Read Siyin Chin Ezekiel 19 Bible Online

Ezekiel 19 - Siyin Chin bible

Ezekiel 19

¹Israel te kumpi tapate nii atu in hi khuangai lasa tu in TOPA in kei hong sawl hi:

²Na nu uh sia tawpipui bangza ma a hi bua ziam! Ama in a note sia a kiitakhuai tawpi talte kawm ah khangsak hi.

³A no khat khangsakin savaizia hil hi; mihingte ii sa a ne thei khat suak hi.

⁴Minamte in a thu za in, vuum taw a sia uh hi. Thikkoai zum te taw ama sia Egypt ngam ah kaikeak uh hi.

⁵Tua nu in a lametna a bo dong ngak hi. Tua zawkciang a no dangkhat khangsak leleau a, tuasia a kiitakhuai tawpi tal khat suak hi.

⁶Hong khanthin tak ciang, tawpi dangte taw kithawlin vak hi. Ama zongh sa vai thei in mihing te sa ne hi.

⁷Ama in kulhte susia in khua te lalcipsak hi. Ama a hawk simin ngamsung mite lau mama uh hi.

⁸Minamte in ama do tu in mun tuatuam pan pai in kikhawm uh hi; mun theampo pan mite hong pai uh hi. Amate in a sa siana ngeen hong phalh a, tua thaang sungah ama man uh hi.

⁹Bawm khat sungah khumin Babylon kumpipa kungah paipui uh hi. Amate in a hawk a kizaak kik ngei nawn ngawl natu in Israel mualte tungah cing uh hi.

¹⁰Na nu sia luihui ah a kisuan sapitkung khat taw kibang hi. Tui tam ahikom, a kung sia tee le nga taw kidim hi.

¹¹A baakte sia takin kho a, kumpi ciangkhut te a suak tu in hong khang hi. A kung in meeikaai ban tu za ma a saangin khangto a; a kuama po in bangza saang a, a tee boai ziam cisia mu uh hi.

¹²Ahihang a thin uuk khutte in a zung pan longhto in lei ah vawk uh hi. Nisuana vui in a ngate kosak hi. A baakte kithiaktan a; ko in kihaltum hi.

¹³Tu in tua sia sennealngamsung tui om ngawlna lei kona ah kisuan hi.

¹⁴A kung zikpi sia mei in kaangh a; a baakte le a ngate kaanghtum hi. A baakte bangma hunin takin kho kik ngeingawl tu a, kumpi ciangkhut suak ngeingawl tu hi. Hi sia khuangai la hi a; a kisa kikik la ahi hi.