Read Siyin Chin Ezekiel 17 Bible Online

Ezekiel 17 - Siyin Chin bible

Ezekiel 17

¹TOPA in kei hong paupui hi.

²Ama in “A thithei mihing awng, Israel mite tungah thu sonteena khat son in a,

³Kei, Vaanglianpipa TOPA ii ka ci teng amate hesak in: muvanlai a lian mama khat om hi, a mul hoi in a thate lian mama a, zalh in a zai in phalh hi. Ama in Lebanon Mualte ah leangin cedar thingkung khat ii dawn tutan a,

⁴sumvawtna ngam ah len pui in, sumvawtte khuapi khat ii sungah koi hi.

⁵Tua zawkciang ama in thingno moi khat Israel ngam panin la a, a khangsak tu tui a tawntungin a omna lei phana lo khat ah suan hi.

⁶A kung meang a, a niam, a zai a beakin a zaam sapitkung khat suak hi. A baakte muvanlai omna sangah khangto a, zung thukte tha hi. Sapitkung sia a baak le a teete taw kidim hi.

⁷“A lian mama, a tha a lian, a mul a saa mama muvanlai dang khat om hi. Tu in sapitkung pona huan sung sangin tui tamzaw muvanlai ii a piak natu lametna taw a zungte ama sang zaamsak a, a teete ama sang ngasak hi.

⁸Ahihang sapitkung sia leiphana, a pha in tui kibuakna lo ah kisuan zo hi, a tee meang thei a, a nga nga thiam in a limci mama sapitkung a sua natu ahi hi.

⁹“Tua ahikom, Kei, Vaanglianpipa TOPA in, hi bangin ka dongh hi: hi sapitkung sia hingin a khang tu ziam? Muvanlai masa sia in a zung longhin, sapitngate thongh keakin, a baakte tattan sakin, vulsak ngawl tu ziam? Sapitkung a kaikeak natu thahatna lianpi ahibuale minam lian kul ngawl tu hi.

¹⁰Hi hi, hi sapitkung sia a kisuan ma hi, ahihang hingin a khang natu ziam? Nisuana sang vui in a nawk ciang vul ngawl tu ziam? A kisuanna munah vul ngawl tu ziam?” ci hi.

¹¹TOPA in kei tungah,

¹²“Hi a langpante munah thu sonteena ii a khiakna a he uh ziam, ci sia dongh in. Babylon kumpipa Jerusalem ah hong pai a, tuaciangin kumpipa le a uliante Babylon ah a ciapui kik sia amate tungah son in.

¹³Ama in kumpipa innkuanpuite khat la in, thukimna khat vawt a, ama ii tungah a thumaan tu in kiciamsak hi. Ama in mi thupite luangkhaam tu in ciapui hi,

¹⁴amate in a kithukimna sia a kepcing natu le ngal thawkikna ngam ahi ngawl natu in, a khaamna ahi hi.

¹⁵Ahihang Judah kumpipa in leedo veve a, Egypt ngam ah siphu le ngalkap honpui khat sam tu in palai seamte paisak hi. Ama in a taangtun zo tu ziam? Ama in tuabang teng taw suakta zo tu ziam? Ama in a thukimna paltan thei ngawl tu a, daan thuakna peng thei ngawl tu hi!

¹⁶“Keima a nungta Pathian ka hi takpi bangma hi kumpipa in a kiciamna le ama kumpi tokhum tungah a koi Babylon kumpipa taw a vawt thukimna paltan ahi hu in Babylon ah thi tu hi.

¹⁷Babylon te in mihing tam mama a thalup natu in, kulhte vawt a, kanhte to ahikom a thahat Egypt kumpipa ngalkaphonpi ngawngawn in ngalsimna ah ama panpui zo ngawl tu hi.

¹⁸Ama in a kiciamna le a thukimna uh paltan hi. Hite theampo ama in vawt ahiciangin tu in ama a suakta buatu hi,” Vaanglianpipa TOPA in ci hi.

¹⁹Vaanglianpipa TOPA in, “Kei a nungta takpi Pathian ka hi bangma in a kepcing tu in ka min taw kamciam a piaksa thukimna paltan ahikom daan ka pia tu hi.

²⁰Savaipa ngeen ka khak tu a, ama ka man tu hi. Babylon ah ka paipui tu a, kei tungah hong thumaan ngawl ahikom tua munah daan ka pia tu hi.

²¹Ngal sungah ama ngalkap phabelte kithatlum tu hi, tuaciang a thi mong teng mun theampo ah kithethaang tu hi. Tuaciang Kei, TOPA ka hi sia na he tu hi,” ci hi.

²²Vaanglianpipa TOPA in hi bangin ci hi: “Cedar thingkung saang khat ii dawn ka zamh tu a, tuaciang a meang moino khat ka thongh tu hi, tuasia mualsaang khat ii tung,

²³Israel mualsaangbel sia tungah ka suan tu hi. A baakte hong khangin a ci hong nei tu a, tuaciangin a mu nop huai mama cedar kung suak tu hi. Vacim namcin tua ii tungah teang tu a, a lim bealh tu uh hi.

²⁴Ngamsung thingkung theampo in Keima, TOPA ka hi sia hong he tu uh hi. Thingkung saangte ka phuk tu a, tuaciang thingkung niamte a saangin ka khangsak tu hi. Thingkung hingte ka vulsak tu a, tuaciang thingkung kote, a hing ka suaksak tu hi. Keima, TOPA in son zo khi hi. Vawt tu ka ci sa te ka vawt tu hi,” ci hi.