Read Siyin Chin Jeremiah 5 Bible Online

Jeremiah 5 - Siyin Chin bible

Jeremiah 5

¹Jerusalem mite awng, na lamdungte zui in tai vun! Na kiim na paam khuadakin en vun! Noma tatak ma na mu vun. Vanh zuakna munte zong vun! A maan a ngamta le Pathian tungah thumaan tu a hanciam mihing khat na mu thei uh ziam? Na mu thei uh ahile TOPA in Jerusalem ii mawna maisak tu hi.

²TOPA ka bia tu uh hi na ci uh hangin, na thin tatak uh taw na ci uh hi ngawl hi.

³TOPA in thumaanna zong takpi hi. Ama in no hong saat hi, ahihang no in phamaw na sa bua uh hi; ama in no hong hualcip hi, ahihang thuhilna na ngai tuan bua uh hi. Na thin uh pui in na mawnate uh panin na kikheal bua uh hi.

⁴Tuasia ciang keima in, “Hite sia a zawng bangma a he ngawlte bek hi. Amate in a mawmawthuai in ngamta uh hi; amate sia a Pathian ii a kat sia he ngawl a, TOPA ii a sepsak nop sia zongh he ngawl uh hi.

⁵Mihingte kungah vaangletna taw ka pai tu a, amate taw thu ka son tu hi. A tatakin ci leang amate in a Pathian ii a kat sia he takpi a, amate ii a sep tu, TOPA deina sia he uh hi,” ci in ka ngaisun hi. Ahihang amate theampo in TOPA ii thuneina nialin, a thu ni nuam ngawl uh hi.

⁶Tua hu in ngam tawnghtol sung pan tawpite in amate petlum tu uh hi; sennealngam pan ngia te in amate laitham tu a, pawlbeamte in a khua sungah vak kawkoai tu uh hi. Tua mihingte a pusuak uh le kibaltham tu hi, banghang ziam cile a mawna uh tam mama a, Pathian kung pan pial nithi hi.

⁷TOPA in, “Ka mite ii mawnate banghangin maisak tu khi ziam? Amate in kei hong nusia in pathian tatak ahi ngawlte bia zo uh hi. ka mite sia a ngilva dong ka vaak a, ahihang amate in palngul khialna vawtin pumpi kizuakte taw a hun zangh uh hi.

⁸Amate sia a innpaamte ii zite a lamnai, a pha tak a kivaak siphu tal lante bang ahi hi.

⁹Hi thute hangin amate daan pia ngawl, hi bang minam tungah phula ngawl tu khi ziam?

¹⁰Ka mite ii sapithuante ah a nguite saattan tu in ngalte ka paisak tu hi, ahihang a vekpi in ka susiasak buatu hi. A baakte heu in ka sawl tu hi, banghang ziam cile a baakte sia kei aa hi ngawl hi.

¹¹Israel mite le Judah mite in kei hong leeheak cip zo uh hi. TOPA keima in ka son zo hi,” ci in dongh hi.

¹²TOPA ii mite in ama nial in, “Ama in bangma vawt takpi ngawl tu hi. Ih haksatna hunte om ngawl tu hi; ngal ahibuale kialpi ih thuak buatu hi,” ci uh hi.

¹³Kamsaangte sia vuibung bang hi lel uh a, TOPA kung pan thupuak tu bangma nei ngawl uh hi amate in ci uh hi. Vaanglianbelpa TOPA Pathian in kei tungah, “Jeremiah awng, hi mihingte in tuabang thute son ahikom ka kammalte sia na kam sungah mei bang ka hisak tu hi. Mihingte in thing bang hi tu a, tua mei in amate kaanghtum tu hi,” hong ci hi.

¹⁵Israel mihingte awng, ngam khuala pan no hong sim tu in TOPA in minam khat hong paipui hi. Tua minam sia a thahat le taanghlai minam khat hi a, a kam na heak ngawl uh minam khat ahi hi.

¹⁶A thal toai te sia kuama hesuak ngawlin mihing a that, a thahat ngalkapte ahi uh hi.

¹⁷Amate in na ankungte le na an uhte hong khawnsak tu uh a; na tapate le na tanute thatlum tu uh hi. Amate in na tuu le na khuihonte ngo tu uh a, na sapitkungte le na thei kungte susia tu uh hi. Na muan mama uh kulh taw a ki uum khuapite a ngalkapte in susia tu uh hi.

¹⁸TOPA in, “Ahihang tuasia hun ciang ngawngawn zongin ka mite ka susia cip siat buatu hi.

¹⁹Hite theampo banghang vawt khi ziam ci in amate in hong dok ciang Jeremiah awng, amate in kei kung pan puapial a, a ngam sungah ngamdang pathiante atu a sep bangma in, amate ii ngam ahi ngawl ngamsung khat ah ngamdangmite atu na seam tu uh hi, ci in amate son ta'n,” ci hi.

²⁰TOPA in, “Jacob ii suan le paalte le Judah mite tungah son in:

²¹No, a ngaisun thei ngawl a nangh mi mawmawte, mit nei napi a mu thei ngawlte, bil nei napi a za thei ngawlte awng, ngai vun.

²²Keima in TOPA ka hi hi; banghang hong kiita ngawl nu ziam? Banghang ka mai ah liing ngawl nu ziam? Tuipi ii ngamngi tu in sen ka koi a, tui ii kaantan zawk ngawl a tawntung a kho ngamngi ahi hi. Tuipi a kilok hial zong kaantan zo ngawl tu a; tuihualte a hawk ngawp zong phultan zo ngawl tu hi.

²³Ahihang no mihingte! Na thin uh pui in nong langpan uh hi; Kei nong pial uh a nong nusia uh hi.

²⁴Keima in a hun ciangin tuuk ngua le khaal ngua hong zusakin kum simin anlaak hun hong pia hi napi in kei zatak tu na ngaisun ngei bua uh hi.

²⁵Na mawna, na khialnate uh in hi naphate na nga tu uh hong khaktan hizaw hi.

²⁶“Mi ngilote ka mite ii sungah teang uh hi; Amate in ngeen taw vacim thaang a sia mite bangin mihingte man tu in thaangsia uh hi.

²⁷Savaipa khat in a bawm dimteak vacim a khum bangin amate ii a sutol vanhte taw a inn dimh zo uh hi. Tua ahikom amate sia thahat in hau a,

²⁸ankhamin thau uh hi. Amate in ngitlona lam ah ciangtan nei ngawl uh hi. Amate in tangate ii a nga tu a kilawmte pia ngawl, ahibuale a kinengcip te tungah thukhaikimna lak ngawl uh hi.

²⁹“Tua ahikom, keima TOPA in, hi thute hangin amate daan ka pia tu hi; hi minam tungah phu ka la tu hi.

³⁰A lauhuai le thin patauhuai thu khat ngam sungah piang zo hi:

³¹kamsaangte in leilot thu bek son uh hi; thiampite in kamsaangte thupiakna bangin uk uh a, ka mite in nalh ngawl uh hi. Ahihang a tawpna hun a thet ciang amate in bang law tu uh ziam,” ci hi.