Read Siyin Chin Jeremiah 37 Bible Online

Jeremiah 37 - Siyin Chin bible

Jeremiah 37

¹Babylon kumpipa Nebuchadnezzar in Josiah ii tapa Zedekiah sia Jehoiakim ii tapa Jehoiachin taangin Judah ngam kumpi in koi hi.

²Ahihang Zedekiah, a uliante le mipite in TOPA ii ka tungah thu hong piak sia mang nuam ngawl uh hi.

³Ih minam luangin TOPA ih Pathian tungah keima sia thungen tu hong sawl tu in, Zedekiah kumpipa in Shelemiah ii tapa Jehucal le Maaseiah ii tapa thiampi Zephaniah hong paisak hi.

⁴Tualai hunin thong sungah kei hong kikhum ngawl lai a, mihonpite sungah ka vak kawkoai thei lai hi.

⁵Babylon ngalkaphonpi in Jerusalem kiim uum zo uh hi, ahihang Egypt ngalkaphonpi in Egypt ngamngi kaantan zo hi ci thu a zaak uh ciang amate nungkin kik uh hi.

⁶Tua zawkciang TOPA, Israel ii Pathian in,

⁷Zedekiah tungah son tu in hi bangin keima hong sawl hi, “Egypt ngalkaphonpi sia nangma hong hu tu in hong pai a, ahihang a ngam ah heak kik tu uh hi.

⁸Tuasia ciang Babylon te hong pai kik tu a, Jerusalem khuapi simin, la in, mei taw haltum tu uh hi.

⁹Babylon te hong pai kik nawn ngawl tu hi ci a na ngaisut thak ngawl natu, noma le noma na kitheam ngawl natu, Keima, TOPA in kidop natu thu kong hilkhol hi, banghang ziam cile amate hong pai kik nanak tu hi.

¹⁰Babylon ngalkap buppi na zo zong, a taanglai a liamte bekma puanbuk sungah lum lai ahi hial uh zong, tuate ma hong thoto veve tu a, hi khuapi haltum tu uh hi.”

¹¹Egypt ngalkaphonpite hong nai hu in Babylon ngalkaphonpi sia Jerusalem pan nungkin hi.

¹²Ka inn kuan neisa teng sung pan ka nga tu ka tel la tu in Jerusalem khua pan dingin Benjamin ngam ah ka pai hi.

¹³Ahihang Benjamin Kongpi ka thet ciang tualai ah kongpi cing ngalkapte a uk bupa, Shelemiah ii tapa, Hananiah ii tupa Irijah in ka pai tu hong khaam a, “Babylon te kungah a taiku hi ngawl ni ziam?” hong ci hi.

¹⁴“Tuabang hi ngawl hi! Tai ku ngawl khi hi,” ci in ka zo hi. Ahihang Irijah in ka thuson hong ngai bua hi. Ama in kei hong manin uliante kungah hong paipui zawsap hi.

¹⁵Amate ka tungah thin uuk mama in hong saatsak in zum thuzeakpa Jonathan ii inn, thonginn a, a kivawt inn sia sungah hong khum in taw hong kalhcip uh hi.

¹⁶Leinuai inndoi khat sungah kei hong khum a, tua munah khuangei hialma hong koi hi.

¹⁷Tua zawkciang Zedekiah kumpipa in keima hong sam a, kumpi inn sungah ama in, “TOPA kung panin bang thu hong pai ziam?” ci in kei hong dongh tuam hi. “Thu om hi” ci in ka zo a, “Nang sia Babylon kumpipa khut sungah hong ki aap tu hi,” ci in ka son belap hi.

¹⁸Tua zawkciang keima in, “Thong sungah nong khum natu in nangma tungah ahizong na uliante tungah ahizong, hi mipite tungah ahizong bang khialna lian vawt khi ziam?

¹⁹Babylon kumpipa in nang le hi ngam hong sim ngawl tu hi ci a, nang tungah hong son, na kamsaangte bang tat ziam?

²⁰Tu in Kumpipa awng, ka thu son nong ngai natu le kong nget sia nong vawtsak natu in hesuak kong ngen hi. Nong hesuakna in Jonathan ii inn thong sungah hong puak kik heak in. Nong puak kik ahile, tua munah thi takpi tu khi hi,” ka ci hi.

²¹Tua ahikom Zedekiah kumpipa in kumpi innhuang sungah kei hong kikhum natu in thu hong pia hi. Tua munah ka om a, khua sungah anluum a bo siat dong ni simin anluum lum khat veu anluum vawtna panin kei hong kipia hi.