Read Siyin Chin Ezekiel 13 Bible Online

Ezekiel 13 - Siyin Chin bible

Ezekiel 13

¹TOPA in hong paupui hi.

²Ama in, “A thithei mihing awng, amate phuatawm kamsaanna a son Israel kamsaangte nalh in. TOPA ii kammal a ngai natu in amate son in,” hong ci hi.

³Hi sia Vaanglianpipa TOPA ii ci ahi hi: “Hi a mawmaw kamsaangte a lal hi zo hi! Amate aituam ngaisut thiamna taw mu kholnate phuak tawm uh hi.

⁴Israel mite awng, na kamsaangte uh sia khuapi lalcipna sungah a teang ngiate bangma in mannung ngawl hi.

⁵Amate in luphung cimhna munte cing ngawl a, ciang zongh ciang kik ngawl hi. Tua ahiciang, Israel te sia TOPA ii ni, ngal hong thet ciang kihuu zo ngawl tu hi.

⁶Amate mukholna sia maan ngawl a, a thu sonkholte sia leilot thu hi. Amate in kei kam vaithak hi ci ahihang, keima in amate thataak ngawl khi hi. Tua hi napi in, amate in a kammalte taangtung tu in muangmaw uh hi!

⁷Amate munah ka ci hi: Tua na mukhol uhte maan ngawl a, na sonkhol thute sia leilot thu hi. Tuate sia keima ii kammal na ci uh hi, ahihang no tungah hong son ngeingawl khi hi!”.

⁸Tua ahikom Vaanglianpipa TOPA in amate tungah “Noma kammalte sia maan ngawl a, na mukholna uhte sia leilot thu hi. No hong langpan khi hi.

⁹A maan ngawl mukholna te le lamkhialsak tu sonkholnate a nei no kamsaangte daan kong pia tu hi. Thukhen tu in ka mite a kikhop ciang, tua munah na om buatu hi; Israel ngammite tepteena lai sungah na min uh a kihel buatu hi. Na ngam uh ah na heak kik ngei buatu uh hi. Tuasia ciangin kei sia Vaanglianpipa TOPA ka hi hunlam na he tu uh hi.

¹⁰“Kamsaangte in ka mite sia na theampo pha hi a ci na taw lamkhialsak uh hi. Na theampo pha siat ngawl het hi! Ka mite in luphung sia suang thawthongte taw ciang a, tuaciang kamsaangte hong pai in, tua pang sia leikaang taw zut hi.

¹¹A luphung cimhtham tu hi ci in kamsaangte son vun. Buak bangin ngua ka zusak tu hi. A tungah ngialtangte hong kia tu a, vuipi thahat khat in seam tu hi.

¹²Luphung sia topcip tu hi. Mihing theampo in leikaang tui ii kimanna sia bang ziam ci in nang hong dongh tu uh hi,” ci hi.

¹³Tu in hisia Vaanglianpipa TOPA ii pauna hi: “Ka thin uukna taw luphung susia tu in vuipi thahat khat, biing a beal a sun bangin nguatui le ngialtangte ka buak tu hi.

¹⁴Amate ii leikaang taw a zut luphung sia vaat thapsak tu, semthap tu le a phungkawng suang teng nguak kheetsak lai tu ka sawm hi. A luphung sia puk tu a, note theampo hong dellum tu hi. Tuasia ciang a kuama po in kei sia TOPA ka hi hunlam hong he tu uh hi.

¹⁵“Luphung le tua luphung leikaang taw a zutte in ka thin uukna ii thahatna a thuak tu uh hi. Tuasia ciangin, tua luphung bo zo a, tuasia bangma in leikaang taw a zutte —

¹⁶na theampo a phat ngawl laitakin, pha siat hi ci a Jerusalem a thinmuangsak kamsaangte sia bo siat zo hi,” ci in nang kong son tu hi. Vaanglianpipa TOPA in son zo hi.

¹⁷TOPA in, “Tu in a thithei mihing awng, na mite sungah mailam thupiang tu a sonkhol numeite en in. Tuate nalh in a,

¹⁸tuaciang, Vaanglianpipa TOPA in amate tungah hi bang a ci sia son in: “No numeite a lal hi uh te! Note in midangte nuntakna ah vaang na nei thei natu uh in, a kuama theampo atu mitbum khut tuamnate na khuisak a, a kuama po ii lu tungah a khip tu in, mitbum dialnote na vawtsak uh hi. Ka mihingte tungah thina le nunna vaang na nei nuam uh a, tua vaang sia noma phattuamna tu in na zangh nuam uh hi.

¹⁹Mangtaang tang tawm le anluum tawm na nga natu in, ka mite mai ah hong maimawlsak nu hi. Thi tu a, a kilawm ngawl mihingte na thatlum uh a, nungta tu a kilawm ngawl mihingte na nungtasak uh hi. Tua ahikomin, ka mite tungah leilot thu na son uh a, amate in no hong um uh hi.”

²⁰Tu in hisia Vaanglianpipa TOPA ii ci teng ahi hi: “Thina le nuntakna uk nuamin na hanciamna ah na zak uh khut tuamnate ngaimaw khi hi. Tuate na baan panin ka laaikeak tu a, na uk mihingte ka suaktasak tu hi.

²¹Noma dialnote ka baltham tu a, ka mite na vaangletna nuai pan a tawntung atu in, khatvei lian ka suaktasak tu hi. Tuaciangin, kei sia TOPA ka hi hunlam na he tu uh hi.

²²Ka liamsak nop ngawl mihing phate, na leilotna taw thinkiamsak nu hi. Mihing ngilote a siatna nusia in, a nuntakna uh a kihut natu pan na khaktan uh hi.

²³Tua ahikom, tu in na mukholna a maan ngawlte le lam hong pialsak thu sonkholte bo zo hi. Keima, TOPA ka hi hunlam na heak natu in na vaangletna pan ka mite ka suatak hi,” ci hi.