Read Siyin Chin Jeremiah 44 Bible Online

Jeremiah 44 - Siyin Chin bible

Jeremiah 44

¹Egypt ngamsung Migdol, Tahpanhes, Memphis khuapite le Egypt ngam thang sangah a teang Israel te theampo taw kisai in TOPA in kei tungah thu hong son hi.

²Vaanglianbelpa TOPA Israel ii Pathian in, “Jerusalem khuapi tung le Judah ngam khuapi dangte theampo ii tungah suksiatna ka thetsak sia noma mama in na mu zo uh hi. Tua khuapite sia tu dong ma in siacip lai a, kuama teang ngawl hi,

³banghang ziam cile tua khua mite in a sia vawtin ka thin hong uksak uh hi. Amate ahizong noma na hi uh zong, na taanghpupite ahizong ii biak ngeingawl pathian dangte tungah amate in biakpiakna pia in a na seam uh hi.

⁴Ka naseam kamsaangte note kungah tatsat ngawlin kong paisak a, amate in ka ngaimawk a lauhuai, hi na sia na vawt ngawl natu in note hong son uh hi.

⁵Ahihang note in ngai ngawlin nadon ngawl nu hi. Pathian dangte tungah a sia biakpiakna na vawt uh sia na kheal nuam bua uh hi.

⁶Tua ahikom ka thin uukna le ka thinsona sia Judah ngam khuate le Jerusalem lampite tungah ka buak a, tuate sia mei taw ka hal hi. Tuni a na mu uh bangma in tuate sia a kisiacip in om a, a lipkhaphuai suak hi.

⁷“Tua ahikom Vaanglianbelpa TOPA, Israel ii Pathian keima in, banghang tuabang thusia khat noma le noma tungah vawt nu ziam ci in tu in kong dongh hi. Na mite kuama a kikheet ngawl natu in, pasal, numei, patang le nausente tungah siatna thengsak nuam nu ziam?

⁸A teang tu in na thetna uh hi Egypt ngamah, na milim biakna le a dang pathiante tungah na biakpiakna uh taw in banghangin kei hong thin uuksak nu ziam? Leitung minam theampo in no hong nunau natu le kihaamsiatna in na min a zak natu in noma le noma na kisiatsak natu bekin hisia vawt nu ziam?

⁹Judah ngam khuate sung le Jerusalem khua lampi tungah na taanghpupite, Judah kumpite le a zite, noma le na zite ii a sia theampo na vawt uh sia mangil zo nu ziam?

¹⁰Ahihang tuni dong ciang noma le noma na kiniamkhiak bua uh hi. Keima zatakna nong nei bua uh a, noma le na taanghpupite tungah kong piak thukham theampo bangin na nungta bua uh hi.

¹¹“Tua ahikom, Vaanglianbelpa TOPA Israel ii Pathian keima in, note kong langpan tu a Judah ngam theampo ka susia tu hi.

¹²A taanglai Judah mite, Egypt ngam ah pai in teen tatak tu a thin khensat teng sia ka lalcipsak siat tu hi. A lian a no amate a vekpi in Egypt ngam ah ngalsung ahibuale kialpi taw in thi tu uh hi. Amate sia mihingte muna ah a lauhuai suak tu uh hi, amate kinunau tu a, a min uh kihaamsiatna in zangh tu uh hi.

¹³Jerusalem daan ka piak bangma in Egypt ngam ah a teang mihingte ngal, kialpi le natna taw in daan ka pia tu hi.

¹⁴Judah mi a taanglai, Egypt ngam ah teang tu a hong paite kuama suakta ngawlin nungta ngawl tu uh hi. Khatvei a ten kik nopna mun Judah ngam ah kuama heak kik ngawl tu uh hi. Ngaltai tawmno simngawl kuama heak kik ngawl tu hi,” ci hi.

¹⁵Tuaciang a zite in pathian dangte tungah biakpiakna a nei hunlam a he pasal theampo le tua munah a ding numei theampo a kipan Egypt ngam thang sangah a teang Israel te — tua mihonpi in — keima tungah,

¹⁶“TOPA min suangin thu nong sonte hong ngai nuam ngawl khu hi.

¹⁷Vawt tu ka cite theampo ka vawt tu uh hi. Koma le ka taanghpupite, kumpipa le lampuite in Judah ngam khuate le Jerusalem khua lampite ah ka vawt ngei uh bangma in, kote numeipathian Vantung Kumpinu tungah sangaw biakpiakna pia in, ama tungah biakpiakna sapittui ka buak tu uh hi. Tuasia ciang an hau in, nuamsa in, ngimna ka nei bua uh hi.

¹⁸Ahihang Vantung Kumpinu tungah sangaw biakpiakna nei nawn ngawl a, biakpiakna sapittui ka buak nawn ngawl uh hun pan kipan bangma ka nei nawn bua uh hi, ka mite sia ngal le kialpi taw in thi uh hi,” hong ci uh hi.

¹⁹Tuaciang numeite in, “Vantung Kumpinu ii lim taw kibang moh vawt a, biakpiakna pia in sapittui ama tungah ka buak uh ciang koma ngamtatna sia ka pasalte a lungkim uh hi,” ci lai uh hi.

²⁰Tua zawkciang ka pauna hi bang a hong zo kik pasalte le numeite theampo ii tungah keima in,

²¹“Noma le no ii taanghpupite, kumpipate le lampuite, ngamsung mipite vawt Judah khuate le Jerusalem khua lampite tungah na biakpiakna uhte TOPA in he ngawl ahibuale a mangilin ngaisun nu ziam?

²²Tuni mama in na ngam uh sia a lalcip sa in om a, a sungah kuama teang ngawl hi. Na seksolna uh le a sia na vawtna uhte TOPA in thuak zo nawn ngawl ahikom na ngam uh sia a lipkhaphuai mun suak a mihingte in a min sia kihaamsiatna in nei uh hi.

²³TOPA ii hong thupiakte theampo ni ngawlin ama tungah na maw uh hang le milim pathian dangte tungah biakpiakna na piak uh hu in hi bang tuasiatna no tungah hong theng hi,” ka ci hi.

²⁴Keima in mihingte theampo, a tuan in numeite tung ah, Egypt ngamsung a teang Judah mite tungah Vaanglianbelpa TOPA, Israel ii Pathian ii a ci sia ka son hi: “Noma le na zite in Vantung Kumpinu kungah a ciliap huai kamciamte na pia zo uh hi. Ama ii tungah sangaw biakpiaknate le biakpiakna sapittui na buak natu in na kamciam zo a, tua kamciam len tu in na kamciam zo uh hi. Tua ahile, pha hi! Na kamciam uh len vun! Noma kamciam bangin seam vun!

²⁶Ahihang Keima, TOPA in Egypt ngam ah a teang no Israel mite theampo tungah a vaanglian ka min taw kamciam ka piak sia, tu in ngai vun: ‘A nungta Vaanglianpipa TOPA taw ka kiciam hi!’ ci in note khat pawpo kiciam natu in ka min kong zanghsak kik ngei buatu hi!

²⁷Note a nuamsa ngawlin kong vawt tu hi, bek dom ngawlin kong susia tu hi. Note khat zongh kikhe ngawlin, ngal taw ahizong, natna taw ahizong na lalcip tu uh hi.

²⁸Ahihang note tawm bek thina pan na suakta tu uh a, Egypt ngam panin Judah ngam ah na heak kik tu uh hi. Tuasia ciang a nungta laiteng in akua ii kammal sia taangtung zo a maan ziam, keima kammal maw, amate ii kammal, ci sia he tu uh hi.

²⁹Hi munah daan kong pia tu a, tuaciang note tungah siatna kong thengsak tu hi ci a ka kamciam sia a taangtun takpi na Keima, TOPA in note kong lak tu hi.

³⁰Judah Kumpipa Zedekiah sia ama a thatlum nuam a ngalpa Babylon kumpipa Nebuchadnezzar tungah ka aap bangma in, Egypt kumpipa Hophra sia ama a thatlum nuam a ngalte khut sungah ka aap tu hi,” hong ci hi.