Read Siyin Chin Jeremiah 52 Bible Online

Jeremiah 52 - Siyin Chin bible

Jeremiah 52

¹Zedekiah sia Judah kumpi a sua lai in kum kul le kum khat pha a, Jerusalem ah kum sawm le kum khat uk hi. A nu ii min sia Hamutal hi a, Libnah khuapi ah a teang Jeremiah ii tanu ahi hi.

²Jehoiakim kumpipa ii mawna khialna a vawt bangma in Zedekiah kumpipa in TOPA tungah maw hi.

³TOPA sia Jerusalem le Judah mite tungah thin uuk mama ahikom a mit muna pan hawlkhia hi. Zedekiah in Babylon kumpipa Nebuchadnezzar leedo hi,

⁴tua ahiciang Zedekiah ii kumpi a sua zawk kum kua kum, a tha sawmna ni sawm ni in Nebuchadnezzar in a ngalkapte theampo taw pai in Jerusalem sim uh hi. Amate in khuapi pua sangah ngiaphual saatin, khuapi kiimkot ah ngal uumci na luphung vawt a,

⁵tuaciang Zedekiah kumpipa maan zawk kum sawm le kum khat a phak dong tua khuapi uumci uh hi.

⁶Tua kum a tha lina ni kua ni in kialpi nasia mama a, mite neak tu bangma taang nawn ngawl ahikom,

⁷khuapi uumna luphungte kisulet hi. Babylon te in khuapi uumci hi napi, tua ngalkapte theampo zan lai in suakta uh hi. Amate sia kumpi huan paina lam zui in luphung te ni ii a kikawnna kongpi sia kaantan in Jordan Kuam sang zuanin tai uh hi.

⁸Ahihang Babylon ngalkaphonpi in Zedekiah kumpipa delkot in Jericho khua nai zaangtam ah man uh hi, a ngalkapte theampo in Zedekiah taisan uh hi.

⁹Zedekiah sia Nebuchadnezzar kumpipa kungah kipaipui hi, tualai in Nebuchadnezzar sia Hamath ngam Riblah khuapi ah om a tua munah Nebuchadnezzar in ama tungah thukhen hi.

¹⁰Riblah ah Nebuchadnezzar in Zedekiah ii tapate sia a pa ii mu tang ma in that hi, tuaciang ama in Judah uliante zongh thatsak hi.

¹¹Tua zawkciang, ama in Zedekiah ii mittangte khelsak a kol thaakin Babylon ah paipui hi. Zedekiah sia a thi ni dong Babylon thong sungah om hi.

¹²Nebuchadnezzar ii Babylon kumpi a sep zawk kum sawm le kum kua kum a tha ngana, ni sawm ni in, kumpipa tungah ngaisutna a pia pa le a ngalkaphonpi ukpa Nebuzaradan sia Jerusalem khua ah tum hi.

¹³Ama in Biakinnpi, kumpi inn le Jerusalem khua sungah mi thupi theampo ii innte mei taw haltum hi;

¹⁴tuaciang a ngalkapte in khuapi luphungte sutham uh hi.

¹⁵Tuaciang Nebuzaradan in khua sungah a taanglai mite, khutthiam mi a taanglaite le Babylon te kungah hong taite Babylon ah paipui hi.

¹⁶Ahihang ama in nei le lamh a nei ngawl, a zawngbel mihing pawlkhat, Judah ngam sungah nusia in sapithuan le lo sungah naseam tu in koi hi.

¹⁷Babylon te in Biakinnpi sungah a om taau khuamte le khuileangte le taau tuikuang lian sia sutham hi, tuaciang taaute theampo amate in Babylon ah paipui uh hi.

¹⁸Amate in kawkeaute, biaknatau thianthosakna a, a kizangh vut kuangte, meiinn puuana a, a nazakte, sangaw biakpiakna chi donna kuangte, ngimnamtui halna kuangte le biakinn kikhopna a, a kizangh taau taw a kivawt nate theampo zongh la uh hi.

¹⁹Amate in khamh ahibuale ngunn taw a kivawt nate theampo la uh hi: tuate sia kuangnote, meikam toaina bealpeute, sangaw biakpiakna a chi donna kuangte, vut kuangte, meiinn ngaknate, ngimnamtui halna kuangte le sapittui sunna biakpiakna haite ahi uh hi.

²⁰Solomon kumpipa ii Biakinnpi a tu a vawt taau vanhte — khuam niite, khuileangte, tuikuang lian sia le, a nanna khuital sawm le niite — sia khaitee tu in ngit leih hi.

²¹A khuam niite sia kibang linlian hi: khat sia metre 8 saang a, a kiimkot metre 5.3 pha hi. Tuate sia a sung hawm a, a thik sia millimetre 75 saa hi. Khuam dawn ah taau taw a kivawt a tungkhu khat veve om a, metre 2.2 saang hi, a kiimkot sia talee thingnga lim taw a kizeam thikpaona om a, a vekpi in taau taw kivawt hi.

²³Khuam khat sim ii tungkhuna theampo tungah talee nga zakhat veu om a, sawmkua le luk sia lei panin kimu thei hi.

²⁴Tua bek dom ngawlin ngalkaphonpi ukpa, Nebuzaradan in Thiampi Lianbelpa Seraiah, thiampi dom Zephaniah le a thupi biakinn ulian dang thum te thongtaak tu in paipui hi.

²⁵Khuapi sung panin ngalkapte a uk ngalkap mangpa, khua sungah a taanglai, kumpipa ngaisutna a piate sung pan mihing sali, ngalkap zum lai a keam, ngalkapmang pa a hupa le a dang mihing thupi sawmlukte ama in paipui hi.

²⁶Nebuzaradan in amate sia Riblah khuapi ah a om, Babylon kumpipa kungah paipui hi,

²⁷tua khuapi sia Hamath ngam sungah om hi. Tua munah kumpipa in amate saatsak in thatlum hi. Tua ahikom Judah mite sia a ngam panin saltaang tu in kipaipui hi.

²⁸Hisia in Nebuchadnezzar ii thongtaak a, a paipui mite teng kitepteena ahi hi: Ama ii kumpi a sep zawk a kum sali kum in ama in mihing 3,023 paipui hi;

²⁹a kum sawm le kum liat kum in, Jerusalem panin 832;

³⁰tuaciang a kum kul le kum thum kumin, 745 — Nebuzaradan in paipui hi. A vekpi in mihing 4,600 kipaipui hi.

³¹Evilmerodach sia Babylon kumpi a sua kumin, ama in Judah kumpipa Jehoiachin sia thong panin a pusuasakna taw a dik na lak hi. Hi bang a suataksak ni sia Jehoiachin thongtaak a, a kipaipui zawk kum sawmthum le kum sali kum, a tha sawm le tha niina ni kul le ni nga ni ahi hi.

³²Evilmerodach in Jehoiachin phat vawt a, Babylon ah ama taw saltaang khawm kumpi dangte sangin a vaang piakna lian zaw hi.

³³Tua ahikom Jehoiachin sia a thong puante kilaihsakin a nuntak lai teng kumpipa ii sabuai ah an kinesak hi.

³⁴A nuntak sung ni sim a kisap na ah a zak tu in ama sia dangka kipia tawntung hi.