Read Siyin Chin Ezekiel 10 Bible Online

Ezekiel 10 - Siyin Chin bible

Ezekiel 10

¹Cherub te ii lu tung san ah a kikhup siin sia ka en a, a tungah sapphire suang manpha taw a kivawt kumpi tokhum bang khat a om hi.

²Pathian in puanneal a silh pa tungah “Cherub te ii nuai, a muite ii kawm ah pai in na khut dimin suang meihol kamte toai ta'n. Tua zawkciang khuapi tungah the suk in,” ci hi. Ama ii paikhiat ka en hi.

³Cherub te sia ama ii tum laitakin Biakinnpi thang sangah ding uh hi, tuaciang a suumsung sungnung sia meeikaai in tuam hi.

⁴TOPA ii omna po ah khuavak taang velvol sia cherub te kung pan kikhaangto a Biakinn tumna ah kikhiin hi. Tua zawkciang meeikaai in Biakinnpi tuam a, leitual sia taang pempom hi.

⁵Cherub te thaphil nging sia a suumsung puanung ngawngawn dongin kiza hi. Tua awnging sia Vaanglianpipa Pathian ii aw bang ahi hi.

⁶TOPA in puanneal a silh pa tungah cherub te ii nuai a muite kawm pan meikuang la tu in sawl hi. Tua pa pai in tua a mui khat ii hui ah ding hi.

⁷Cherub te sung pan khat in, amate sungah a om mei sia a khut taw sawkin, meikam pawlkhat la in, puanneal silh pa ii khut sungah koisak hi. Tua pa in meikamte toai in, tuaciang a paisan hi.

⁸Cherub khat simin a thakhui nuai tek ah mihing khut bang veu a nei ka mu hi.

⁹A kibang linlian mui li zongh ka mu hi, tuate sia kibang a, cherub khat ii pangh ah khat tek om hi. A muite sia suang manpha bangin taang a, tuaciang khat ii sungah a mui dang khat a king kitangin kithua hi.

¹¹Cherub te a kikhiin uh ciang, a kiheak kul ngawlin a pai nopna pawpo ah pai thei uh hi. Amate sia a pai nopna san tek ah paikhawm tek a, kiheak a kul bua hi.

¹²Amate ii pumte, nungzaangte, khutte, thate le a muite sia mittang taw kidim hi.

¹³Hi a muite sia ka mangmu maksak sungah ka mute taw ma kibang hi.

¹⁴Cherub sim in maitang li veu nei uh hi. A masa phitbel sia khuital maitang, a niina sia mihing maitang, a thumna sia tawpi maitang le a lina sia muvanlai maitang ahi uh hi.

¹⁵(Tuate sia Chebar Ngunhui ah ka mu cherub te ma ahi uh hi). Cherub te vui sungah kikhaangto in,

¹⁶a kikhiin uh ciangin a muite in zui uh hi. Amate in leang tu in a thate a phil uh simin a muite in a zui lai uh hi.

¹⁷Cherub te a tawlngak uh ciang a muite zongh tawlnga uh hi; tuaciang cherub te a len uh ciang a muite in zui uh hi; banghang ziam cile cherub te in a muite a uk uh hi.

¹⁸Tuasia zawkciang TOPA ii ompuina po ah khuavak taang velvol sia in Biakinnpi tumna mun nusia in cherub te ii tungsia mun khat ah kikhiin hi.

¹⁹Amate in a thate phalhin, lei panin ka mu tangin a lento ciang, a muite in zui uh hi. Amate sia Biakinnpi ii nisuana sang kongpi ah tawlnga zii a, khuavak taang velvol sia amate tungsia ah om hi.

²⁰Chebar Ngunhui Israel ii Pathian nuai ah ka mu sa cherub te ma hi ci sia ka tel hi.

²¹Amate sim in maitang li tek, tha li tek le, thakhui nuai tek ah mihing khut taw a kibang khat tek nei uh hi.

²²A maitangte sia Chedar Ngunhui ah ka mu maitang te taw kibang linlian hi. Cherub sim in a maisang tek ah tang takin kikhiin uh hi.