Read Siyin Chin Jeremiah 6 Bible Online

Jeremiah 6 - Siyin Chin bible

Jeremiah 6

¹Benjamin mite awng, na kihuuk natu uh in tai vun! Jerusalem khua panin kisuatak tavun! Tekoa khua ah lemle tum vun a, Beth Haccherem khua ah kiheaksakna mei thut vun. Tuasiatna le suksiatna sia saksang pan hong pai tu hi.

²Zion khuapi et hoi hi, ahihang kisusia tu hi;

³kumpite in a ngalkap honte uh taw tua munah ngiaphual saat tu uh hi. Amate in khuapi kiimkot ah a puanbukte uh sa in, a uuk na tek po ah ngiak tu uh hi.

⁴Amate in, “Jerusalem sim tu in kithoai vun! Kinging vun! Sunkim laitakin ih sim tu hi!” ci tu uh hi. Ahihang amate ma in, “Hai lei zo hing, ni tum dektak zo a, nitak limhte sau zo hi.

⁵Zan ciangin ih sim tu a; khuapi dalna kulhte ih susia tu hi,” ci tu uh hi.

⁶Vaanglianbelpa TOPA in Jerusalem uumci natu in thing kungte phukin leivumte a vawt natu in hi kumpite thupia hi. Ama in, “Keima in hi khuapi daan ka pia tu hi, banghang ziam cile hi khuapi sia kizawthawkna taw kidim hi,” ci hi.

⁷Tuikhuk in a tui a thiansak tawntung bangin, Jerusalem khua in a siatna thaksua tan hi. Khua sungah ngoltolna le suksiatna thu ka za a; ci natna le liamnate vive ka mu hi.

⁸Jerusalem mite awng, hi ngimnate sia na kidop natu uh hi tahen, tua ahibuale no kong nusia tu hi; na khuapi sia kuama ii ten ngawlna mun sennealngam ka suaksak tu hi,” ci hi.

⁹Vaanglianbelpa TOPA in keima tungah, “Israel sia sapitnga a kilo siat sa sapithuan khat bangin kithiangsak tu hi. Tua ahikom hun om lai in mihing na suatak thei theampo suatak hamtang in,” hong ci hi.

¹⁰Keima in, “Amate tungah kidop natu thu ka son hial zong akua in hong ngai nuam thong tu ziam? Amate a thinpui a, na thupuak ngai nuam ngawl uh hi; son tu a, nong sawlte amate nuiza bek hi.

¹¹Amate ii tungah na thin uukna sia keima sung zongh ah meisa bang hi a, TOPA awng, ka thuak zo nawn bua hi,” ci in ka zo hi. Tuaciang TOPA in, keima tungah, “Ka thin uuk nate lampi ah om patangte tung le tangvalte kikhopna munah buak in. A pasalte le a zite kila tu a, a huai mama te ngawngawn zongh kikhe ngawl tu hi.

¹²A innte sia midangte kipia tu a, a lote le a zite uh sia tuabang ma in midangte kipia tu hi. Hi ngammite daan ka pia tu hi.

¹³A kuama po, a lian a no in a thumaan ngawlin sum zon tu hanciam uh hi; kamsaangte le thiampite ngawngawn zongh in mite theam uh hi.

¹⁴Ka mite ii liamna mate sia a vuntham bak bang bekin amate in ngaisun uh hi. Pha siat ngawl napi, ‘Pha siat hi,’ ci uh hi.

¹⁵Hi a kiihuai nate a vawt uh hu in amate a maizum ziam? Hi ngawl hi, maizum dek ngawl a; maizum natu zia zongh he ngawl uh hi. Tua ahiciang midangte ii puk bangma in amate puk tu uh hi; amate daan ka piak ciang, amate bona hi tu hi. Keima TOPA in ka son zo hi,” hong ci hi.

¹⁶TOPA in a mite tungah, “Lamkaa bom ah dingin khuadak vun. Taangh lampite le a phabel lam sia koisung ziam ci in dongh vun. Tuasia tawn vun, tua hile thinnuamin na om tu uh hi,” ci hi. Ahihang amate in, “Hi ngawl hi, ko tawn ngawl tu khu hi!” ci hi.

¹⁷Tuaciang kidop natu lemle aw ngai tu in TOPA in ngalvilte koi hi. Ahihang amate in, “Ngai ngawl tu khu hi!” ci uh hi.

¹⁸Tua ahikom TOPA in, “No minamte awng, ngai vun, ka mite tungah bang thu piang tu ci sia he vun.

¹⁹Leitung awng, ngai in! Amate in ka thuhil na nial a, ka kammalte mang ngawl ahikom, hi mite ii sawm nate theampo taw kiphu in daan piakna ahi siatna ka tungsak hi.

²⁰Amate ii kei atu Sheba ngam panin ngimnamtui hong puak sia, ahibuale ngam khuala pan hel namtui hong puakte bangma ka awlmawk bua hi. Amate ii hong piakte ka saang buatu hi, ahibuale a biakpiaknate taw lungkim ngawl tu khi hi.

²¹Tua ahikom hi mite lutu in ka puksak tu hi. Nu le pate le a tate a thi uh bangma in innpaamte le lawm le ngualte thi tu uh hi,” ci hi.

²²TOPA in, “Saksang ngam khat panin mite hong pai hi; a khuala na pan a thahat ngam khat sia ngal sim tu in kithawthoai hi.

²³Amate in a thal le a namsaute toai zo a; ngilo in ngual hesuakna thin nei ngawl uh hi. Amate in a siphu tung tek a to uh ciang, tuipi hawk bangin nging hi. Amate in Jerusalem sim tu in a kinging sa in om uh hi.” ci hi.

²⁴Jerusalem khua mite in, “Tua thute ih za zo hi, tuaciang ih khutte zaw hi; thinngimna in hong lencip in nau tun numei khat bangin na ih sa hi.

²⁵Ngamsung teng ah ih pai ngam bua a lampi tung zongh ah ih vak ngam bua hi, banghang ziam cile ih ngalte in hiamh toai a, ih kiim ih paam theampo lauhuai siat hi,” ci uh hi.

²⁶TOPA in a mite tungah, “Khuangai in, Khau-ip puan silhin vut sungah kilumliik vun. Tapa khat a nei sun sia in a thi san hu in thitui luang in kap vun, banghang ziam cile no hong susia tu hong pai pa in thakhat thu in hong sim tu hi.

²⁷Jeremiah awng, leisung sumpiang na sit tu bangin, ka mihingte sit in a, amate bang taw kibang ziam cisia telthiang in.

²⁸Amate a vekpi in a thinpui, ngaltho nuamte hi a, a thin uh sia taau le thik bangin sak uh hi. Amate sia a ngamtat sia siat uh a, vak kawkoai in heltuana laklaw thu poai kawkoai uh hi.

²⁹Pummei sia nasia takin kuang ahihang thik eak sia tuitham ngawl hi. Ka mite a thiantho natu sit suak lai tu sia luithawthong hi, banghang ziam cile a tatsia mite a kila keak bua hi.

³⁰Amate sia a mannung ngawl thik eak kici tu hi, banghang ziam cile keima, TOPA in amate ka nial zo hi,” ci hi.