Read Siyin Chin Jeremiah 50 Bible Online

Jeremiah 50 - Siyin Chin bible

Jeremiah 50

¹Babylon khuapi le a mite taw kisai in TOPA in hi bangin a thupuak sia ka tungah hong son hi:

²“Minamte tungah hi thu son in! Hi thu thangsak in! Limlakna pia in a, a thu taangko in! Thuku in koi heak in! Babylon taak zo hi! A pathian Marduk kisemtham zo hi! Babylon ii milimte kimaizumsak zo hi; a kiihuai a milimte kisutham hi!

³“Saksang panin minam khat Babylon sim tu in hong theng zo a tua sia sennealngam suaksak tu hi. Mihing le nganhingte taikeak tu uh a, tua munah kuama teang ngawl tu hi,” hong ci hi.

⁴TOPA in, “Tua hun hong thet ciang, Israel le Judah mite kap kawmin hong paikhawm tu uh a, amate ii Pathian, keima hong zong tu uh hi.

⁵Amate in Zion lampi dongh tu uh a, tua zawkciang tua sang ah pai tu uh hi. Amate in keima taw a tawntung kiciamna khat vawt tu uh a, bangma hunin palsat ngeingawl tu uh hi.

⁶“Ka mite sia tuucingte ii mualtung tengah a bosua tuute taw kibang hi. Amate sia tuute bangin mual khat pan mual khat ah vakthap kawkoai uh a, a inn omna mun mangil zo uh hi.

⁷Amate sia a mute theampo in sim uh hi. A ngalte in, ‘Amate sia TOPA tungah maw uh hi, tua ahikom hi bang a amate tungah ih vawt sia kikhial ngawl hi. A taanghpupite in TOPA muang hi, tua ahiciang amate mama sia TOPA tungah a thumaan top tu uh ahi hi,’ ci uh hi.

⁸“Israel mite awng, Babylon panin taikeak vun! Hi ngam nusia vun! A nusia phitbel hi vun!

⁹Sak sangah a om ngam thahat pawlkhat ka thawn tu a Babylon ka simsak tu hi. Amate in tua ngam sim tu in a thuangin kingual tu a, zo tu uh hi. Amate sia thal taw muiliim savai thiamte ahi uh hi.

¹⁰Babylon khuapi kiphuul tu a, a phuulte in a dei theampo la tu uh hi. Keima, TOPA in ka son zo hi,” ci hi.

¹¹TOPA in, “Babylon mite awng, ka minam na suttol uh hi. Note lungdam in na kipaak uh a, khuipui an cicil ahibuale a hahaam siphu khat bangin vak kawkoai nu hi,

¹²ahihang na khuapi lian uh sia a vaang kibosak tu a, kimaizumsak tu hi. Babylon sia ngam theampo sung panin a thupi ngawlbel ngam suak tu a, a kongaw le tui om ngawl sennealngam suak tu hi.

¹³Ka thin uukna hu in Babylon ah kuama teang ngawl tu hi; a siacip in kinusia tu a, tua mun kaantan in a paite theampo in ingh in lamdang sa tu uh hi.

¹⁴“Thal toaite awng, Babylon sim tu in kingual vun a kiim uum vun. Na thaltang theampo uh taw Babylon kap vun, banghang ziam cile ama in keima TOPA tungah hong maw zo hi.

¹⁵Khuapi kiimkot ah ngal thotna aw taw au vun! Tu in Babylon in ngallel zo hi. A khuapi luphungte sulet zo a cimhtham zo hi. Keima in Babylon te tungah phu ka la hi. Tua ahikom amate tungah phulam vun a, midangte tungah a vawt uh bangin amate tungah vawt vun.

¹⁶Tua ngam sungah thaicii kituu heak hen a, an kila heak hen. Tua munah a teang ngamdangmite theampo in Babylon a sim ngalkaphonpi sia kiita tu a, a inn a lo ah cia kik tu uh hi,” ci hi.

¹⁷TOPA in, “Israel mite sia tawpite in delmang a, a kithethaang tuute taw kibang uh hi. A masabel in amate sia Assyria kumpipa in sim a, tua zawkciang Babylon kumpipa Nebuchadnezzar in a ngu khimtham hi.

¹⁸Tua ahikom, Keima, Vaanglianbelpa TOPA, Israel ii Pathian in, Assyria kumpilianpa daan ka piak bangma in Nebuchadnezzar kumpipa le a ngam daan ka pia tu hi.

¹⁹Israel mite a ngam ah ka teangsak kik tu hi. Amate in Carmel mual tung le Bashan ngam sungah a ciin ante ne tu uh a, Ephraim le Gilead ngamte sungah a piang ante theampo a du bangin in ne tu uh hi.

²⁰Tua hun a thet ciang, Israel ngam ah mawna khialna kimu ngawl tu a, Judah ngam ah seksolna om ngawl tu hi, banghang ziam cile a nuntakna ka kheet lai mihingte ii mawna ka maisak tu hi. Keima, TOPA in ka son zo hi,” ci hi.

²¹TOPA in, “Merathaim mite le Pekod mite sim vun. That vun a susia vun. Kong thupiak theampo seam vun. Keima, TOPA in ka ci zo hi.

²²Hi ngam ah ngal kisimna aw kiza a, suksiatna nasia takin om hi.

²³Babylon in leitung buppi sek taw seaktham a, tu in tua sek sia taltan zo hi! Tua ngam ah a piang thute minam theampo in lamdang sa in ingh uh hi.

²⁴Babylon awng, kei nong do hi, na heak ngawl hang bek hi a, thaang kong siana sungah na awk zo hi.

²⁵Ka ngalhiamte koina mun ka hong zo hi, ka thin uuk in tua ngalhiamte ka pusua keak zo hi, banghang ziam cile Keima, Vaanglianpipa TOPA, Vaanglianbelpa in Babylon ah nasep tu ka nei hang ahi hi.

²⁶Mun theampo pan sim vun a, a antang kholna munte hong keak vun! Na suttol vanhte antang sen bangin seng to vun! A ngam susia vun! Bang mama khe heak vun!

²⁷A ngalkapte theampo that vun! Amate mon vun! Babylon mite a lal a hi uh hi! Amate daan piak tu hun hong theng zo hi!” ci hi.

²⁸(Ngaltaite Babylon pan suakta in Jerusalem theng uh a, Babylon te ii a Biakinnpi tungah a vawt nate hu in TOPA ih Pathian in bangbangin phula ci sia amate in son uh hi.)

²⁹“Babylon sim tu in thalkaap thiamte son vun. Thal le thaltang a zangh thiamte theampo kuansak vun. A khuapi kiim uum vun a khat zongh suaktasak heak vun. A sep a vawt theampo thuk kik vun, midangte tungah a vawt bangin a tungah vawt vun, banghang ziam cile a kiphatsakna taw diang in Israel ii a Thiangtho Pa, hong langpan hi.

³⁰Tua ahikom a tangvalte sia khuapi sung lampi tungah kithatlum tu a, a ngalkapte theampo sia tua ni in kilalcipsak tu hi. Keima, TOPA in ka ci zo hi.

³¹“Babylon awng, nang sia kiphatsakna taw kidim ni hi. Tua hu in Vaanglianpipa TOPA Vaanglianbelpa, Keima in nang kong langpan hi! Nang daan kong piak tu hun hong theng zo hi.

³²A kiphasak na ngam sia lutu in puk tu a, kuama in nang hong phongto ngawl tu hi. Na khuapite ka hal tu a, a kiim ah a om theampo kaanghtum tu hi,” ci hi.

³³Vaanglianbelpa TOPA in, “Israel mite le Judah mite in zawthawk vawtna thuak uh hi. Amate a mante theampo in amate hi cinten in cingin pusuaksak ngawl tu hi.

³⁴Ahihang amate a suatak tu pa sia thahat a — ama min sia Vaanglianbelpa TOPA ahi hi. Ama mama in amate vai teng vaansak tu a, leitung ah kilemna thengsak tu hi, ahihang Babylon mite tungah ngimna thengsak tu hi,” ci hi.

³⁵TOPA in, “Babylon ah thina theng hen! A mihingte, a ukte le a mipilte tungah thina theng hen.

³⁶Leilot kamsaangte tungah thina theng tahen — bang ka mawmawt uh ci ziam! A ngalkapte tungah thina theng tahen — bangza in lauhuai ziam!

³⁷A siphute le a siphu ngalleangte susia vun! A cial ngalkapte tungah thina theng tahen — bangza in zawm ziam! A sum a paaite susia vun, suttol in laksak vun.

³⁸A ngam ah nguatui hangsak vun a, a ngunte kangsak vun. Babylon sia a kiitakhuai milim biakna ngam hi a, tua milimte in mihing mawmawte suaksak uh hi.

³⁹“Tua ahikom Babylon sia doaite, tha ngilote le vacim thiangtho ngawlte teenna ngam suak tu hi. Tua munah bangma hun in mihing teang kik ngei nawn ngawl tu hi.

⁴⁰Sodom khua, Gomorrah khua le a nai a khuate ka suksiat bangin Babylon ka susia tu hi. Tua munah kuama teang kik ngeingawl tu hi. Keima, TOPA in ka ci zo hi.

⁴¹“Sak sang ngam panin a khuala ah a om a thahat minam khat hong pai hi; kumpi tam mamate ngal do tu in kithoai uh hi.

⁴²Amate in a thal le namsaute toai uh hi; Amate sia ngilo a ngual hesuakna nei ngawl uh hi. A siphute tung a to uh ciang, tuipi hawk bangin nging hi. Babylon sim tu in amate kithoai uh hi.

⁴³Babylon kumpipa in tua thu za a, a khutte zaw vanek hi. Ama in numei nautun a nat bangin thinngimna le tak ngimna thuak hi.

⁴⁴“Jordan ngundung taam thuk sung pan pusuak in, lopa hingna munah a pai to tawpi khat bangin Keima, TOPA kong pai tu a, Babylon te a khuapi uh pan thakhatthu in ka taikeaksak tu hi. Tuasia zawkciang lampui ka tealpa in ngam uk tu hi. Kei taw kitee ngat thei tu akua om ziam? Akua in kei hong thato ngam tu ziam? Hong langpan ngam tu kumpi akua bang om ziam?

⁴⁵Tua ahikom Babylon khuapi suksiat natu ka tupna le a mite tungah ka vawt tu zia ka sawmna teng hong ngai tavun. A patangte ngawngawn kikaikeak tu a, mihing theampo patausak tu hi.

⁴⁶Babylon a bo ciang, awnging nasia tu ahikom leitung buppi liing tu hi. Patau in a auna awte minam dangte in za tu uh hi,” ci hi.