Read Siyin Chin Ezekiel 20 Bible Online

Ezekiel 20 - Siyin Chin bible

Ezekiel 20

¹Saltaang in ka om zawk uh a kum sali, tha nga le ni sawm ni ahi hi. Israel te lampui pawlkhat TOPA deina huvau a dongh tu in hong pai a, ka mai ah a to uh hi.

²Tua zawkciang TOPA in hong paupui hi.

³“A thithei mihing awng, hi mihingte munah Vaanglianpipa TOPA in hi teng hong son hi va ci ta'n: ka deina dongh tu hong pai ahi uh ziam? A nungta takpi Pathian ka hi bangma, kei tungah bangma donghsak ngawl tu khi hi. Kei, Vaanglianpipa TOPA in kong ci zo hi.

⁴“A thithei mihing awng, amate tungah thu tan tu in na kinging zo ziam? Tua ahile thu tan in. A taanghpupite ii a kiihuai ngamtatna te phawksak in.

⁵Ka ci teng son in. Israel ka teal lai in kamciam khat ka pia hi. Egypt ngam amate kungah ka kilangh a, amate mun ah: Keima in TOPA na Pathian khi hi, ka ci hi.

⁶Tuasia lai in amate Egypt ngam pan pusuapui in leitang teng po pan a phabel, leihoi lei phana ngam, amate atu ka tealsak sa ngam ah paipui tu ka kamciam hi.

⁷A kiihuai milim a it te vawkin, Egypt te pathian theamte taw a kinitsak ngawl natu in ka son hi, banghang ziam cile Keima, TOPA a Pathian ka hi hi.

⁸Ahihang amate in kei hong nalh a, ka thuson hong ngai bua uh hi. Amate in a kiihuai milimte vawk ngawl, Egypt te pathiante nusia ngawl uh hi. Tua mun Egypt ngam ah ka thin uuk tutna theampo thuaksak tu in ka kinging zo hi.

⁹Ahihang tua bangin ka ngamta bua hi, banghang ziam cile amate teenna mite zaakna ah Egypt ngam pan hong pusuapui tu khi hi ci in Israel te tungah thangsak zo ka hikom tuabangin ngamta leng keima min dai tu hi.

¹⁰“Tua ahikom Egypt ngam pan sennealngam ah ka paipui hi.

¹¹Ama te tungah a zui pawpo nuntakna a pia thupiak te ka nei a, ka thukhamte ka hil hi.

¹²Koma kilaklaw thukimna limlakna in Sabbath tanna ka vawt a, keima TOPA in amate a thiangthosak sia keima ka hi hunlam a phaw natu ahi hi.

¹³Ahihang sennealngamsung ngawngawn ah kei hong nalh uh hi. Ama te in a zui pawpo nuntakna a pia ka thukham te paltan a, ka thupiakte a nial uh hi. Amate in Sabbath sia niincipsak uh hi. Amate sennealngam ah ka thin uuk tutna taw sucip tu in ka kinging zo hi.

¹⁴Ahihang Egypt ngam pan Israel mite ka pusuapui hong mu minamte sungah ka mindai tu ahikom tuabangin ka ngamta bua hi.

¹⁵Tua ahikom sennealngam ah kamciam khat ka pia a, leitang po pan a phabel, leihoi leiphana ngam, amate ka piaksa ngam ah kong then nawn buatu hi ci in ka kamciam hi.

¹⁶Kiciamna ka vawt sia banghang ziam cile amate in ka thupiakte nial in, ka thukhamte paltan hi, tuaciang Sabbath niinsak a — amate ii milim ma bia nuam zaw uh hi.

¹⁷“Ahihang amate hesuak huai ka sa hi. Tua mun sennealngam ah thalup ngawl tu in ka khensat hi.

¹⁸Tua taangin, amate sungah khangnote kidop natu thu ka pia hi: na taanghpupite vawt thukhamte tang heak vun; amate ngeinate zui heak vun, tua ahibuale a milimte taw noma na kininsak heak vun.

¹⁹Keima in TOPA na Pathian ka hi hi. Ka thukhamte le ka thupiakte zui vun.

²⁰Sabbath sia ni thiangtho khat hisak vun a, tua hile tuasia in ih vawt thuciamna ii lim khat hi tu hi, tuaciang keima sia TOPA na Pathian ka hi hunlam hong phawksak tu hi.

²¹“Ahihang tua khang kikte zongh in kei hong nalh uh hi. Amate in ka thukhamte paltan a, a zui pawpo nuntakna a pia ka thupiakte a zui bua uh hi. Sabbath niinsak uh hi. Amate sennealngam ah ka thin uuk tutna ka phawksak tu a, thalup siat tu in ka kinging zo hi.

²²Ahihang Egypt ngam pan Israel mite ka pusuapui hong mu minamte mai ah ka mindai tu ahikom tuabangin ka ngamta bua hi.

²³Tua ahikom sennealngam ah kamciam dang khat ka pia hi. Amate leitung theampo ah thethaang tu in ka kiciam hi.

²⁴Hi bang a ka hi sia banghang ziam cile amate in ka thupiakte nial a, ka thukhamte paltan in ka Sabbath niinsak uh hi, tuaciang a taanghpupi te ii biak milimte ma bia uh hi.

²⁵“Tuasia ciang thukham pha ngawlte le nuntakna a piangsak ngawl thupiak te ka pia hi.

²⁶A biakpiakna te taw amate ka ninsak a, a tapa upa belte zongh sangaw biakpiakna in ka piasak hi. Hi sia amate daan ka piakna hi a, Keima TOPA ka hi hunlam ka lakna ahi hi.

²⁷“Tua ahiciang tu in a thithei mihing awng, Israel te munah Kei, Vaanglianpipa TOPA ii ka ci teng son in. Hi sia a taanghpupite ii a thumaan ngawlna taw hong zawnsak vawtna nam khat ahi hi.

²⁸Ka piak tu a kamciam ka piaksa ngam ah ka paipui hi. Mualsaangte le thingkung hing te a mu uh ciang amate in tuate theampo tungah sangaw biakpiakna pia uh hi. A sangaw meihal biakpiakna le sapittui biakpiakna te in kei hong thin uuksak hi.

²⁹Keima in na zot uh munsaangte bang hi kabel ziam ci in amate ka dongh hi. Tua ahikom tua hun pan kipan ‘Mun Saangte’ kici suak hi.

³⁰Tu in Israel mite munah Vaanglianpipa TOPA keima ci teng son in: banghangin na taanghpupite mawna vawt teng ma vawt hamtang in a milimte ma dedel tu nu ziam?

³¹Tuni dong ngawngawn in na piak ngei tengma pia in, noma le noma tua milimte taw na tate uh sangaw biakpiakna in nei in, mei sungah na halna uh taw kininsak nu hi. Tuasia zawkciang no Israel mite in kei deina bang ziam ci sia dongh tu in nong pai lalai uh hi! Keima, Vaanglianpipa TOPA sia, a nungta takpi Pathian ka hikom kei tungah thu bangma hong donghsak nawn ngawl tu khi hi.

³²Mi nam dang te le ngamdang a teang mite taw kibangin thing le suang a bia te bang suak nuam in na thin uh khensat zo nu hi. Ahihang tuabang suak ngeingawl tu hi.

³³“Kei, Vaanglianpipa TOPA sia a nungta takpi Pathian ka hi bangma, na kidawm vun, ka thin uuk hu in a thahat khut le ka vaangletna theampo taw kong uk tu hi.

³⁴Na kithethaang na ngam theampo pan kong khoptua kik tak ciang ka thin uukna le ka thahatna kong lak tu hi.

³⁵‘Minamte ii Sennealngam’ a kici na ah kong paipui tu a, tua mun na mai ma ah kong ningkhiin tu hi.

³⁶Sinai Sennealngam ah na taanghpupite ka puavawk bangin tu in kong puavawk tu hi,” Vaanglianpipa TOPA in ci hi.

³⁷“Ngat takin no kong uk tu a, ka thuciamna kong zuisak tu hi.

³⁸No sung pan hong langpan theite le mi mawte ka lakeak tu hi. Tu a, a teenna ngam le lei panin amate ka la khia tu a, ahizong Israel ngam ah ka heak kiksak buatu hi. Tuasia ciang Kei, TOPA ka hi hunlam nong he tu uh hi,” ci hi.

³⁹Vaanglianpipa TOPA in, “Tu in no Israel mite awng, noma lungkim babangin om vun! Na milimte ma bia tan tavun. Ahihang kidawm tavun a, hisia zawkciang ka thu nong nit uh kul tu a, na milim biakpiaknate taw ka min thiangtho na daisak uh kheal tu nu hi.

⁴⁰Tua ngamsung ka mual thiangtho Israel mual saang tungah no Israel mite theampo in kei nong bia tu uh hi. No tungah ka lungkim tu a, tuaciang sangaw biakpiakna a phabelte le a thiangtho letsongte nong paipui tu ka muangmaw tu hi.

⁴¹Na kithethaang na ngamte panin kong kaikhop zawkciang, na sangaw meihal biakpiaknate kong saang tu a, tuaciang minam tuatuamte in a thiangtho ka hi na hong mu tu uh hi.

⁴²Na taanghpupite tungah piak tu in ka ciamsa ngam, Israel ah kong ciapui kik ciang, Keima TOPA ka hi hunlam na he tu uh hi.

⁴³Tuasia ciang a thasiathuai na vawt theampo taw noma le noma bangza in kininsak nu ziam ci sia na phawk kik tu uh hi. Siatna na vawtte theampo hu in noma le noma na kithasiat sua tu uh hi.

⁴⁴A zatak huai ka vaang ka huuk ciangin no Israel te in Kei, TOPA ka hi sia na he tu uh hi, banghang ziam cile na seksolna, na ngitlona taw a kiphu in kong vawt bua hi.” Vaanglianpipa TOPA pau zo hi.

⁴⁵TOPA in kei hong paupui hi.

⁴⁶Ama in, “A thithei mihing awng, thangsang en in. Thangsang le thangsang taam ngam siat natu sonkhol in.

⁴⁷Thangsang taam ngam tungah Vaanglianpipa TOPA ii ci teng a zaak tu in son in: En vun! Keima in kaanghmei khat kipansak khi hi, tuasia in na sungah a om a hing, a ko thingkung theampo kaanghtum tu hi. Bangma in tua kaanghmei sia sumit zo ngawl tu hi. Tua kaanghmei sia thangsang panin saksang dong kizel tu a, mihing theampo in meisa thuak tu uh hi.

⁴⁸Amate in keima TOPA ii hal hi ci in a mu tu uh a, kuama in a sumit thei buatu hi,” hong ci hi.

⁴⁹Ahihang keima in ka nial a, “Vaanglianpipa TOPA awng, tuabangin kei hong vawtsak heak in! Kei sia a telhak kam soaiheamte veu pau tawntung hi ci in ngual theampo phun zo hi,” hong ci hi.