹Kumpi innhuang sungah thongtaak a ka om laitakin TOPA ii thupuak sia ka kung hong theng kik hi.

²Leitung a vawt, a piangsak le a omna munah a koi TOPA in keima hong paupui hi. A min TOPA a kici, ama in,

³“Kei nong sam uh le kong zo tu hi; a thu na heak ngawl lai a lamdangte le thu tumdangte kong son tu hi.

⁴Keima, TOPA, Israel ii Pathian in Jerusalem innte le Judah kumpi inn sia ngalte in kiim uum a, a sim hu in siatham tu hi ka ci hi.

⁵Mihing kimkhatte in Babylon te do tu uh hi, amate in ka thin uuk ka thangsiatna taw ka velvawk tu mithi luangte taw innte dimsak tu uh hi. A mite ii a tatsiatnate hu in hi khuapi ka nungngat zo hi.

⁶Ahihang hi khuapi le a mite ka puuapha kik tu hi, ciidamna amate ka pia kik tu hi. Amate a kicing thinnopna le ngammuanna ka lak tu hi.

⁷Judah mite le Israel mite ka nuamsasak tu a, nidang a om ngei bangin ka pua kik tu hi.

⁸Keima tungah hong vawt mawna khialnate panin ka thiansua tu a, amate ii mawna khialnate le hong langpannate ka maisak tu hi.

⁹Jerusalem sia kei atu in lungdamna, patoaina le kiphatsakna ii kipatna hi tu hi; leitung ah minam om theampo in Jerusalem atu na pha ka vawtnate le hi khuapi atu nopsakna ka piakna thute a zaak uh ciang, lau in liing tu uh hi,” ci hi.

¹⁰TOPA in, “Mihingte in hi mun sia, mihing zongh nganhing zongh ii teen ngawlna senneal ngam taw kibang hi ci uh hi. Amate ci bang hi peu hi; Judah khuate le Jerusalem khua lampite awngthong a; tua munah mihing zongh nganhing zongh teang ngawl hi. Ahihang hi munte ah,

¹¹Lungdam thinnuam in au nate, tuaciang mopoai ngualnopna awngingte na za kik tu uh hi. Mihingte in ka Biakinnpi ah lungdamko biakpiaknate pia in la a sak na za tu uh hi; amate in, ‘Vaanglianbelpa TOPA tungah lungdamko vun, banghang ziam cile ama pha a, ama ii hong itna kip tawntung hi,’ ci tu uh hi. Hi ngam sia nidang bangma in ka nuamsasak kik tu hi. Keima TOPA in ka son zo hi,” ci hi.

¹²Vaanglianbelpa TOPA in, “Mihing nganhing a teang ngawl sennealngam bang ahi, hi ngam sungah nganthana tu mun om kik tu a, tua munah tuucingte in a tuute cing tu uh hi.

¹³Mualtung ngam, mualpeangte le, Judah ngam thangsang, Benjamin ngamsung khuate, Jerusalem kiim a khuanote le Judah ngamsung khuate ah tuucingte in a tuute phakza khatvei ma sim kik tu uh hi. Keima, TOPA in ka son zo hi,” ci hi.

¹⁴TOPA in, “Israel le Judah mite tungah kamciam ka piak sia ka taangtunsak tu hun hong theng tu hi.

¹⁵Tua hun ciang David ii suan le paal sung pan thumaan thutang khat kumpi in ka teal tu hi. Tua kumpipa in ngamsung theampo ah thudik le thutang in a maan sia seam tu hi.

¹⁶Judah mite le Jerusalem mite sia kisuatak tu a, ngam muangin teang tu uh hi. Tua khuapi sia ‘TOPA, Eite Ngupna’ kici tu hi.

¹⁷Keima, TOPA in Israel kumpi tu in David suan le paal khat om tawntung tu a,

¹⁸Levi minam sung pan meihal biakpiaknate, antang taw biakpiakna le sangaw biakpiaknate vawtna ah ka na a seam tu in thiampite om tawntung tu hi ci sia kong kamciam hi,” ci hi.

¹⁹TOPA in keima tungah,

²⁰“A hun tek a tun simin hong pai tawntung thei natu in sun hun le zan hun taw thuciamna ka vawt zo hi; tua ahiciang tua thuciamna kiphel tan thei ngeingawl tu hi.

²¹Tuasia bangma in a suan khat kumpi a hi tawntung natu sia ka naseam David taw thuciamna khat ka vawt zo hi, tuaciang Levi minam sung pan a thiampite taw zong ka na hong sepsak tawntung natu in kiciamna khat ka vawt zo hi; tua thuciamnate kiphel tan thei ngeingawl tu hi.

²²Van ah aksite le tuipivaal ah sennealte a kisim zawk ngawl bangma in amate phakza sim zawk ngawl ahi natu in keima in ka naseampa David ii suan le paalte le Levi minam sung panin thiampite ka pungsak tu hi,” hong ci hi.

²³TOPA in keima tungah,

²⁴“Ka tealsa innkuan nii, Israel le Judah te sia keima in niil zo hi ci a mihingte ii a son na phawk ziam? Tua ahikom amate in ka mite nomu a minam khat in ngaisun nawn ngawl uh hi.

²⁵Ahihang keima TOPA in sun le zan taw thuciamna khat ka vawt zo a, lei le van a uk thukhamte ka vawt zo hi.

²⁶Hi nate ka vawt takpi bangma in, Jacob ii suan le paalte le ka naseam David taw ka vawt thuciamna sia ka len nginge tu hi. Abraham, Isaac le Jacob ii suan le paalte a uk tu in David ii suan le paalte khat ka teal tu hi. Ka mite ka hesuak tu a, ka nuamsasak kik tu hi,” hong ci hi.