Read Siyin Chin Ezekiel 3 Bible Online

Ezekiel 3 - Siyin Chin bible

Ezekiel 3

¹Pathian in, “A thithei mihing awng, laizial hisia ne in; tua zawkciang Israel mite kungah pai in paupui ta'n,” hong ci hi.

²Tua ahikom ka kam ka kaa a, tuasia ciangin ama in laizial sia ka neak tu in hong pia hi.

³Ama in, “A thithei mihing awng, kong piak hi laizial sia ne in; tua taw na ngil vasak in,” hong ci hi. Ka neak ciang, khuaitui bangin thum hi.

⁴Tua zawkciang Pathian in, “A thithei mihing awng, Israel mite kungah va pai ta'n a, son a kong sawl po va son ta'n.

⁵A telhak ngamdang kam haksa khat a pauna ngam ah kong paisak bua a, Israel te kungah kong paisak hi.

⁶Na tel ngawl kam haksa a pau ngamliante kungah hong paisak hi leng, amate in nang thu hong ngai tu hi.

⁷Ahihang Israel mite khat zongh in hong ngai nuam ngawl tu hi, amate in kei pau ngawngawn hong ngai ngawl tu hi. Amate theampo sia thinpui in nalh nopna thin vive nei uh hi.

⁸Tu in nang sia amate bangma in na thin kong puisak tu a, na thin kong khosak tu hi.

⁹Suangpi bangin kong kipsak tu a, diamond suang manpha bangin kong saksak tu hi; tua tualngalte kiita vet heak in,” hong ci hi.

¹⁰Pathian in, “A thithei mihing awng, pha takin hong ngai ta'n, kong son pawpo ciamtee in.

¹¹Tua zawkciang saltaang a om, na ngammipuite kungah pai in, na pau hong ngai zong hong ngai bua zong, kei Vaanglianpipa TOPA ii amate tungah ka ci teng va son ta'n,” hong ci thua hi.

¹²Tua zawkciang, Pathian thaa in kei hong laamto a, tuaciang ka nung pan a hawk, awnging vazak khat ka za a, “Vantung ah a om TOPA minthanna pok vun!” ci hi.

¹³Vui sungah cherub te thaphil khopna aw le zinliing nging za in a nging, a muite aw ka za hi.

¹⁴TOPA ii vaangletna sia ka tungah thahatna lianpi taw hong theng a, tuaciang ama thaa in kei hong paipui ciangin dik ka sa bua a ka thin a uuk hi.

¹⁵Tua ahikom, saltaangte teenna Chebar ngunhui Tel Abib ah pai in tua munah ni sali sung ka taam a, ka mu ka zaak thu in hong ngawtcip hi.

¹⁶Ni sali a cin zawkciang, TOPA in kei hong paupui hi.

¹⁷Ama in “A thithei mihing awng, Israel minam atu ngalvil khat in nang kong koi tu hi. Kidop natu nang tungah kong piak thute, amate tungah sonsawn tu ni hi.

¹⁸Mihing ngilo khat a thi tu in ka taangko a, ahihang a nuntakna a ngup natu in a ngamtatna kikheal natu na son bua ahile, ama sia mimaw ma in a thi tu hi, tuaciang ama ii thina sia nang tungah hong kisiik tu hi.

¹⁹Mihing ngilo khat kidop natu thu na pia a, ahihang ama in mawna kikheal ngawlin mawnei ma in thi tu hi, ahihang nang nuntakna hong kikhoaikhe tu hi.

²⁰Mihing pha takpi khat sia ngitlo nasep hong kipan a, tuaciangin a lauhuai dinmun ah ka koi ciang, a kidop natu thu na pia buale ama thi tu hi. Ama ii mawnate hu in ama thi tu hi — a pha a septe ka tepteesak buatu hi; tuaciangin ama ii thina hu in nangma in mawpu tu ni hi.

²¹Mihing pha khat a maw ngawl natu in na hil a, na thu hong ngai in mawna a vawt buale ama nungta tan tu hi, tuaciang nangma nuntakna zong hong kikhoaikheetsak tu hi,” hong ci hi.

²²TOPA hong ompuina ii vaang neina ka phawk a, ama in, “Ding in a, ngamkuam sungah pai in, tua munah nang kong paupui tu hi,” hong cina aw ka za hi.

²³Tua ahikom ngamkuam sungah ka pai a, Chebar Ngunhui ah ka mu sa bangma in tua munah TOPA vaangletna ka mu hi. Ka maisang ah ka puksuk hi,

²⁴ahihang TOPA thaa sia ka sungah hong tum in, hong phong a ka dingto hi. TOPA in kei tungah, “Inn ah cia in a, inn sungah nangma le nangma kikhabil in.

²⁵Khauzeen taw nang hong kiheencip tu a, a thithei mihing awng, mipi sungah na pai thei buatu hi.

²⁶Hi tualngal a tho nuam mihingte kidop natu na son thei ngawl natu in na leei ka zawsak tu hi.

²⁷Tua zawk kong paupui kik ciang le, pau theina vaang kong piak kik ciangin, keima, Vaanglianpipa TOPA ii ka ci teng amate tungah na son tu hi. Amate pawlkhat in hong ngai tu a, ahihang pawlkhat te in nang hong melsia tu hi; banghang ziam cile amate sia tualngal a tho minam ahi uh hi.” hong ci hi.