Read Siyin Chin Jeremiah 35 Bible Online

Jeremiah 35 - Siyin Chin bible

Jeremiah 35

¹Josiah ii tapa Jehoiakim sia Judah ngam ah kumpi a sep lai in, TOPA in keima tungah,

²“Rechab ii bee le phungte kungah va pai ta'n a paupui ta'n. Tuaciang Biakinnpi sung inndoi khat ah amate paipui in sapittui pia in,” hong ci hi.

³Tuaciang Rechab ii bee le phungte a vekpi — (Habazziniah ii tapa ahi a dang Jeremiah ii tapa) Jaazaniah le a suapuipate theampo le a tapate theampo —

⁴Biakinnpi ah ka paipui hi. Igdaliah ii tapa kamsaang Hanan ii nungzuite ii inndoi sungah amate ka paipui hi. Hi inndoi sia Biakinnpi sungah ulian thupi khat ahi, Shallum ii tapa Maaseiah ii inndoi tungah om a, ulian dangte ii inndoite taw zong kinai hi.

⁵Tuaciang sapittui taw a kidim hai le kuangte sia Rechab mite mai ah ka lui a, amate tungah, “Sapittui ne vun,” ka ci hi.

⁶Ahihang amate in, “Sapittui ne ngawl khu hi. Ka taanghpupi uh Rechab ii tapa Jonadab in eima ih hizong ih suan ih paalte ahizong sapittui peuma ih ne ngei buahet tu hi hong ci hi.

⁷Ama in inn sa heak vun, lotho heak vun, sapithuan vawt heak vun ahibuale tuate lei heak vun hong ci lai hi. Kote khualmi bangin ka teenna uh hi ngam sungah ka om suak thei natu in puanbuk sungah ka ten tawntung natu thu hong pia hi.

⁸Jonadab ii kote thu hong hilna theampo ka zui uh hi. Koma mama in sapittui ka ne ngei bua uh a, ka zite, ka tapate, ka tanute zongh in a ne ngei bua uh hi.

⁹Ko ten natu in inn ka sa bua uh a — puanbukte sungah teangin — sapithuante, lote, ahibuale an zongh ka nei bua uh hi. Kote taanghpupi Jonadab ii hong sawl theampo ka seam siat uh hi.

¹¹Ahihang Nebuchadnezzar kumpipa in hi ngam a sim ciang Babylon le Syria ngalkaphonpite a pial tu in Jerusalem khua zot tu ka khensat uh hi. Tua hu in Jerusalem ah ka teang uh hi,” ci in zo hi.

¹²Tuaciang Vaanglianbelpa TOPA, Israel ii Pathian in, va pai ta'n a Judah mite le Jerusalem mite tungah “Keima, TOPA in, banghangin ka thu ngai nuam ngawl a kong thupiakte mang nuam ngawl nu ziam ci in no kong dongh hi.

¹⁴Sapittui neak ngawl natu in Jonadab ii a thupiak sia, a tu a tate in zui a, tuni ciang dong kuama in ne ngawl hi. No tungah kong sawson hangin, ka thu nong ni bua uh hi.

¹⁵Ka naseam kamsaangte theampo kong puak tawntung zo a, na ngamtatna a siate kheal in a maan sia nasep natu hong son zo uh hi. Noma le na taanghpupite tungah kong piaksa ngam sungah na ten top thei natu uh in, pathian dangte bia ngawl, a na seam ngawlin na kidop natu uh thu hong hil khol hi. Ahihang note in ka thu nong ngai nuam bua uh a nong awlmawk bua uh hi.

¹⁶Jonadab ii tu le tate in a taanghpupite ii thupiakna mang uh hi, ahihang note in ka thu nong ni bua uh hi.

¹⁷Tua ahikom tu in, Keima, Vaanglianbelpa TOPA, Israel ii Pathian in no, Judah mite le Jerusalem mite tungah ka kamciamsa suksiatna theampo kong tungsak tu hi. Hi bangin note kong vawt tu hi, banghang ziam cile thu kong son ciang nong ngai bua uh a, kong sam ciang nong zo bua uh hi,” a ci teng a son tu in kei hong sawl hi.

¹⁸Tuaciang, Vaanglianbelpa TOPA, Israel ii Pathian in Rechab bee le phung tung ah, “Na taanghpupi Jonadab ii hong thupiak sia na mang zo uh a; hong thuhil nate theampo zui in, hong sawl theampo na seam zo uh hi.

¹⁹Tua ahikom, Keima, Vaanglianbelpa TOPA, Israel ii Pathian in a na a seam tu sia Rechab ii tapa Jonadab suan le paal pa khat nei tawntung tu in kong kamciam hi,” ci in son hi.