Read Siyin Chin Ezekiel 16 Bible Online

Ezekiel 16 - Siyin Chin bible

Ezekiel 16

²Ama in, “A thithei mihing awng, Jerusalem ii a thasiathuai a sepnate lakin kawk in.

³Vaanglianpipa TOPA in Jerusalem tungah a ci teng son in: “Nang sia Canaan ngam ah piang ni hi. Na pa sia Amor mi hi a, na nu sia Hit mi ahi hi.

⁴Na sua lai in kuama in na lai hong tan ngawl, hong sil ngawl, ci taw hong zut ngawl a, puan taw hong tun ngawl hi.

⁵Kuama in nang atu hite hong vawtsak za tu in hesuakna hong nei ngawl hi. Na sua lai in kuama in hong it ngawl hi. Nang sia lozau sung a hong kivawk hi.

⁶“Tuaciangin kei kong pai a, na chi sungah na kisaan kong mu hi. Chisan taw na kituam a, ahizong na thi tu kong oai bua hi.

⁷Thingno ciidam bangin kong khangsak hi. A thahatin na khang tawto a, ngaknuno na suak hi. Na noai pha takin hong bawk a, na mul zongh sau zo ahihang na pumnguak in na om hi.

⁸“Nang kaantanin kong pai kik ciang, ngual taw a kidei thei tu na hi hun hong theng zo na hi sia kong mu hi. Na pumnguaktang sia ka laktong puasilh taw kong khu a, itna kamciam kong pia hi. Hi hi, nangma taw kiteenna thuciam kong pia a, nang sia keima aa na suak hi,” ci hi. Hisia Vaanglianpipa TOPA son teng ahi hi.

⁹“Tua zawkciang, tui la in na chisan teng kong silsak hi. Olive thau taw kong zut hi.

¹⁰A kizeam puantual kong silhsak a, savun phabel taw kivawt peangdap, puanneal dialkhip, naai laktong puasilh kong pia hi.

¹¹Suang manphate — haak le khite taw kong zeam hi.

¹²Naakbaa le bilbaate, tuaciang na khuk tu a hoi mama kumpilukhu kong pia hi.

¹³Khamh le ngunn taw kivawt kizepnate na nei a, a kizeam puanneal le naaipuan na silh tawntung hi. Anvui phabel taw a kivawt anluum na ne a, khuaitui le olive thau neak tu na nei hi. Na mealphat sia nasia mama a, kumpinu na suak hi.

¹⁴Ngam theampo ah sitbaang ngawl mealphatna taw na minthang hi, banghang ziam cile a ithuai mama tu in hong vawt sia keima ka hi hang hi,” ci hi. Hi sia Vaanglianpipa TOPA ci ahi hi.

¹⁵“Ahihang na mealphatna le na minthanna te suangin hong pai po na luppui hi.

¹⁶Na puansilh pawlkhatte na biakpiakna munte zepna in na nei a, pumpi zuak numeite bangma in na pumpi sia na sik theampo na pia hi.

¹⁷Ngunn le khamh kizepna kong piakte la in, pa milimte vawtna in na nei a, tuate taw palngul mawna na vawt hi.

¹⁸A kizeam puan kong piakte sia tua milimte na silhsak a, olive le ngimnamtui kong piakte milimte na pia hi.

¹⁹Na neak tu an — anvui phabel, olive thau le khuaitui kong pia hi — ahihang milimte tung pan maipha na nga nopna taw milim biakpiak in na nei hi.” Hi sia Vaanglianpipa TOPA ii ci ahi hi.

²⁰“Tuaciangin kei taw na nei tapate tanute la in, milim biakna in na pia hi. Kei tungah na thumaan ngawl sia,

²¹ka tate milim biakna in na nei bua zong, sia khop zo hi ngawl ziam?

²²Pumpi zuakin a thasiathuai na nuntak sungah na no lai hun — na chisan sungah na pumnguakin na kisasaan lai hun, khatvei beak na phawk ngei bua hi.”

²³Vaanglianpipa TOPA in, “Nang sia a lal hi te! Lal ni hi! Tua siatna theampo na vawt zawkciang,

²⁴lampi hui sim ah milim biak natu mun le pumpi zuak natu mun na vawt hi.

²⁵Na mealphatnate buan na noai zo hi. Hong pai pawpo kungah nangma le nangma na ki aap a, ni simin pumpi zuak khat na hi vaial hi.

²⁶A lan mama na innpaam Egypt te taw na lumkhawm a, na paktatna taw kei nong thin uuksak hi.

²⁷“Tu in nang daan kong piak natu in ka khut ka laamto zo a, nang ii tel saan ka thupha teng ka la kik tu hi. Nang hong ensan a, na ngamtat nate kiihuai a sa, Philistine te tungah nang kong aap zo hi.

²⁸“Banghang ziam cile midangte in hong lungkimsak ngawl a hikom Assyria te na del hi. Nang sia amate atu pumpi zuak na hi a, ahihang amate in nang sia hong lungkimsak peang bua hi.

²⁹Sumvawt minam Babylon te a tu zongh pumpi zuak khat na hi hi, ahihang amate in nang hong lungkimsak tuan ngawl hi”.

³⁰Vaanglianpipa TOPA pauna hisia hi: “Nang in a maizum maw pumpi zuak khat bangin hi teng na seam hi.

³¹Lampi lian theampo tungah milim biakna tu le pumpi kizuak natu omna munte na vawt hi. Ahihang pumpi kizuak pawpo bangin sum dei na hi bua hi.

³²Nang sia na pasal na it taangin khualmite taw palngul mawna a vawvawt numei sia taw na kibang hi.

³³Pumpi zuak khat sia sum taw kithamh hi, ahihang nang in na lawmpate theampo letsong na pia a, nang taw lumkhawm tu in mun theampo panin amate hong pai natu in sumnguk na pia hi.

³⁴Nang sia a tumpian pumpi zuak nam na hi hi. Kuama in tuabang khat na sua natu in zawthawk thu taw hong vawt om ngawl hi. Nang hong kithamh ngawl a; nangma in amate na pia hi! Hi hi, nang sia lamdang ni hi,” ci hi.

³⁵Tua ahiciang tu in, Jerusalem, nang pumpi zuak nu! TOPA ii hong ci teng ngai in.

³⁶Hi sia Vaanglianpipa TOPA ii ci hi: “Pumpi zuak numei khat bangin, na puan na sut khe a, na lawmpate le a kiihuai milimte tungah nang le nang kipia a, tua ciang, na tate thatlum in milimte tungah sangaw biakpiakna in na nei hi.

³⁷Hi sia hu in na lawmluite theampo — na etsat, na lawmpate kong khawmtua tu hi. Amate in a beamin kong kiim umsak tu hi, tua zawkciang na puante kong suut siatsak tu a, na nguaktang a na om sia kong ensak tu hi.

³⁸Palngul mawna le mihing thana taw kong ningkhiin tu a, ka thin uukna le ka thinsona taw nang sia thi daan kong pia tu hi.

³⁹Amate ii thahatna nuai ah nang kong koi tu a, pumpi na zuakna le milim na biakna munte sia amate in nuaitham tu uh hi. Amate in na nikteen na puansilh te le na kizepna suangmanphate hong laaksak in, na pumnguak tatakin hong nusia tu uh hi.

⁴⁰Amate in nangma suang taw hong deang tu in mihonte thawn tu uh a, a namsau te taw hong neensem tu uh hi.

⁴¹Amate in na innte hong haltumsak tu a, na daan thuakna sia numei honte in hong ensak tu uh hi. Na pumpi zuak sia kong tawlngasak tu a, na lawmpate letsong na piak sia kong tawlngasak tu hi.

⁴²Tua zawkciangin ka thin uukna hong veng tu a, ka thim tu hi. Ka thin a uuk nawn buatu a, kong eang nawn buatu hi.

⁴³Na khanmoi lai in bangbangin hong phatvawt khi ziam ci sia na mangil zo hi, tua ciangin nasep na vawt theampo taw kei nong thin uuksak hi. Tua hangin na ngamtatnate theampo atu in nang kong liausak hi. A thasiathuai na dangte theampo na belapna in, banghangin numei le pa paktatnate vawt ni ziam?” Vaanglianpipa TOPA in ci hi.

⁴⁴TOPA in, “Jerusalem awng, ‘Tanu in a Nu suun’ ci paunak hisia mihingte in nang huvau in hong zangh tu hi:

⁴⁵Nang sia na Nu ii tanu hi takpi ni hi. Ama in a pasal le a tate huatsa hi. Na suapuinumeite taw kibang ni hi, amate in a pasalte le a tate huatsa hi. Nang le na khuapi puite in Hit te nu khat nei a, Amor te pa khat nei hi.

⁴⁶“Na u nu sia saksang ah a om, Samaria le a khuanote ahi hi. Na naunu le a khuanote ahi Sodom sia thangsang ah om hi.

⁴⁷Amate paina a khuani te zui in a thasiathuai ngamtat bang na zui ciangin na lungkim ziam? Lungkim vet ngawl ni hi. Na ngamtatna theampo sia tawmvei zawkciang amate siatna sangin lawmawk zaw ni hi.

⁴⁸Vaanglianpipa TOPA in, “Keima sia a nungta takpi Pathian ka hi bangma in na suapuinu Sodom le khuanote in siatna khaatna sia nang ii vawt za liangin vawt ngeingawl hi.

⁴⁹Ama le a tanute sia kiphasak hi, banghang ziam cile amate in neak tu hau mama a, ngal kilemin dai takin nungta uh hi, ahihang amate in mizawngte le a hamsia mite a awlmaw bua uh hi.

⁵⁰Amate kiphasak in, thinpui a, ka ngaimawk teng veu vawt uh hi, tua ahikom na heaksa bangma amate susia khi hi.

⁵¹“Samaria in nangma ii vawt, mawna khialna a lang zongh a vawt bua hi. Ama sangin a thasiathuai zaw in na ngamta hi. Nang le na suapui te ih etkak ciangin, na huathuaina in amate maw hi napi mawna sel bangza in kimusak hi.

⁵²Tu in min siatna na thuak kul tu hi. Nangma ii mawnate sia na suapuinumeite ii mawna taw tee ngat ciang, amate sia a maw ngawl taw kibang hi. Tu in na suapuinumeite sia a thiangtho bangin kimusak na hi ciang, maisan liangin, maizum nga ta'n,” ci hi.

⁵³TOPA in Jerusalem tungah, “Keima in amate — Sodom le a khuanote, Samaria le a khuanote khangto in, ka nuamsasak kik tu hi. Hi hi, nang zongh khangto in kong nuamsasak kik tu hi.

⁵⁴Nangma le nangma na maizum tu a, tua na maimawlna in na suapuinumeite bangza in nuamsa ci sia lak tu hi.

⁵⁵Amate nuamsa kik tu a, tuaciang nang le na khuanote zongh kipuuapha kik tu hi.

⁵⁶Na kiphatsak thei hun lai le

⁵⁷a sia na vawtte hong kipholaak ma in, Sodom sia ciammuina in nei hi ngawl ni ziam? Tu in nang zongh ama bangma na hi hi — Edom te, Philistine te le nang hong ensan na innpaam dangte ii ciammuina na hi hi.

⁵⁸A thasiathuai zummawk thute nasep hu in na thuak kul hi.” TOPA in son zo hi.

⁵⁹Vaanglianpipa TOPA in, “Na thuciamnate paltan a, na kamciamte ngaingon na hikom nang taw a kiphu bangin kong vawt tu hi.

⁶⁰Ahihang na khanmoi lai in kong thuciamna ka kholet a, tuaciang a tawntung a kip tu thuciamna khat nang taw ka vawt tu hi.

⁶¹Na unu le na naunu na nga kik ciangin, na ngamtatna sate phawk kik in, na maizum tu hi. Nang taw ih thuciamna sungah a kihel ngawl hangin, amate sia na tanute bangin ka omsak tu hi.

⁶²Nang taw ka kamciamte ka thaksua tu a, tuaciang Keima sia TOPA ka hi hunlam na he tu hi.

⁶³Na khialnate theampo kong maisak tu a, ahizong, na khialnate phawk kik in, maizum leilam in na kam zongh na kaa ngam buatu hi.” Vaanglianpipa TOPA in son zo hi.