Read Siyin Chin Jeremiah 49 Bible Online

Jeremiah 49 - Siyin Chin bible

Jeremiah 49

¹Ammon thu TOPA in hi bangin son hi: “Israel pasalte koisungah om ziam? A ngam a hung tu kuama om ngawl ziam? Banghangin Gad minamte ii ngam sia Molech pathian a bia mihingte in lasakin tua munah teangsak ziam?

²Ahizong Rabbah khuapi ah a teang mihingte in ngal kidona aw ka zaaksak tu hun hong theng tu a, a khuapi kisiacip in a khuanote kihaltum tu hi. Tuasia ciang Israel in a ngam hong laaksak mite kung pan a ngam la kik tu uh hi.

³Heshbon mihingte awng, au in kap vun! Ai sia kisiasak zo hi! Rabbah numeite awng khuangai in kap vun! Khau-ip puan silhin kap vun! Lungmangin tai kawkoai vun. Na pathian Molech sia a thiampite le a kumpi tapate taw saltaang tu in kipaipui tu hi.

⁴A thumaan ngawl mihingte awng banghangin kisathei nu ziam? Na thahatna kiam susuk hi. Banghangin na thahatna uh suangin kuama in ko hong sim ngam buan te ci nu ziam?

⁵Na kiim na paam panin launa kong thengsak tu hi. Na taikeak siat tu uh hi. Na suatak natu in na tai tek tu uh a, na ngalkapte a kaikhawm kik tu kuama om ngawl tu hi.

⁶“Ahihang nidang ciang Ammon sia ka nuamsasak kik tu hi. Keima, TOPA in ka ci zo hi.”

⁷Vaanglianbelpa TOPA in Edom te ii thu hi bangin son hi: “Edom mite in a thumaan a khen thei na sia bosua zo ziam? Ngaisutna a pia theite in a vawt tu bangin son thei nawn ngawl ziam? A pilna theampo bosua zo ziam?

⁸Dedan mite awng, kiheak vun a tai vun! Buu vun! Esau ii suan le paalte ka susia tu hi, banghang ziam cile amate daan ka piak tu hun hong theng zo hi.

⁹Mihingte in sapitnga a law uh ciang a kung tungah tawm khe a, tuaciang ngutate zanin hong pai ciang amate dei teng bek la uh hi.

¹⁰Ahihang Esau ii suan le paalte a puan ka suutsak siat zo a tuaciang a buk thei nawn ngawl natu in a bukna munte ka kilanghsak zo hi. Edom mite a vekpi in kisusia zo hi. Khat zongh taang ngawl hi.

¹¹Na tangate ka kungah hong nusiat tavun. Keima in amate ka keam tu hi. Na meingongte in kei hong bealh thei hi.

¹²“Daan piak tu a, a kilawm ngawl mite ngawngawn in daan thuakna hai pan dawn tu ahile no, daan piak ngawlin om tu in ki um nu ziam? Hi ngawl hi, tua hai pan dawn hamtang tu nu hi!

¹³Bozrah khuapi sia a lipkhaphuai mun le senneal ngam suak tu hi ci in keima mama in ka kiciam zo hi; mihingte in tua khua sia ciammuina in nei in, a min sia kihaamsiatna in zangh tu uh hi. A nai a om khuanote theampo a tawntungin kisiacip tu hi. Keima, TOPA in ka ci zo hi.”

¹⁴Keima in, “Edom awng, TOPA kung panin thu khat ka nga zo hi. Minamte in a ngalkaphonpi a khoptua natu le nang hong sim tu in a kingin natu thu a son tu in TOPA in ama te kungah kamtai khat paisak zo hi.

¹⁵TOPA in nang hong thazawmsak tu a, kuama in nang hong zakta ngawl tu hi.

¹⁶Na kiphatsakna in nang hong theam zo hi. Amate in nangma hong kiita tu na upza in kuama in nang hong kiita ngawl hi. Nang sia suangliang tung le mualdawn saangna ah na teang a; muvanlai khat bangin a saangna ah na ten hangin TOPA in nang hong khiasuk veve tu hi. TOPA in son zo hi,” ka ci hi.

¹⁷TOPA in, “Edom tungah a theng tu suksiatna sia nasia mama tu a, a kaantan theampo lau in ingh tu uh hi.

¹⁸Sodom khua, Gomorrah khua le a kiim a khuate a kisiatsak lai bangin Edom khua kisiasak tu hi. Tua munah kuama teang kik ngeingawl tu hi. Keima, TOPA in ka ci zo hi.

¹⁹Tawpi in ngam tawnghtol sung pan hong pusuak a, lopa hingna Jordan ngundung zui in a pai bangin, keima kong pai tu a, Edom mite a ngam uh panin thakhat thu in ka taikeaksak tu hi. Tuasia ciang keima ii teal lampuipa in ngam uk tu hi. Kei taw kitee ngat thei tu akua om ziam? Akua in kei hong thato ngam tu ziam? Kei hong nalh zo tu ukpa akua om ziam?

²⁰Tua ahikom Edom mite suksiat natu ka tupna le Teman khuapi mite tungah vawt tu ka tupnate ngai vun. A patangte uh ngawngawn kikaikeak tu a, a kuama po liinglawng tu uh hi.

²¹Edom a siat ciang leitung buppi kiliing tu za in a nging khat om tu a, patau auna le kaana awte sia Aqaba tuipi dok dongin kiza tu hi.

²²Muvanlai in a tha phalhin a suktun taw kibangin ngalte in Bozrah sim tu hi. Tua ni in Edom ngalkapte sia nausuak tu a tun numei bangin thin patau in om tu uh hi,” ci hi.

²³TOPA in Damascus ii thu hi bangin son hi: “Hamath le Arpad khuapite sungah a teang mihingte sia thusia a zaak uh manin patau a, thinngimin om uh hi. A patauna te tuipi bangin amate tungah kiliim a, thim om thei ngawl uh hi.

²⁴Damascus mite sia a tha zawm a lau in taikeak uh hi. Numei nausuak tu a tun bang keakin na sa in ngim thuakin om uh hi.

²⁵Tua a minthang, a lungdam bul khuapi sia kinusia cip zo hi.

²⁶Tua ni in a tangvalte sia khuapi sung lampi tungah kithat tu a, a ngalkapte theampo kimaimot tu hi.

²⁷Damascus luphungte mei taw ka hal tu a, Benhadad ii kumpi innte sia ka haltum tu hi. Keima, Vaanglianbelpa TOPA in ka son zo hi,” ci hi.

²⁸Babylon kumpipa Nebuchadnezzar ii a zaw Kedar minam le Hazor ii uk ngamkhennote taw kisai in TOPA ii cina pan: “Kedar mite sim vun a, nisuana sangah a om minam sia susia vun!

²⁹A puanbukte le a tuu honte, a buk kongkha puankhaite le a buk sungah a om nate theampo laksak vun. A kalaoh te la vun a, a mite tungah, ‘Na kiim na paam theampo ah launa om hi’ ci in son vun.

³⁰“Hazor mihingte awng, a khuala na ah tai vun a buu vun ci in keima, TOPA in kong sonkhol hi. Babylon kumpipa Nebuchadnezzar in no hong thasawm a, ama in,

³¹‘Hong pai tavun! Ngammuang a kisa mite ih sim tu hi! A khuapi in kongpi le nei ngawl, tawkalh natu tawbu le nei ngawl a, kidal vet ngawl hi,’ ci hi.

³²“A kalaoh te le nganno a hul a khoaite theampo la vun! A sam uh a tom in a meet mihingte sia mun theampo ah ka thethaang tu a, mun theampo pan amate tungah tuasiatna ka thengsak tu hi.

³³Hazor ngam sia a tawntungin sennealngam kisuaksak tu a, ngiate bek tua munah teang tu hi. Tua munah kuama teang kik ngeingawl tu hi. Keima, TOPA in ka son zo hi,” ci hi.

³⁴Zedekiah ii Judah kumpi a sua zawk po ciang, Vaanglianbelpa TOPA in Elam ngam thu ka tungah hong son hi.

³⁵Ama in, “Elam ngam a thahatsak mama thalkaap thiamte theampo ka that tu hi.

³⁶Mun theampo panin Elam ngam sia vui in ka seamsak tu a, a ngaltai mite a thet ngawlna ngam khat beak om ngawl dongin a mite mun theampo ah ka thethaang tu hi.

³⁷Amate a that nuam a ngalte Elam mite in ka kiitasak tu hi. Ka thin uuk mama na taw in Elam mite ka susia tu a, ka lalcipsak dongin amate a do tu in ngalkaphonpi ka puak tu hi.

³⁸A kumpite le a lampuite ka susia tu a, tua munah ka kumpi tokhum ka nga tu hi.

³⁹Ahihang nidang ciang Elam mite ka nuamsasak kik tu hi. Keima, TOPA in ka son zo hi,” ci hi.