Read Siyin Chin Ezekiel 14 Bible Online

Ezekiel 14 - Siyin Chin bible

Ezekiel 14

¹Israel lampuite pawlkhat TOPA ii deina dongh tu in hong haw hi.

²Tua zawkciangin TOPA in kei hong paupui hi.

³Ama in, “A thithei mihing awng, hi mite in a thinsung uh sia milimte pia zo a, milimte in amate mawna sung thet pui hi. Amate in tua thu keima in zo kik tu in hong um ziam?

⁴“Tu in amate tungah Keima, Vaanglianpipa TOPA in hi bang ka ci sia son in: Israel milimte tungah a thinsung a pia peuma le tuate in mawna sung a thetpui zawkciang, kamsaang khat ii tungah thu a dongh te in, keima zo kikna khat a nga tu hi — tua in milim teng taw a kiphu zona hi tu hi!

⁵Tua milimte in Israel te sia kei kung pan kiheaksak hi, ahihang ka zona taw amate ii citakna hong nei kik tu in ka lamen hi.

⁶“Tua ahikom tu in, kei Vaanglianpipa TOPA ii Israel te tungah ka ci teng son in: Hong heak kik tavun a, a kiihuai milimte nusia vun.

⁷“Israel te khat po ahibuale, Israel mite omna sungah a teang ngamdangmi khat po in kei kung pan kiheakin, milimte bia a, tua zawkciang, kamsaang khat thu a dongh le Keima, TOPA in ama ii zona tu ka pia tu hi!

⁸Ama ka nalh tu hi. Ama sia ettee tu khatin ka koi tu hi. Ama sia Kei, TOPA ka hi hunlam nong heak natu in ka mite huamsung panin ka heam tu hi.

⁹“Kamsaang khat in theam thuakin, a maan ngawl zona a pia le Kei, TOPA in ama ka theam hu a hi hi. Israel mite huamsung panin ama ka heam tu hi.

¹⁰Kamsaangpa le a dongh pa sia daan a kibangin nga tu hi.

¹¹Israel te in kei hong taisat ngawl natu le a mawna a khialna te taw amate le amate a kininsak ngawl natu in hi bangin ka vawt tu hi. Amate sia ka mite hi tu a, Keima in a Pathian ka hi tu hi.” Vaanglianpipa TOPA in son zo hi.

¹²TOPA in kei hong paupui hi.

¹³Ama in, “A thithei mihing awng, ngam khat maw a, kei tungah hong thumaan buale, ka khut ka vaan tu a, a an ngana lampi sia ka susia tu hi. Kialpi ka tungsak tu a, mihing le ngannote a kibangin ka thatlum tu hi.

¹⁴Noah, Daniel, Job, mihing thumte tua munah a teang hial zong, a phatna in amate nuntakna bekma ngum tu hi,” ci hi. Vaanglianpipa TOPA in son zo hi.

¹⁵“Tua ahibuale mihing te a that tu in ngamsa te ka paisak tu a, kuama ngam sungah khualhaw in a kaantan ngam ngawl dongin ka lauhuaisak mama tu hi,

¹⁶tuaciang tua mihing thumte keak tua munah a teang hial zong — Keima Vaanglianpipa TOPA, a nungta tatak Pathian ka hi bangma in — a tate ngawngawn zongh a hun zo buatu uh hi. Amate nuntakna bek ma kihun zo tu a, a ngam sia duipui suak tu hi.

¹⁷“Tua ahibuale, tua ngam ah ngal ka thengsak thei tu a, tuaciang mihingte le ngannote a kibangin ka maaimot natu in a susia thei ngalhiamte ka puak tu hi.

¹⁸Tua mihing thumte tua munah a teang hial zong — Keima Vaanglianpipa TOPA, a nungta tatak Pathian ka hi bangma in, a tate uh zongh, a suatak zo buatu uh a, amate nuntakna bek a hung zo tu uh hi.

¹⁹“Tua ngam ah a kilaw thei natna tungsak in, ka thin uukna taw nuntakna tam mama la a, mihing le ngannote ka thalup ciang,

²⁰Noah, Daniel le Job te keak tua munah a teang hial zongin, Keima, Vaanglianpipa TOPA sia a nungta Pathian ka hi bangma, amate in a tate zongh, a hun zo buatu uh hi. Amate phatna in a nuntakna bek a hung zo tu hi,” ci hi.

²¹Hi sia Vaanglianpipa TOPA ii pauna ahi hi: ‘Jerusalem tungah a siabel daan nam li tungsak tu khi hi — ngal, kialpi, ngamsa ngilote le natna te — in mihingte le ngannote a kibangin susia tu uh hi.

²²A suakta khat po om a, a tate a hun le na kungah hong pai ciang, na en in. Amate bangzata sia in ngilo ci sia na mu ciang Jerusalem tungah daan ka piakna sia piak tuak a hina thu tel in;

²³tuasia ciangin na ka vawt peuma sia ahang pha khat om ci sia na he tu hi.” Vaanglianpipa TOPA in son zo hi.