Read Siyin Chin Ezekiel 18 Bible Online

Ezekiel 18 - Siyin Chin bible

Ezekiel 18

¹TOPA in kei hong paupui a,

²tuaciang “Israel ngam sungah mite ii paunak a law kikik sia bang ziam? ‘Nu le pate in a thuk sapitngate ne a, Ahihang a tate a ha uh khim hi.’

³Vaanglianpipa TOPA in, “Keima a nungta takpi Pathian ka hi bangma in, Israel ngam ah hi paunak sia na lo kikik nawn buatu uh hi.

⁴Mihing theampo ii nuntakna sia keima neisa hi a, nute pate nuntakna le a ta nuntakna sia zongh keima neisa hi. Mihing a maw sia, a thi tu sia ahi hi.

⁵“Mihing a pha takpi khat om ci in ngaisun tawng.

⁶Ama in Israel te ii milimte bia ngawl hi, ahibuale a kikhaam biakna munte ah a kipia sate ne ngawl hi. Ama in ngualdang khat ii zi sia zolsak ngawl hi, ahibuale numei khat a nin nei laitak ompui ngawl hi.

⁷Ama in kuama theam ngawl, a neisa suttol ngawl hi. Sum a pu khat ii a vanh aapte pia kik hi; ngilkialte anvaak in, a pumnguak omte puansilh pia hi.

⁸Ama in a meet deina in sum pukthaak ngawl hi. A sia vawt tu nial a, thu kituu na po ah a maan in thukhen hi.

⁹Tuabang mihing khat in ka thupiakte zui a, ka thukhamte pha takin tang hi. Ama sia thutang a, tua ahiciang nungta tu hi,” hong ci hi.

¹⁰“Tua zawkciang, hi mi pa in tapa khat nei a tua tapa in ngual na suttol in that a,

¹¹a pa ii vawt ngeingawl hi bang phat ngawlnate vawt hi ci in ngaisun tawng. Ama in a kikhaam biakna munte ah, a kipia sangaw biakpiakna sate ne in, ngualdang zite zol hi.

¹²Ama in a zawngte theam a, suttol in, sum a pu khat ii a aap vanhte tang paih hi. Ama doai biakna munah pai in, a kiihuai milimte bia hi,

¹³tuaciang, a meet deina taw sum pukthaak hi. Ama a nungta tu ziam? Nungta vet ngawl tu hi. Ama in hi a kiihuai nate theampo vawt ahikom thi tu hi. Ama ii thina tungtaang ama kimawsiat tu hi.

¹⁴“Tu in mihing a niina pa in tapa khat nei hi ci tawng. Ama in a pa ii vawt mawnate theampo mu hi, ahihang a pa ngamtat bang zui ngawl hi.

¹⁵Ama in Israel te ii milimte bia ngawl, a kikhaam biakna munah a kipia sate ne ngawl hi. Ama in ngualdang khat ii zi zolsak ngawl a,

¹⁶ahibuale kuama nengcip ngawl, kuama suttol ngawl hi. Sumpupa ii aap vanhte pia kik hi. A ngilkialte anvaak a, a pumnguak omte puansilh pia hi.

¹⁷Siatna vawt tu nial a, a meet deina taw sum pukthaak ngawl hi. Ka thukhamte tang a, ka thupiakte zui hi. A pa mawnate hu in ama sia thi ngawl tu a, nungta tatak tu hi.

¹⁸A pa ahile ngualtheam in, suttol a, mihing theampo tungah siatna vawt tawntung hi. Tua ahikom ama mama ii vawt mawnate hu in thi hi.

¹⁹“Ahihang, ‘Banghangin a tapa in a pa mawnate hu in thuak ngawl tu ziam?’ ci in dongh tu nu hi. A zona sia tapa in a maan le a phate seam hi. Ama in ka thukhamte keamcing a, belcing takin zui ahikom ama sia nungta tatak tu hi.

²⁰A khial a maw pa sia a thi tu sia ahi hi. Tapa khat in a pa mawnate hu in thuak ngawl tu hi, pa zongh in tapa ii mawnate hu in thuak ngawl tu hi. Mipha khat sia a pha a vawtna hu in thaman kipia tu a, mi ngilo khat in a sia a vawtna hu in thuak tu hi.

²¹“Mihing ngilo khat in mawna vawt nawn ngawlin, ka thukhamte tangin, a pha le a maan a seam le ama thi ngawl tu hi; ama nungta tatak tu hi.

²²A mawna theampo kimaisak tu a, ama nungta tu hi, banghang ziam cile ama in a maan in ngamta hi.

²³Mihing pha ngawl khat a thi ciang dik sa tu nong um ziam?” ci in Vaanglianpipa TOPA in dongh hi. “Dik sa ngawl khi hi, kisiik kikin nungta le oai zaw khi hi.

²⁴“Ahihang mihing thutang khat in, phatna a vawtte khealin, siatna theampo vawt tu hong kipan a, mi ngilote ii a thasiathuai ngamtatna te hong seam le a nungta tan lai tu ziam? Nungta ngawl tu hi! A pha a sepnate khat zongh kitepteesak ngawl tu hi. A thumaan ngawlna le a mawna khialnate hu in thi tu hi.

²⁵“Ahihang, ‘TOPA sepna maan ngawl hi’ na ci uh hi. Israel te awng kei hong ngai tavun. Na ka sepzia sia maan ngawl hi ci in ngaisun nu ziam? A maan ngawl sia noma ngaisut zia hi zaw hi.

²⁶Mihing thutang khat in a pha nasepte tawpin, a siate a vawt a kipat zawkciang a thi le ama ii thina sia a sia a vawt hang ahi hi.

²⁷Mihing ngilo khat in mawna a vawt sia khealin, a maan le a phate a vawt le ama in a nuntakna a huu ahi hi.

²⁸Ama in a sep le a vawtte phawkin mawna a vawt sia kheal ahikom ama thi ngawl het in nungta tan lai tu hi.

²⁹Tuaciang no Israel mite in, ‘TOPA sep sia maan ngawl hi’ ci nu hi. Keima sepzia sia a maan ngawlin ngaisun takpi nu ziam? Noma ii ngaisut zia a maan ngawl hi zaw hi.

³⁰“Tu in kei Vaanglianpipa TOPA in, no Israel te tungah hong ci khi hi, note khat sim ii tungah na sep na vawt uh bangin thu kong khen tu hi. A sia a kha na vawt theampo nungngatin nusia vun, na mawna in noma susiasak heak vun.

³¹A sia a kha na vawt uh theampo kheal vun a, thinthak lungthak na nei tavun. No Israel mite banghang thi nuam nu ziam?

³²Kuama a thi tu dei ngawl khi hi. Na mawnate panin, kikheal vun a, nungta tavun,” Vaanglianpipa TOPA in ci hi.