Read Siyin Chin Kaa late 2 Bible Online

Kaa late 2 - Siyin Chin bible

Kaa late 2

¹TOPA a thin uuk in Zion sia khuazing taw tuam zo hi. A vantung hoina te ama in sia sak zo hi. A thin uuk ni in a Biakinnpi ngawngawn nusia hi.

²TOPA in Judah ngam khuano theampo hesuak ngawlin lalthamsak a, Ngam huukna kulhpite baltham hi. Ama in kumpi ngam le a ukte maizum pia hi.

³Ama in a thinso in Israel te thahatna saattham hi. Ngalte hong kuan ciang ama in hong hu nuam ngawl hi. Kaanghmei bangin ama in ei hong zaap keak a, na theampo lalthamsak hi.

⁴Eite sia ngal bang phetin a thaltangte taw hong tuung hi; Ih lungdamna le ih diksak theampo ama in thatlum hi. Hi lai Jerusalem ah ama ii thin uukna meikuang eite in ih thuak hi.

⁵TOPA in ngal khat bangin Israel susia zo hi. Ama in a kulhte le kumpi innte a zaancip sa in nusia hi. Ama in Judah mite tungah a bo thei ngawl heena tungsak hi.

⁶Ama ih biakna mun Biakinnpi sia ama in a bebekin sutham hi. Ama in ni thiangthote le Sabbath te bosak zo hi. Kumpipa le thiampipa in ama thin uukna a kibangin thuak khawm uh hi.

⁷TOPA in a biaknatau nial a, ama ii a thiangtho Biakinnpi taisan hi. Ama in Biakinn pangte sia ngalte in balthamsak hi. Khatvei lai in lungdamna taw ih biakna munah amate ngalzo in au uh hi.

⁸Zion khuapi luphungte a cipthap tu sia TOPA in ciangtan zo hi. A vekpi a sia tu in ama in see zo hi. Tu in tausaangte le luphungte lal khawm hi.

⁹Kongpite sia leivum suangvum sungah kivuknelh a, a zawlte a bebekin kivaat tham zo hi. Kumpipa le namliante tu in saltaang in om hi. Thukham kihil nawn ngawlin, kamsaangte in mu kholnate TOPA ii tung pan nga ngawl hi.

¹⁰Jerusalem ii pasal huaite sia huthe ngawlin lei ah to khipkhep uh hi. A lu tungah leivui kithe in khau-ip puan silh uh hi. Ngaknu note lei ah a lu kun uh hi.

¹¹Ka ka kaana in ka mitte paat zo a, ka thin na mama hi. Ka mite lalna hangin hee in ka tha zawm ngawp hi. Patangnote le nausente khuapi lampite ah butthi uh hi.

¹²Amate ngilkial dangtaak in a nute kaa uh hi. Amate sia a liamte bang phetin lampi ah puk uh a, Tuaciang a nute ii kaang sungah dadam in thi uh hi.

¹³Jerusalem awng, kong it Jerusalem awng, bang kong ci thei tu ziam? Bangbangin nang hong heeneam thei tu khi ziam? Kuama in hi bang peuma in thuak ngeingawl hi. Na tuasiatna sia tuipi bangin mong nei ngawl a; bangma muanmawk thei tu om ngawl hi.

¹⁴Na kamsaangte in leilot thu ngawl po nang tungah son tu nei ngawl hi. Na mawna a pholaak ngeingawl amate thuhilna taw nang hong theam ahi hi. Amate in na kisii kik tu a kul ngawl tu dongin hong ngaisunsak hi.

¹⁵Khuapi kaantan in a pai mihingte in nangma hong ngaimawk et uh hi. Amate in Jerusalem ii zaanthapna sia a lu pei in nuisan uh hi: “Hisia, tua khuapi hoi sia ma hi kana ziam? Hisia, leitung bup ii kiphatsakpui sia hi ka na ziam?”

¹⁶Na ngalte theampo in hong selno in etsatna taw nang hong salh uh hi. Amate mukmen in “Khuapi lalthamsak zo hing! hisia ih ngalaakbel ni hi!” ci in selno uh hi.

¹⁷TOPA in hong tawnna teng a khak belin tungsak hi. Ama in hun saupi lai a eite kidop natu hong hil sa bangin hesuakna om ngawlin hong lalsak hi. Ama in ih ngalte ngalzosak a, ih ngallelna ah amate lungdamsak hi.

¹⁸Jerusalem awng, na luphungte mama in TOPA ko tahen! Na thituite a sun a zanin ngun bangin luangsak in; kaana le khuangaina taw nangma le nangma kingawt in!

¹⁹Zankhuateak TOPA tungah ko tu in tho kikik in! Na thin na lung takpi taw na patangte — lampi king sim ah neak tu nei ngawl pukhong in a thi tu na patangte atu in ama tungah hesuak ngen in.

²⁰En in, TOPA awng! Banghang hi bangin daan hong thuaksak ni ziam! Nupite in a it a tate ii sa ne uh hi! Thiampite le kamsaangte sia Biakinnpi sung mama ah kithatlum hi!

²¹A moi a haam a kibangin lampi ah thi uh hi. Ngalte in ngaknu le tangval teng namsau taw thatlum uh hi. Na thin uuk ni in hesuak ngawlin amate na thatlum hi.

²²Nangma in keima ii kiim ah hong lausak poai vawt tu in ka ngalte na sam a, Tuaciang tua na thin uuk ni in kuama suakta zo ngawl hi. Amate in itna taw ka vak ka taa sa tanote suamlum uh hi.