Read Siyin Chin Jeremiah 51 Bible Online

Jeremiah 51 - Siyin Chin bible

Jeremiah 51

¹TOPA in, “Babylon le a mite a lalsak vuipi khat ka vasak tu hi.

²Vuipi in taangphaw a seamkeak bangin Babylon susia tu in ngamdangmite ka puak tu hi. Tua suksiatna ni a thet ciang, amate in mun theampo pan sim tu a, a ngam sia a kolh in nusia tu uh hi.

³A ngalkapte a thalkaap tu le a thik puan a silh tu hun pia heak vun. A tangvalte khoaikhe heak vun! A ngalkap buppi mon vun.

⁴Amate sia a khuapi sung lampi tungah kiliamsak tu a, thi tu uh hi.

⁵Amate in Israel ii a Thiangtho Pa, Keima tungah hong maw zo ahitazong Keima, TOPA Pathian Vaanglianbelpa in Israel le Judah ka taisan bua hi.

⁶Babylon panin tai vun! Na suatak natu in tai vun! Babylon ii mawna khialna hangin thalup thuak heak vun. Keima in tu in phu ka la a, a kilawm bangin daan ka pia hi.

⁷Babylon sia leitung buppi a vai sak ka khut sungah a om khamh hai khat taw kibang hi. Minamte in a sapittui ne in a thin ciim ngawl uh hi.

⁸Babylon sia thakhat thu pukin kisiacipsak hi! Tuasia khuangai pui vun! A liamma bawl natu in zatui la vun; dam thei lai tha tu hi.

⁹Tua munah a teang ngamdangmite in, ‘Babylon hu tu in ka hanciam uh hang hai lei zo hi. Tu in nusia in ih inn ih lo zuan kik ka tawng. Pathian in Babylon sia a tha neiza theampo taw daan pia zo a, siasak dipdeap zo hi,’ ci uh hi,” a ci hi.

¹⁰TOPA in, “Ka mite au a, ‘TOPA in a maan ih hinate lak zo hi. Pai in TOPA ih Pathian ii nasepte Jerusalem mite tungah son ka tawng’ ci uh hi,” a ci hi.

¹¹TOPA in Babylon suksiat tu a sawm hu in Media kumpite thawn zo hi. A Biakinnpi a suksiat hu in ama in hi bangin phulam tu ahi hi. Ngal a sim ngalkapmangte in, “Na thaltang hiamsak vun! Na lum uh la in kithoai vun!

¹²Babylon ii luphungte sim tu in lim lak vun. Phualcingte belapin thahatsak vun! Ngalvilte koi vun! A suam tu mite koi vun!” ci in thupia hi. TOPA in Babylon mite tungah ka vawt tu hi a ci sia vawt zo hi.

¹³Tua ngam in ngun tam mama nei a, nei le lamh hau mama hi, ahihang a hun bo zo a, a nuntakna khauzam sia kisaattan zo hi.

¹⁴Vaanglianbelpa TOPA in Babylon sim tu in mihing tam mama, khaumaw honpui bangin paipui tu a, ngalzawna taw amate au tu uh hi ci in a nuntakna taw kiciam zo hi.

¹⁵TOPA in a vaangletna taw lei vawt a; ama ciimna taw leitung bitphua in vantungte phalh hi.

¹⁶Ama ii thupiakna taw van ii tungsia ah a om tuite hawk a; ama in leimong panin meeite paipui hi. Ama in nguatui sungah khua lengsak a, a bumngua kholna inn panin vui vasak hi.

¹⁷Hisia a mu uh ciang, mihingte khuaphawk ngawlin mawmaw kisa uh hi; Milim a vawtte a thinkiam uh hi, banghang ziam cile amate ii vawt pathiante sia, a maan hi ngawl a, nuntakna nei ngawl hi.

¹⁸Tuate sia manh nei ngawl a, no mu tu ahi hi; TOPA ii amate taw kisi tu hong pai ciang amate kisiasak tu hi.

¹⁹Jacob ii Pathian sia amate bang hi ngawl hi; Ama sia na theampo a vawtpa hi a, ama mi tatak tu in Israel teal zo hi. Ama min sia Vaanglianbelpa TOPA ahi hi.

²⁰TOPA in, “Babylon awng nang sia ka sek na hi a, ka ngalhiam na hi hi. Minamte le kumpi ngamte sukcip natu,

²¹Siphu le a tung tote seakthap natu, Siphu ngalleang le a hawlte seakthap natu,

²²pasalte le numeite thalup natu, Khanghaamte le khangmoite thalup natu, tangvalnote le ngaknunote thalup natu,

²³tuucingte le a tuu honte thalup natu, lothote le a siphute thalup natu, ngamukte le uliante sukcip natu in nang kong zangh hi,” ci hi.

²⁴TOPA in, “Jerusalem tungah siatna a vawtte theampo hu in Babylon le a mite tungah ka thuk kik sia na mu tu uh hi.

²⁵Babylon awng, nang sia leitung buppi a susia mual khat taw na kibang hi, ahihang Keima, TOPA sia na ngal ka hi hi. Nang kong man tu a, lei taw kim in vut sungah kong nusia tu hi.

²⁶Na siatnate a kikholna sung panin suang khat zongh inn sak natu in kizangh kik ngeingawl tu hi. A tawntungin sennealngam khat bang na hi tu hi. Keima, TOPA in ka ci zo hi.

²⁷“Ngalsim natu in heaksakna lim pia vun! Minamte ii zaak thei tu in lemle tum vun! Babylon sim tu in minamte kithoaisak vun! Ngalsim tu in Ararat ngam, Minni ngam le Ashkenaz ngamte son vun. Ngalsim lampui tu in ngalkap mang khat see vun. Khaumaw honkhat bangin siphute keng vun.

²⁸Babylon sim tu in minamte kithoaisak vun. Media kumpite, a lampuite le a uliante le amate ii uk ngamte theampo ii ngalkaphonpite vaitha vun.

²⁹Leitung sia lau in liing hi; banghang ziam cile Babylon ngam sia kuama ii ten ngawlna sennealngam suaksak tu a, TOPA in a ngealna a taangtutsak hang ahi hi.

³⁰Babylon ngalkapte ngalsim nawn ngawlin a kulh sungah om uh hi. Amate a thin uh no in numeite bang hi zo hi. A khuapi kongpite taltan zo a, a innte kaangh hi.

³¹Ama ii khuapi sia a pangh theampo panin kisutham zo hi ci in Babylon kumpipa tungah ko tu in kamtai khat zawkciang khat tai hi.

³²Ngalte in ngun kaantanna mun sia la zo a ngalpanna kulh teng hal zo hi. Babylon ngalkapte patau khat sua hi.

³³Khuangeingawlin ngalte in ancilna munah taangcil bangin amate saat vawkin tuanhcil tu uh hi. Keima, Vaanglianbelpa TOPA Israel ii Pathian in ka ci zo hi,” ci hi.

³⁴Babylon kumpipa in, Jerusalem sia saattan in ne hi. Ama in thambeal khat bangin khuapi hawm suaksak a; ngulpui khat bangin ama in valh hi, ama in a dei teng la in a dang teng vawk hi.

³⁵Zion mite in, “Hong ngoltol vawtna hangin Babylon in mawpu tahen!” ci ta uh hen. Jerusalem mite in, “Koma ii thuakna hu in Babylon in mawsiat thuak tahen!” ci ta uh hen.

³⁶Tua ahikom TOPA in Jerusalem mite tungah, “Na thu kong panpui tu a no tungah hong vawtna hu in na ngalte ka thuaksak tu hi. Babylon te ii tuinaak le a ngunte ka kangsak tu hi.

³⁷Tua ngam sia ngamsate teenna ninthuk suak tu hi. Tua mun sia thaadam huai mun hi tu a; kuama teang ngawl tu hi, a mute theampo in lau tu uh hi.

³⁸Babylon te theampo sia tawpite bangin hawk tu a, tawpi note bangin thuum tu uh hi.

³⁹Amate duhop uh ziam? Amate atu in anneakpoai khat ka vawt tu a, zukham lungdam in ka omsak tu hi. Amate mu tu uh a khanglo ngeingawl tu hi.

⁴⁰Tuunote, kealte le tuutalte bangin amate thalup tu in ka paipui tu hi. Keima, TOPA in ka son zo hi,” ci hi.

⁴¹TOPA in Babylon thu hi bangin son hi; “Leitung buppi ii pok khuapi sia kila zo hi! Minamte atu in Babylon sia a thaadam huai suak zo hi!.

⁴²Tuipi sia Babylon khua tungah kinil zo a, tuihual te hawk in khum zo hi.

⁴³Khuate thaadam huai suak zo a, kuama teen ngawl, khualhaw ngawlna, tui om ngawl sennealngam bang ahi hi.

⁴⁴Babylon ii pathian Bel sia daan ka pia tu a, a vanh nguk teng ka pia kiksak tu hi; minamte in ama bia nawn ngawl tu uh hi. “Babylon ii luphungte cimh zo hi.

⁴⁵Israel mite awng, tua mun panin tai vun! Na nuntak natu in ka thin uuk tutna pan tai vun.

⁴⁶Kamleang na zakte hu in na thin uh kiamsak heak vun a, lau heak vun. Kum simin a kibang ngawl kamleang — ngamsung le kumpi khat le khat kidona, ngongtatna vai kamleangte kizel hi.

⁴⁷Tua ahikom Babylon ii milimte daan ka piak tu hun hong theng hi. A ngam buppi kimaizumsak tu a, a mite theampo kithatlum tu hi.

⁴⁸Saksang pan a susia tu in hong pai mite khut sungah Babylon a taak ciang lei le van ah a omte theampo lungdam in au tu uh hi.

⁴⁹Babylon in leitung theampo a mihingte thisak hi, Israel te tam mama thisak ahikom tu in Babylon bo tu hi. Keima, TOPA in ka son zo hi,” ci hi.

⁵⁰TOPA in Babylon a om a mite tungah: “Thina panin suakta zo nu hi! Tu in pai vun! Ngak heak vun! Inn taw kikhuala na hi uh hangin Keima na TOPA hong ngaisun tavun a Jerusalem phawk vun.

⁵¹Note in, ‘Ih min hong kidaisak zo a hong kimaizumsak zo hi; Ngamdangmite in Biakinnpi sung a thiangtho na munte la zo ahikom cimaw cip ka kisa uh hi,’ na ci uh hi.

⁵²Tua ahikom Babylon khua a milimte tungah daan ka piak tu hun le ngamsung theampo ah a liamte a tau tu hun hong theng tu hi ka ci hi.

⁵³Babylon sia van ah kaato thei in, tua munah kulh kho khat a vawt thei hial zongin tua kulh susia tu in mihing ka puak veve tu hi. Keima, TOPA in ka son zo hi,” ci hi.

⁵⁴TOPA in, “Babylon khua sungah kaana aw le, ngamsung kisuksiatna hu in khuangaina aw ngai vun.

⁵⁵Babylon ka susia tu a, ka ngamkhingsak tu hi. Ngalkaphonpite in tuihual bangin del in a nging tatakin au in sim uh hi.

⁵⁶Amate Babylon susia tu in hong pai zo hi; a ngalkapte kiman a, a thalte kithiaktan hi. A ngilote daan a pia sia Pathian Keima ka hi a, a kiphu bangin Babylon daan ka pia tu hi.

⁵⁷A ngamukte — mipilte, lampuite le ngalkapte ka vaisak tu hi. Amate mu in khanglo ngeingawl tu uh hi. Keima kumpipa in ka ci zo hi; Keima in Vaanglianbelpa TOPA ka hi hi.

⁵⁸A thahat Babylon luphungte lei ah kilawnsuk tu a, A saang khuapi kongpite kihaltum tu hi. Minamte ii nasepna sia bangma in kimang ngawl hi; a hanciamnate kaanghtum hi. Keima, Vaanglianbelpa TOPA in ka son zo hi,” ci hi.

⁵⁹Zedekiah kumpipa a hu pa sia, Mahseiah ii tupa, Neriah ii tapa Seraiah ahi hi. Zedekiah ii Judah kumpi a sua zawk a kum lina kumin, Seraiah sia ama taw Babylon ah paikhawm hi, keima in Seraiah tungah thu pawlkhat ka hil hi.

⁶⁰Babylon tungah a theng tu suksiatna thu theampo le Babylon taw kisai hi thudangte theampo laibu khat sungah ka ciamtee hi.

⁶¹Keima in Seraiah tungah, “Babylon na thet ciang hi laibu sungah a ki at thute theampo mipite tungah a ngingin sim in.

⁶²Tua zawkciang, hi bang thu na ngen in, ‘TOPA awng, hi mun sia a nungta, mihing hikale nganhing hikale a om ngawlna tu le a tawntung sennealngam bang ahi natu in ka susia tu na ci zo hi.’

⁶³Seraiah awng, hi laibu sia mipite tungah na sim zawkciang, suangtum khat tungah khit in a, Euphrates ngun sungah vawk in,

⁶⁴tuaciang, ‘Hi bangin Babylon tungah tung tu hi — Babylon sia tui sungah tumsuk tu a lawtto kik ngeingawl tu hi. Banghang ziam cile TOPA in suksiatna sia Babylon tungah a thetsak tu hang ahi hi,’ ci in,” ka ci hi. Jeremiah ii kammalte sia tu teng ahi hi.