Read Siyin Chin Ezekiel 21 Bible Online

Ezekiel 21 - Siyin Chin bible

Ezekiel 21

¹TOPA in kei hong paupui hi.

²Ama in, “A thithei mihing awng, Jerusalem siatson in. Mihingte biakpiakna munte siatson in. Israel ngam tungah a kidop natu in,

³Keima, TOPA in hi bang ci khi hi: Keima na ngal ka hi hi. Ka namsau ka dok tu a, mipha misia a kibangin na vekpi in kong that siat tu hi.

⁴Saksang pan thangsang dong a kuama theampo tungah ka namsau kong zangh tu hi.

⁵Mihing theampo in Kei, TOPA in ka namsau dok zo ka hina le sot kik nawn ngawl tu ka hi sia hong he tu uh hi.

⁶“A thithei mihing awng, na lungtang sia thinngimna taw a tamhtham bangin tau in. Mihing theampo ii hong et thei natu munah khuangaina taw tau in.

⁷Amate in banghangin tau ni ziam hong ci ciangin, hong tung tu thu hang hi ci in. Tua thu hong tun tak ciang a mate launa taw kidim tu a, a khutte zaw in a thin letna bo tu a, a khupte liing tu uh hi. A hun hong theng zo hi; tu hun ahi hi,” Vaanglianpipa TOPA in pau zo hi.

⁸TOPA in kei tungah,

⁹“A thithei mihing awng, maisang thu tu sonkhol in. Mihingte tungah Kei, TOPA ii ci teng va son tan: Namsau khat, namsau khat sia kitaat hiam in kinawtthiang zo hi.

¹⁰Tuasia kithalup natu in kitaat hiam zo a, khualeng bang a tee vazal tu in kinawtthiang zo hi. Thin lawp natu bangma om thei ngawl hi, banghang ziam cile kidop tu sawlna le daan piak natu theampo ka mite in awlmawk ngawl hi.

¹¹Namsau sia zak tawm thei tu in kinawtthiang zo hi. Mihing that pa khut sungah a ki aap tu in kitaat hiam a, kinawtthiang zo hi.

¹²Thasiatna taw au in, a thithei mihing awng; hi namsau sia keima mite tung le Israel lampuite tungah a kizangh tu ahi hi. A taanglai ka mite theampo taw cipin amate kithatlum tu hi. Thinkiam in na awm beang in!

¹³Ka mite ka sitna hi, tuaciang amate a kisiik kik bua ahile hite theampo amate tungah tung tu hi.

¹⁴“Tu in, a thithei mihing awng, maisang thu tu sonkhol in. Na khutbeang in, tua hile namsau in saat kikik tu hi. Tua namsau sia mihing a that, a lausak le a ngolum namsau ahi hi.

¹⁵Tuasia in ka mite lauthauhsak a lutusak hi. Amate khuapi sia khualeng bangin a tee vazal, a that tu in a kinging namsau khat taw in ka tawng hi.

¹⁶A hiam namsau awng, na ziat na vei vaat ngawpin! Na ngatna san pawpo vaat ngawpin.

¹⁷Kei zongh ka khut ka beang tu a, tuaciang ka thin uuk thai tu hi, Keima, TOPA in son zo khi hi,” ci hi.

¹⁸TOPA in kei hong paupui hi.

¹⁹Ama in, “A thithei mihing awng, Babylon kumpipa a namsau taw hong pai thei natu lampi nii teptee sa in koi in. A nii ngealin, ngam khat sung panin kipan khawm tu hi. Lamkaabom ah lamlakna khuam khat phut in.

²⁰Khat in Ammon te khuapi Rabbah paina lam hi ci in kumpipa lak tu hi, a dang khat sia in Judah te khuapi, kulh taw a ki uum Jerusalem paina lak tu hi.

²¹Babylon kumpipa sia lamkaabom lamlakna khuam hui ah ding hi. Koi sia tawn zaw tu ci sia a tel natu in a thaltangte lok a; a milimte dongh hi; a sangaw biakpiakna nganhing ii a thin en hi.

²²Tu in! A ziatsang khut in “Jerusalem” ci in a kiciamtee thaltang sia toai hi. Tua aisaanna in, va pai a, thingluangte taw a kithoai natu, ngal thotna aw au tu, thingluangte taw kongpite khaktan natu, kanhte to in kidalna vawt natu a hil hi.

²³Jerusalem mite in hi bang thute a um bua uh hi, banghang ziam cile ngallem thukimnate a vawt uh hang ahi hi. Ahihang hi thu sonkholna sia in a mawnate phawksak tu le a kipummat tu thu a kidop khol natu ahi hi.

²⁴Tua zawkciang hisia in, Keima Vaanglianpipa TOPA ii ka ci ahi hi: Na mawnate kipholaak zo hi. No bangza a mawnei na hi sia a kuama po in hong he hi. Na ngamtatnate pan na mawna uh kilak hi. No sia ningkhiin sa hi zo na hi uh kom na ngalte khut sungah kong aap tu hi.

²⁵“Nang a seksol a thiangtho ngawl Israel ngam ukpa awng, na ni, a khakbel daan na khak ni sia hong pai hi.

²⁶Keima, Vaanglianpipa TOPA in son zo khi hi. Na kumpilukhu le na dialkhip suut in. Khat zongh a ngei bang hi kik ngawl tu hi. Mizawngte a vaang nei tu in laamto in! A uk uliante khiasuk in!

²⁷Siatna, siatna vive! Hi hi, khuapi sia ka siacipsak tu hi. Ahihang khuapi daan a pia tu in ka teal pa hong pai mateng hi thu a piang buatu hi. Ama tungah tua nasep ka pia tu hi.

²⁸“A thithei mihing awng, kam saanna son in. Israel a zawngsak Ammon te tungah Kei, Vaanglianpipa TOPA ii ka ci teng taangko in. Amate munah hi bangin son in: Namsau khat sia a susia tu in kinging zo hi: Khualeng bangin a tee vazal tu, a that tu in kinawt thiang zo hi.

²⁹Na mu kholte a theam hi a, na thu sonkholte sia leilot thu hi. Nang sia seksol a ngilo ni hi, tuaciang a khakbel daan na khak ni, na ni sia hong pai tu hi. Na ngawng ah namsau hong ki ngat tu hi.

³⁰“ ‘Namsau a paai sungah thun kik vun! Nang kong bitphuana mun, na pianna ngam ah nang thu kong khen tu hi.

³¹Ka thin uukna meikuang leang bangin kong tha ciang note in na phawk tu uh hi. Suksiat zia a thiam mihing cizat nei ngawl te tungah nang kong aap tu hi.

³²Nang sia meikuang in hong kaanghlum tu hi. Na chisan sia na ngam sungah kee tu a, kuama in nang hong phawk nawn ngawl tu hi;’ ” TOPA in son zo hi.