Read Siyin Chin Kaa late 5 Bible Online

Kaa late 5 - Siyin Chin bible

Kaa late 5

¹TOPA awng, ko tungah hong piang thute phawk in. Kote hong en ta'n a, ka maizumna uh mu in.

²Kote neisa sia khualmite khut sungah om a; ngamdangmite sia koma inn sungah teang uh hi.

³Koma pate sia ngalte in thatlum zo a, tu in koma nute sia meingong suak uh hi.

⁴Kote dawn tu tuite man piak kul a, kote thu tu thingkangte lei kul hi.

⁵Kalaohte le laate bangin hong kihawl ngawp a, toi mama hikale ung hong tawlngasak ngawl hi.

⁶Nuntak khom natu an ka nga natu uh in Egypt le Assyria ah an ngenin ka pai uh hi.

⁷Koma taanghpupite mawna hi a; ahihang tu in amate om nawn ngawl hi, amate mawna hu in kote in ngimna ka thuak uh hi.

⁸Silate sangin a phazaw tuan ngawl mihingte in ko hong uk a, amate khut sung pan kuama in hong hun zo ngawl hi.

⁹Ngam sungah mithatte vak kawkoai a, an ka zon uh ciang, luangkhaamin ka zong uh hi.

¹⁰Ngilkialna in ka ci uh hong suuksak a, koma vunte meikhuk bangin a sat dong ka thuak uh hi.

¹¹Zion Mualtung mama ah koma ii zite hong buansak uh a; Judah ngam khuano theampo ah koma ii tanute zothaw in khialpui uh hi.

¹²Koma ii lampuite hong matsakin ngui awksak a; koma ii pasal huaite hong zataksak bua uh hi.

¹³Koma ii tangvalte sia silate bangin zawthawk thu taw an ngoaisak uh a; patangnote sia a thing puak uh khopin hoi vatut uh hi.

¹⁴Khanghaamte khuapi kongpi ah to nawn ngawl a, khangmoite sia tengtongh tum nawn ngawl uh hi.

¹⁵Kote nuntakna sungah lungdamna bo zo a; kote ngualnop lapna teng sia khuangaina taw kilaih zo hi.

¹⁶Ko kiphatsakpui nate khat zongh taang nawn ngawl hi. Kote ka maw uh a, tu in a bo ka hi uh hi.

¹⁷Kote ii ka thin ka lung mama uh na a, ka thituite uh hangin pha tak khua ka mu thei bua uh hi,

¹⁸Zion Mual sia ngamkhing ngamdai in kinusia ahikom tua a kisia sa munte ah ngam uite vak hi.

¹⁹Ahihang TOPA awng, nangma sia a tawntung kumpipa na hi a, hun tawp dongin na uk tu hi.

²⁰Banghangin tu tanvei kote hong nusia ni ziam? Kote nong phawk kik ngei tu ziam?

²¹Na kungah ko hong ciapui kik ta'n, TOPA! Hong ciapui kik ta'n! Taanghlai in koma minthanna teng hong pia kik ta'n!

²²Tua ahibuale kote a tawntungin hong nial tu ni ziam? Na thin uukna in ciangtan nei ngawl ahi ziam?