Read Siyin Chin Kaa late 3 Bible Online

Kaa late 3 - Siyin Chin bible

Kaa late 3

¹Pathian ii daan piakna bangbang tatak hi tu ziam ci in a he sia keima ka hi hi.

²Ama in khuazing sungah a thuk vaial, a thuk vaial in kei hong hawlkeak hi.

³Tuaciang ama in hong hesuak ngawlin kei hong vevel hi.

⁴Ama in ka samal sia a at babangin nusia a, ka ngu ka taang thiaktan hi.

⁵Ama in thasiatna le mauna thong sungah hong khum hi.

⁶Ama in a uih thina khuazing sungah kei hong teangsak hamtang hi.

⁷Ama in thikkhau taw hong heen a; suatak tu muanmawk om ngawl thongtaak a, a luangta khat ka hi hi.

⁸Hu ngenin nging takin ka kap a, ahizong Pathian in hong ngai nuam ngawl hi;

⁹Lam ka pai ciang ka hoi vadai a; ka heakna mun theampo ah suangpangte in ka mai hong khak hi.

¹⁰Vompui khat bangin ama in kei hong pang nginge a; tawpi khat bangin ama in hong baw hi.

¹¹Ama in lam puasia ah kei hong del a, hong balneen in hong nusia hi.

¹²Ama in a thal keak a, kei sia a thaltangte taw phutuunna in hong nei hi.

¹³Ama in a thaltangte taw ka pumpi thuk bunin hong kap hi.

¹⁴Mihingte in sunkhuateak in kei hong nuisan a; amate theampo atu in kei sia ciammuina ka suak hi.

¹⁵An le tui hong piak taangin ama in nasia takin hong thuaksak hi.

¹⁶Ama in ka maitang lei ah hong tat a, suangtum tungah ka hate sutan hi.

¹⁷Cidamna, thinnopna le lungdamna cite bang ziam ci sia ka mangil zo hi.

¹⁸Khuangei nungta nawn ngawl tu khi hi; TOPA sungah ka lametna bo zo hi;

¹⁹Natna ka thuakna, inn le lo nei ngawlin ka omnate ka ngaisut sia nguu ahi hi.

²⁰A tawntungin tuate ka ngaisun a, ka thin kiam hi.

²¹Ahizong hi thu khat ka phaw ciang, lametna hong piang kik hi:

²²A kiam ngeingawl TOPA ii hong itna le hong hesuakna kizom suak lai a;

²³zing khuavak bangin thak suak tawntung a, nisuak pealmaw bang ahi hi.

²⁴TOPA bekma ka nei hi a, ama tung bek ah ka lametna ka koi hi.

²⁵Ama a muangte theampo tungah TOPA pha hi.

²⁶Tua ahikom eite atu in, thin sauna taw ama ngakin ih om tu — eite hong ngum tu in ama ngakin ih om tu — phabel hi.

²⁷Ih khan moi lai in hi thinsauna sin tu phabel hi.

²⁸Ngimna ih thuak ciang thinsauna taw thimdide in eima nguak ih to tu ahi hi;

²⁹Kipum aapin ih kun tu ahi hi, banghang ziam cile lametna om thei lai tu hi.

³⁰Hong kivua in hong kizawngsak kale tuate theampo ih saang thiam tu hi.

³¹TOPA sia hesuakna taw kidim a, a tawntungin eite hong nial ngawl tu hi.

³²Ama in eite heena hong thuaksak thei tu hi, ahihang ama ii eite hong itna sia maan in kho hi.

³³Ama in eite hong khuangaisak, hong natsak sia nuamsa tuan ngawl hi.

³⁴TOPA in thong sungah thinngimna ih thuak ciang hong heaksak a;

³⁵Ama ii eite hong piak hamphatna te ih taan ciang hong heaksak hi;

³⁶thukhenzum ah thutang khenna a om ngawl ciang, ama in he hi.

³⁷TOPA deina sia bekma kiseam suak tawntung hi.

³⁸Ama thu piakna zui in a pha le a sia a kibangin piang hi.

³⁹Ih mawna hangin daan hong kipiak ciang banghang phuphun tu hi ziam?

⁴⁰Ih kalsuan nate en pha kikin TOPA kungah heak kik tawng.

⁴¹Vantung a om ih Pathian tungah ih thinsung kongkha hongin thungen tawng,

⁴²“TOPA awng, kote mawin, kong langpan zo uh a, nangma in nong maisak bua hi.

⁴³“Nangma in kote nong zuizen a nong thatlum hi; na thin uukna in na hesuakna seal hi,

⁴⁴na thinsona meeikaai sia saa leih ahikom kote thungetnate nang kungah hong theng zo ngawl hi.

⁴⁵Nangma in kote simlei ninthuk nong sua hi.

⁴⁶“Ka ngalte theampo in kote hong selno in hong nunau uh hi.

⁴⁷Kote in tuasiatna le siatna ka thuak zo uh a, launa le kiitakna sungah ka nungta uh hi.

⁴⁸Ka mite siatna hu in ka thituite ngun bangin luang hi.

⁴⁹“Ka thituite sia

⁵⁰TOPA in vantung pan hong ensuk a, eite hong mu dong a kangmaw lui bangin luang vapua top hi.

⁵¹Khuapi sungah numeite bang tawk ziam ci sia ka mu ciang ka khuangai mama hi.

⁵²“Kei hong ngaimawk natu thu a nei ngawl ngalte in, vacim khat bangin thaang sungah kei hong awksak hi.

⁵³Amate in leidum khat sungah hingtangin hong khiasuk a suang khat taw akua vang khak uh hi.

⁵⁴Tui in hong khuum tu in kithoai a, tuaciang thina a nai sia ka ngaisun hi.

⁵⁵“TOPA awng, dum tawtawngh panin nang kong sam hi,

⁵⁶Kong sapna hong ngai ta'n ci in kong nget ciangin nong za hi.

⁵⁷Nong zo a, lau heak in nong ci hi.

⁵⁸“TOPA awng, kei hong suatak tu in nong pai a, ka nuntakna nong hun hi.

⁵⁹Kei sangah pangin thu hong khen ta'n; kei tungah a maan ngawl hong kivawtnate na he hi.

⁶⁰Ka ngalte ii hong etsatzia le hong thasawm zia na he hi.

⁶¹“TOPA awng, amate ii kei hong lan nate na za zo hi, amate ii hong thasawm nate theampo na he hi.

⁶²Amate in sunkhuateak in kei thu kikum in vaihawm uh hi.

⁶³Amate in kei sia zingsang pan khuazan dong ciammuina in hong nei uh hi.

⁶⁴“TOPA awng, amate a ngamtatnate hu in daan pia in;

⁶⁵Amate haamsiat in, thinkiamna taw kidimsak in!

⁶⁶Amate vai zui in a, leitung pan phiat keak in!”