Read Siyin Chin Jeremiah 38 Bible Online

Jeremiah 38 - Siyin Chin bible

Jeremiah 38

¹Mattan ii tapa Shephatiah, Pashhur ii tapa Gedaliah, Shelemiah ii tapa Jehucal, le Malchiah ii tapa Pashhur te in mipite tungah,

²TOPA in, “Khuapi sungah a om suak peuma ngal taw ahibuale kialpi taw, ahibuale natna taw in thi tu uh hi. Ahihang pusuak in Babylon te khut sungah a tum pawpo kithatlum ngawl tu a; a nuntakna beak peuma suatak tu hi, ci hi,” ci a ka son sia za uh hi.

³TOPA in, “Keima in hi khuapi sia Babylon ngalkaphonpi khut sungah ka pia tu a, amate in la tu uh hi,” a ci sia zongh amate tungah ka son si hi.

⁴Tua zawkciang uliante sia kumpipa kungah pai in, “Hisia pa thisak kul tu hi. Hi bang a, a pau hu in khuapi sungah a om ngalkapte le khuapi sungah a taanglai midangte theampo sia thin kiamsak uh hi. Ama in mihingte hu tu hanciam ngawl a; nasak nuam bek hi,” ci uh hi.

⁵Zedekiah kumpipa in, “Tua ahile pha mama hi. Na vawt nop bang po in ama vawt vun; hong khak thei ngawl khi hi,” ci in zo hi.

⁶Tuaciang amate in kei hong paipui a, kumpi innhuang sungah a om, kumpipa tapa Malchaiah ii tuikhuk sungah khau taw hong khiasuk uh hi. Tuikhuk sungah tui om ngawlin, buan bek om a, tua buan sungah ka tumsuk hi.

⁷Ahitazong, kumpi inn sungah na a seam Ethiopia mi cilnge sa Ebedmelech in amate ii tuikhuk sungah hong khiak thu za hi. Tua laitakin kumpipa sia Benjamin Kongpi ah thukhen a, a to laitak ahi hi.

⁸Tua ahikom Ebemelech sia tua munah pai in kumpipa tungah,

⁹“Kumpipa awng, hi mihingte ngamta khial hi. Amate in Jeremiah sia tuikhuk sungah khia uh a, tua munah ngilkial in thi tu hi, banghang ziam cile khua sungah an om nawn ngawl hi,” ci hi.

¹⁰Tuaciang kumpipa in Ebedmelech sia mihing thum taw paikhawmsak a, ka thi ma in tuikhuk sung pan keima hong laak kik natu in thupia hi.

¹¹Tua hikom Ebedmelech sia tua mihingte taw kumpipa inn sung vanh kholna inndoi ah pai a puansia pawlkhat la in, keima omna tuikhuk sungah tuate khau taw hong khiaksuk hi.

¹²Khau ii hong hiat ngawl natu in ama in ka lenuai ah puansia dapin hong sawl hi. Hong sawl bangin ka vawt a,

¹³tuasia ciang amate in tuikhuk sung panin kei hong kaito in hong pusua hi. Tua zawkciang kumpi innhuang sungah kei hong keam hi.

¹⁴Khatvei ciang in Zedekiah kumpipa in Biakinnpi tumna a thumna sia ah hong sam a, ama in “Thu khat kong dongh tu a, thumaan sia hong son siat lete ka oai hi,” hong ci hi.

¹⁵Keima in, “Thumaan sia hong son leng, nong that tu a, ngaisutna hong pia leng le, nong ngai buatu hi,” ci in ka zo hi.

¹⁶Tuasia ciang Zedekiah kumpipa in, “Nang kong that buatu a, nang hong that nuam mite khut sungah kong aap buatu hi ci in eite nuntakna hong pia Pathian, a nungta Pathian min taw ka kiciam hi,” ci in hong kamciam hi.

¹⁷Tuasia ciang Zedekiah tungah Vaanglianbelpa TOPA Israel ii Pathian in, “Babylon kumpipa ii uliante khutnuai ah na tum le, na nuntakna hong kikhoaikhe tu a, hi khuapi kihaltum ngawl tu hi. Nangma le na innkuanpuite kikhoaikhe khawm tu hi.

¹⁸Ahihang na tum bua le, hi khuapi sia Babylon te khut sungah ki aap tu a, amate in haltum in amate ii khut sung panin na suakta buatu hi,” a ci teng ka son hi.

¹⁹Ahihang kumpipa in, “Babylon te kungah a tai ih ngammite ka kiita hi. Amate ii khut sungah kei hong ki aap thei tu a, hong vawtsia tu uh hi,” ci in zo hi.

²⁰Keima in, “Nang sia amate khut sungah hong ki aap ngawl tu hi. TOPA ii thupuak sia na nit natu in hesuak kong ngen hi; tua hile na theampo nang atu in pha tu a, na nuntakna hong kikhoaikhe tu hi.

²¹Ahihang a khutnuai ah na tum nuam buale bang hong piang tu ci sia TOPA in ka mukholna sungah hong lak zo hi.

²²Tua ka mukholna ah Judah kumpi inn sungah a kinusia numeite theampo Babylon kumpipa ii uliante kungah a kipaipui ka mu hi. Amate a pai kawmin, a thusonte ngai vun: ‘Kumpipa ii lawm phabelte in ama lampui khial a, amate in ama zothaw hi. Tuaciang tu in ama peangte buan sungah tumsuk zo a, a lawmte in ama nusia zo uh hi,’ ci uh hi.” ka ci hi.

²³Tua zawkciang keima in, “Na zite le na tate theampo sia Babylon te kungah kipaipui tu a, nang zongh na suakta buatu hi. Nang sia Babylon kumpipa in thong hong taksak tu a, hi khuapi sia mei taw kihaltum tu hi,” ka ci lai hi.

²⁴Zedekiah in, “Hi ih kipaupuina thute kuama in hesak heak in, tua hile na nuntakna lauhuai ngawl tu hi.

²⁵Nang taw thu ka son hunlam uliante in hong za thong le, amate hong pai in ih thusonte hong dongh tu uh hi. A vekpi in nong son le kong that buatu hi ci in amate in hong kamciam tu uh hi.

²⁶Thong sungah a thi tu in hong puak kik ngawl natu in ka ngen hi ci bek po in,” ci in hong zo kik hi.

²⁷Tua zawkciang uliante theampo hong pai in thu hong dongh a, kumpipa hong sawl bang tatak ma in amate tungah ka son hi. Amate ii vawt thei tu bangma dang om ngawl hi, banghang ziam cile ka kipaupuina hong za ku kuama om ngawl hi.

²⁸Jerusalem khua a kilaak ni dong kumpi innhuang sungah kei hong keam hi.