Read Siyin Chin Ezekiel 29 Bible Online

Ezekiel 29 - Siyin Chin bible

Ezekiel 29

¹Sal ka tan zawk uh kum sawm kum, tha sawm le ni sawm le ni nii, ni in TOPA in kei hong paupui hi.

²Ama in, “A thithei mihing awng, Egypt kumpipa sonsia in. Ama le Egypt ngam leitang theampo daan ka pia tu hi.

³Hi thu Vaanglianpipa TOPA ii Egypt kumpipa tungah a ci ahi hi: Ngun sungah a om awle pui awng, kei sia nangma ii ngal ka hi hi. Nile ngun sia nangma vawt sa hi a, nangma neisa hi na ci hi.

⁴Na kha ngu pailetin, thikkoai taw kong sun tu a, na ngun sungah a om ngasate nangma tungah kong belcipsak tu hi. Tua zawkciang na tungah hong bel ngasa theampo taw Nile ngun sung pan kong kaito tu hi.

⁵Sennealngam sungah tua ngasa theampo taw kong vawk khawm tu hi. Na luang sia lei ah kisial tu a, kiphum ngawlin kinusia tu hi. Vacimte le nganhingte an tu in na luang ka pia tu hi.

⁶Tuasia ciang Egypt mite theampo in TOPA ka hi hunlam hong he tu uh hi. TOPA in, “Israel te in no Egypt mite sia amate a hu tu in hong suang hi; ahihang note in ciangkang tak ngawl khat sangin na phazaw bua uh hi.

⁷Amate in nang hong neal ciang na taltan tu a, a lenuai sunlet in, a cingzaang na kithiaksak hi”.

⁸Tu in, Kei, Vaanglianpipa TOPA in kong son a, namsau taw no kong simsak tu a, na mite le na nganhingte hong thalupsak tu hi.

⁹Egypt ngam sia a kolh ngamtongta suak tu hi. Tuasia ciang, TOPA ka hi hunlam nong he tu uh hi. “Nile ngun sia nangma vawt sa nangma neisa ci na hikom in,

¹⁰keima in nang le na Nile ii ngalpa ka hi hi. Egypt ngam theampo saksang Migdol khuapi pan kipan thangsang Aswan khuapi ah, Ethiopia ngamngi dongin, ngamtongta ka suaksak tu hi.

¹¹Mihing ahizong, nganhing ahizong, tua ngam kaantan in pai ngawl tu hi. Kum sawmli sung tua ngam ah kuama teang ngawl tu hi.

¹²Egypt ngam sia a kinusia cip, leitung bup a ngamkhing belin ka vawt tu hi. Kum sawmli sung Egypt ngam khuapite sia khuapi dang pawpo sangin a lalcip zaw suak tu hi. Egypt mite ngaltaite ka suaksak tu hi. Amate ngam theampo ah tai in midangte kawm ah teang tu uh hi.

¹³Vaanglianpipa TOPA in, “Kum sawmli zawkciang Egypt mite ka thethaang na minamte kung panin ka kaikhawm kik tu a,

¹⁴Egypt ngam thang sang, amate ten cilna munah ka teangsak tu hi. Tua munah amate sia kumpi thazawm ngam khat hi tu a,

¹⁵kumpi ngam theampo sung pan a thazawmbel suak tu hi, amate in minam dangte uk kik ngei nawn ngawl tu uh hi. Ngam thupi ngawl mama in vawt tu ka hikom minam dang kuama zongh amate dei bangin zuisak zo ngawl tu uh hi.

¹⁶Israel in Egypt sia suan le muan in nei kik ngei nawn ngawl tu hi. Egypt ii thuakna in amate a suan a muan sia khial ahi hunlam, Israel a phawksak tu hi. Tuasia ciang Israel in Keima, Vaanglianpipa TOPA ka hi hunlam hong phawk tu uh hi,” ci hi.

¹⁷Sal ih tan zawk kum kul le kum sali na, a tha masabel, ni khat ni in TOPA in kei hong paupui hi.

¹⁸Ama in, “A thithei mihing awng, Babylon kumpipa Nebuchadnezzar in Tyre khua sim hi. A ngalkapte vanh ngit leilam a puaksak hu in, a sam uh zuukin a lutol a, a liangkote kokkeak hi, ahihang tua ngimna thaman a kumpipa le a ngalkapte in bangma leaplaw a nei bua uh hi.

¹⁹Tua ahikom tu in Keima, Vaanglianpipa TOPA in ci khi hi: Egypt ngam leitang Nebuchadnezzar kumpipa pia khi hi. Ama in Egypt hauna theampo suttol in laaksak tu a, a ngalkaphonpi thasum tu in ciapui tu hi.

²⁰Egypt ngam sia ama ii sepna thaman in ka pia hi; banghang ziam cile, a ngalkaphonpi in kei atu seam hi. Keima, Vaanglianpipa TOPA in son zo khi hi.

²¹“Tua thu hong pian ciang Israel mite ka thahatsak tu hi, Ezekiel awng, ngual theampo ii hong zaak thei natu mun panin thu kong sonsak tu a, tuasia ciang keima sia TOPA ka hi hunlam hong he tu uh hi,” hong ci hi.