Read Siyin Chin Jeremiah 4 Bible Online

Jeremiah 4 - Siyin Chin bible

Jeremiah 4

¹TOPA in, “Irsael mite awng, na kiheak nuam uh le, kei kungah hong heak kik tavun. Ka tungah nong thumaan a, ka ngaimawk milimte na vawk uh le,

²ka min suang a na kiciam tu uh sia no atu in a maan hi tu hi. Tuasia ciang minam theampo in amate thupha ka piak natu hong ngen tu uh a, kei hong pok tu uh hi,” ci hi.

³TOPA in Judah mite le Jerusalem khua mite tungah, “Na thaw ngawl lai uh lote tho vun; ling kawm sungah na anciite poai heak vun.

⁴No, Judah mite le Jerusalem khua mite awng, na TOPA ahi keima taw na vawt uh thuciamna sia keamcing vun a, ka tungah hong ki aap tavun. Tuabangin na hi bua uh le, a siate na vawtna uh hu in ka thin uukna sia mei bangin kuang tu hi. Tuasia kuangin tua meikuang a mit tu kuama om ngawl tu hi,” ci hi.

⁵Ngamsung theampo ah lemle tum vun! A nging le a kitelthiangin au vun! Judah mite le Jerusalem khua mite tungah a muanhuai khuapite ah a tai natu son vun.

⁶Zion paina lampi hil vun! Na suatak natu in tai vun! Haisaang heak vun! TOPA in saksang panin tuasiatna le suksiatna lian hong puak hi.

⁷Tawpi khat in a bukna mun pan hong pai bangin, ngamte a siasak tu khat hong kuan zo hi. Judah susia tu in ama hong pai hi. Judah ngam khuapite a siacip in kinusia tu a, kuama teang ngawl tu hi.

⁸Tua ahiciang khau-ip puan silh in, kapin tau vun banghang ziam cile TOPA thin uukna sia Judah panin puapial ngawl lai hi.

⁹TOPA in, “Tua ni ciang kumpite le uliante a thin kiam tu uh hi; thiampite ingh dimdum tu uh a, kamsaangte in lamdang sa mama tu uh hi,” ci hi.

¹⁰Tuasia ciang keima in, “Vaanglianpipa TOPA awng, Jerusalem mite theam vawk zo ni hi! Kilemna om tu hi ci zo ni hi, ahihang amate ii longtawl ah namsau khat na tuuk nginge hi,” ka ci hi.

¹¹Vui a sa mama khat sennealngam panin Jerusalem mite sangah hong va tu hi cina thu sia Jerusalem mite tungah a kison tu hun hong theng zo hi. Tua vui sia anvaaite a mut keak vui bang bek hi ngawl tu a —

¹²TOPA ii sawlna taw a va vui sia tuasia sangin thahat zaw tu hi! A mite tungah thukhenna a pia sia TOPA ama mama ahi hi.

¹³En vun, meeite bangin ngal hong pai hi. Amate ii siphu ngalleangte sia suumpei taw kibang a, a siphute sia muvanlaite sangin ngang zaw uh hi. Ei a lel ih hi hi! Ei a lal ih hi hi!

¹⁴Jerusalem awng, na thinsung panin ngitlona silthiang in, tua hile nang hong kingum thei tu hi. Na thinsung ah maw nopna thin bang tanvei ngaisun tu ni ziam?

¹⁵Dan khuapi le Ephraim mualte tung pan hong pai kamtaite in thusiate zasak uh hi.

¹⁶A khuala ngam khat panin ngalte hong paina thu, Jerusalem tungah son tu le minamte kidop natu hilkhol tu in amate hong pai uh hi. Hi ngalte in Judah ngamsung khuapite ausan tu uh a,

¹⁷mihingte lo hung bangin Jerusalem kiim uum tu uh hi, banghang ziam cile a mite in TOPA a langpan hang ahi hi. TOPA in ci zo hi.

¹⁸Judah awng, na nuntakna zia le na nasepna sate taw in hi thu nangma tung ma na then hi. Na mawna in hi thuakna piangsak zo a; tua in na lungtang hollet hi.

¹⁹Na hi! A na ka thuak zo bua hi! Ka lungtang! Ka lungtuk ngam vasat hi! Thim khipkhep in ka ommuang thei bua hi; lemle aw le ngal simna aw ka za hi.

²⁰Tuasiatna khat zawkciang khat hong theng a; ngamsung buppi kisia siat hi. Thakhat thu in ih bukte kilalsak hi; a puankhaite ki eaukeak hi.

²¹Bang tanvei ngal kisim lialua ka mu lai tu ziam, bang tanvei lemle tum ka za lai tu ziam?

²²TOPA in, “Ka mite mawmaw uh hi; amate in kei hong he ngawl uh hi. Amate sia patang mawmawte bang hi uh a; tel theina bangma nei ngawl uh hi. Amate a sia vawt tu thiam a, a pha vawt thei ngawl uh hi,” ci hi.

²³Leitung ka en a — tulin kolh thong hi; van ka en a — khuavak om ngawl hi.

²⁴Mualliante ka en a — tuate liing hi, tuaciang mualnote kivei kawkoai hi.

²⁵Khua ka et le mihing kuama om ngawl a; vacimte ngawngawn leang siat zo uh hi.

²⁶Lo ngam leiphana teng sennealngam suak zo a; TOPA ii thin uuk mama na hu in a khuapite kisia cip hi.

²⁷( TOPA in leitung buppi duisung ngampa suak tu hi ci hi, ahihang siacipsak ngawl tu hi.)

²⁸Leitung sia naangin kap tu a; van sia zing vanuai tu hi. TOPA ii sonsa hi a, a thin kheal kik ngawl tu hi. Ama in a khensat sa hi a, kheal kik ngawl tu hi.

²⁹Siphu ngalkapte le thal toai ngalkapte ii ngin a zaak uh ciang mihing theampo tai keak tu uh hi. Pawlkhat sia ngam tawnghtol sungah tai tu a, a dangte suang kawm ah kaato tu uh hi. Khua theampo a hawm nguakin kinusia tu a, tua khuate sungah kuama teang kik ngawl tu hi.

³⁰Jerusalem awng, nang a lal na hi hi! Banghangin puansan silh ni ziam? Banghangin suangmanpha kizepnate aw in na mitte ngelh ni ziam? Nangma le nangma a hoi a na kizepnate luithawthong hi! Na lawmngaite in nang hong nial zo a nang hong that nuam hi.

³¹Numei khat nautun a, a kap bang aw khat ka za hi, taciil a suak numei khat ii cik-au taw kibang hi. Tua in Jerusalem ii hu sam saa a, a kaana ahi hi, a khut zan in, “Kei a lal hi ing! Keima that tu in amate hong pai hi!” ci hi.