Read Siyin Chin Kaa late 4 Bible Online

Kaa late 4 - Siyin Chin bible

Kaa late 4

¹Ih khamh tee vakilte mualmang zo hi; Biakinnpi sakna suangte lampi ah kithethaang in om hi.

²Zion ii tangvalnote sia khamh bangin ei atu in manpha hi, ahihang tu in leibeal thawthongte bangin kivawt hi.

³Ngiapui khat ngawngawn zongh in a note ou tu hi, ahihang ka mite ahile a tate tungah a ngilo kalaoh vacim puite bang ahi hi.

⁴Amate in a nausente ngilkial dangtaak in thisak hi; tanote in an ngen a, ahihang kuama in amate an pia ngawl tu hi.

⁵An phabel a ne ngei mihingte sia lampi ah anngawlin pukthi uh hi; a nuamsa in a khangte in an zongin ninbung tok uh hi.

⁶Ka mite sia thakhat thu in Pathian khut sa a thuak Sodom a teang mihingte sangin nasia zaw in daan kipia hi.

⁷Ih kumpi tapate sia kiihuai ngawl hi, vuuk bangin thiangtho a, thahat in taktai a ciidam sitset uh hi.

⁸Tu in amate sia kuama heak ngawlin lampi ah kisial uh a; thi in a mai mual uh hi; a vun uh tun a, thingko bangin ko in a ngute tungah bel hi.

⁹Ngal sungah a thite sia nuntak zawk natu an om ngawl a, dadam in a thi, a thi khakte sangin phazaw lai hi.

¹⁰Ka mite tungah a tung tuasiatna sia cizat huai mama hi, a nute in a neak tu in a tanote huan uh hi.

¹¹TOPA in a thinsona teng nasia takin hong buak hi. ama in mei taw Zion halin kaanghtumsak hi.

¹²A kuama peuma, ngamdang ngamukte ngawngawn in Jerusalem ii kongpite sungah ngalte tum thei tu ci in um ngawl uh hi.

¹³Ahihang hisia thu piang hi, banghang ziam cile a kamsaangte maw a, a thiampite in mawnei ngawl mihingte a a thisak uh hang ahi hi.

¹⁴Mittawte bangin a lampuite lampite ah vakvai uh a, chisan baang ngawp ahikom kuama in amate tham ngam ngawl uh hi.

¹⁵Mihingte in amate oksan a, “Tai vun! note kiihuai nu hi! Kei hong thutha heak vun!” ci uh hi. Tua ahikom amate ngam khat pan ngam khat ah pai kawkoai a, kuama in muak ngawl hi.

¹⁶TOPA in amate awlmaw nawn ngawl a; amate thethaang hi. Ama in ih thiampite le ih lampuite bangma in hong hensak ngawl hi.

¹⁷Eite in hong pai ngeingawl tu bul huna lamen in khuadak zawk nawn ngawl tu dong khua ih dadak hi. Eite in piak tu a nei ngawl ngam khat tung pan huna ih ngangak hi.

¹⁸Ngalte in eite hong encik a; lampite ah vak zongh ih vak thei bua hi. Ih nite bo zo a; a tawpna hong theng zo hi.

¹⁹Muvanlaite van pan suktun a hong len sang a manlang zaw in amate in ei hong zuizen suk hi. Amate in mual tungah ei hong sul zui a; sennealngam ah muanmawk ngawlin ei hong phaa hi.

²⁰Amate in ngalte khut sung pan hong dal zo tu in ih muan, ih nuntakna ii naak a hi, TOPA tealsa kumpipa sia man uh hi.

²¹Edom le Uz mite awng, nui vun; na lungdam thei uh lai teng lungdam vun. Na tuasiat natu uh zongh hong tung tu hi; note zongh maizumna taw na pumnguakin na hoi vacit tu uh hi.

²²Zion in a mawna thaman pia zo a; TOPA in eite saltaang in hong koi nawn ngawl tu hi. Ahihang Edom awng, TOPA in nang daan hong pia tu hi; ama in na ngamtat khialnate pholaak tu hi.