Read Siyin Chin Jeremiah 48 Bible Online

Jeremiah 48 - Siyin Chin bible

Jeremiah 48

¹Vaanglianbelpa TOPA in Moab ngam taw kisai hi bangin ci hi: “Nebo khua mite hesuak vun — a khua kisusia hi! Kiriathaim khua kila zo a, a kulh lianpi kipheltham zo hi, a mite maizum kingasak zo hi;

²Moab ngam ii a hoina teng bo zo hi. Ngalte in Heshbon la zo a, Moab minamte suksiat tu sawm ku uh hi. Madmen khua kithimsak tu a; ngalkaphonpi in tuanhcil tu uh hi.

³Horonaim mite in, ‘Ngoltolna! Kisuksiatna!’ ci in au uh hi.

⁴“Moab sia kisusia zo hi; patangte kaana aw ngai vun.

⁵Luhith mual kaatona lam tawntung ah amate naangin a kaana awte, Horonaim khuapi paisukna lampi ah ngimin khamin a kaana awte ngai vun.

⁶‘Manlang vun, na suatak natu uh in tai vun! Sennealngam a om ngam laate bangin tai vun!’ amate in ci uh hi.

⁷“Moab awng, na hatna le na hauna na suang hi, ahihang tu in nang ngawngawn hong kizo tu a; na pathian Chemosh sia a kumpi tapate le a thiampite taw saltaang khawm tu uh hi.

⁸Khua khat beak zongh suksiatna pan suakta ngawl tu a; mualkuam le zaangtam zong kisiasak khawm tu hi. Keima, TOPA in ka ci zo hi.

⁹Moab atu in thaansuang khat phut vun; hai ngawlin kisia tu hi. A khuate a sia in kinusia tu a, tuasung ah kuama teang kik ngawl tu hi,” ci hi.

¹⁰(A thin theampo taw TO PA ii na a seam ngawl pa sia haamsiat vun! Mihing a vaattan ngawl, a that ngawl pa haamsiat vun!)

¹¹TOPA in, “Moab sia thin muangin om tawntung a, ngamdang ah sal kitangsak ngeingawl hi. Ama sia beal khat pan beal khat sungah a kisung ngeingawl a omcing sapittui taw kibang hi. A ngim lal ngeingawlin lim tawntung hi.

¹²“Tua ahiciang tu in sapittui bang a Moab mite a sungkeak tu in mihingte ka paisak hun hong theng tu hi. Amate in a sapit beal hawmsak tu a, tua zawkciang sutham tu uh hi.

¹³Tuasia ciang Israel mite ii up le muan Bethel pathian a upkhialna pan a maan mu uh a, a thinkiam bangma in Moab mite zongh, Chemosh a pathian huvau in a thinkiam uh hi.

¹⁴“Moab mite awng, banghangin ngalhangte ka hi uh a, ngalsim thiam ngalkapte ka hi uh kici nu ziam?

¹⁵Moab le a khuapite kisiasak zo a; a tangval a taktaibel teng kithatlum zo hi. Keima sia kumpipa, Vaanglianbelpa TOPA ka hi hi, tuaciang keima in ka ci zo hi.

¹⁶Moab ngam ii lal tu nai zo a; a siat natu hong theng pal tu hi.

¹⁷A nai ah a teangte le a minthanna a he mihingte theampo awng, Tua ngam atu in khuangai vun. ‘A nasia mama a ngamukna vaang bo zo a, a minthanna le a vaangletna om nawn ngawl hi,’ ci vun.

¹⁸No, Dibon khua ah a teangte awng, na minphatna mun panin hong tuaksuk tavun a leivui sungah hong to tavun; Moab a siasak pa sia hi sungah om a, a kulhte siacip in nusia zo hi.

¹⁹Aroer khua ah a teang note awng, lamhui ah dingin ngak vun; a taikeak mihingte tungah bang thu piang ziam ci sia dongh in he vun.

²⁰‘Moab puk zo hi, tuasia atu in kap vun; mindaina thuak hi. Moab ngam kisiatna thu sia Arnon ngundung ah taangko vun!’ ci in amate in hong zo tu uh hi.

²¹“Mual zaangtam tungah a om khuapite; Holon, Jahzah, Mephath,

²²Dibon, Nebo, Beth Diblathaim,

²³Kiriathaim, Bethgamul, Bethmeon,

²⁴Kerioth le Bozrah te tungah thukhenna theng zo hi. A khuala le a nai a om Moab ngam khuapite theampo ii tungah thukhenna theng zo hi.

²⁵Moab ii thahatna kisucip zo a; a vaangletna kisiasak zo hi. Keima, TOPA in ka son zo hi,” ci hi.

²⁶TOPA in, “Moab vaisak vun, banghang ziam cile ama in kei hong langpan hi. Moab sia ama luak sungah leiliik tu a midangte nui tu uh hi.

²⁷Moab awng, Israel mite na nunau sia phawk in. Mihing suamte pawl taw a kiman khawm bangin amate na vawt uh hi.

²⁸“No, Moab ngam ah a teang mite awng, na khua uh nusia vun! Pai in liangtung ah teang vun! Liangmai ah bu a vawt vakhu sia taw kibang tavun.

²⁹Moab sia kiphasak mama hi! A mite kiphatsakna, a kisak theina, a kiletsakna le bang zata amate le amate kithupi ngaisut ziam ci thute ka za zo hi.

³⁰Keima, TOPA in amate ii a kihisakna thu ka he hi. Amate ii kisuantaakna sia bangma penh zo ngawl a, a vawtnate sia ngei kho ngawl tu hi.

³¹Tua ahikom Moab ngamsung a om mi sim atu le Kir Heres mite atu in ka kap tu hi.

³²Jazer mite atu sangin Sibmah mite atu in ka kaana nasia zaw tu hi. Sibmah khuapi awng, nangma in a baakte Tuipi Thi kaantan a, Jazer ciang dong a zaam sapitkung khat taw na kibang hi. Ahihang tu in na khaal thingngate le na sapitngate kisusia zo hi.

³³Lungdamna le thinnopna sia Moab ngam leiphana panin kila zo hi. Sapit ngoaina panin sapittui a luan ka tawpsak hi; sapit um a lungdam in a au tu kuama om ngawl hi.

³⁴“Heshbon khuamite le Elealeh mite kap uh a, a kaana aw sia Jahaz ciang dongin kiza thei hi; tua kaana aw sia Zoar khua mite in za thei uh a Horonaim le Eglath Shelishiyah khuate dongin kiza hi. Nimrim lui ngawngawn kang zo hi.

³⁵Moab mite sia a biakna munte ah meihal biakpiaknate le a pathiante tungah a sangaw biakpiaknate a piak ngawl natu in ka khaktan tu hi. Keima, TOPA in ka ci zo hi.

³⁶“Tua ahikom mithi vuina taamngai a tum khat bangin Moab atu le Kir Heres mite atu in ka khuangai hi; banghang ziam cile a neisa theampo a bo siat hang ahi hi.

³⁷Amate a vekpi a sam le a khamulte meet uh hi. Amate a vekpi in a khut ki at uh a, mi simin khau-ip puan silh hi.

³⁸Moab ngamsung innkhum theampo le taangpi khawlmun theampo ah khuangaina ci ngawl bangma dang om ngawl hi, banghang ziam cile kuama dei ngawl thambeal khat bangin Moab ka sutham zo hi.

³⁹Moab ngam kitamhtham zo hi! Kap vun! Moab kimaimawlsak zo hi. Moab kisiacip zo a, a kiim a paam minamte theampo in nuisan uh hi. Keima, TOPA in ka son zo hi,” ci hi.

⁴⁰A tha a phalh muvanlai khat bangin minam khat sia Moab ngam tungah hong suktun tu hi ci in TOPA in kamciam zo hi,

⁴¹tuaciang a khuate le a kulhte kila tu hi. Tua ni in Moab ngalkapte sia numei nausuak tu khat bangin patau tu uh hi.

⁴²Moab sia kisusia tu a, minam khat suak zo nawn ngawl tu hi, banghang ziam cile ama in kei hong langpan hi.

⁴³Patauna, dumte le thaangte in Moab mite ngak nginge hi. TOPA in ci zo hi.

⁴⁴A patauna pan suatak tu a hanciam pawpo dum sungah taak tu uh a, dum sung panin a kaato pawpo thaang sungah kiman tu uh hi, banghang ziam cile Moab mite lal natu in TOPA in hun ciangtan zo hi.

⁴⁵A cimaw ngaltaite in Sihon kumpipa ii khatvei a uk ngei na Heshbon khuapi sungah bel natu zong in hanciam uh hi, ahihang tua khuapi sia mei in kaanghtum hi. Ngalsim a kin Moab mite ii ngamngi sang teng le mualsaangte sia mei in kaanghtham zo hi.

⁴⁶Moab mite hesuak vun! Chemosh a bia mite kisusia zo a, a tapate le a tanute thongtaak tu in kipaipui zo hi.

⁴⁷Ahihang mailam sangah TOPA in Moab sia nuamsasak kik tu hi. Hite theampo sia Moab tungah a piang tu thu TOPA ii sonsa ahi hi.