Read Siyin Chin Ezekiel 30 Bible Online

Ezekiel 30 - Siyin Chin bible

Ezekiel 30

¹TOPA in keima hong paupui kik hi.

²Ama in, “A thithei mihing awng, kamsaang in a, Keima Vaanglianpipa TOPA ii ci teng taangko in. Hi kammalte au in son in: A lauhuai ni hong tung tu hi!

³A ni hong nai zo hi, TOPA ii a dian tu ni hong nai zo hi. Minamte atu in meeikaai ni le ngimna ni hi.

⁴Egypt ngam ah ngal om tu a, Ethiopia ngam ah thinngimna lianpi om tu hi. Egypt ah om mite tam mama kithatlum tu hi: A ngam kisuttol in, A lal in kinusia tu hi.

⁵“Tua ngal in Ethiopia, Lydia, Libya, Arabia, Kub ngamte pan a kicial ngalkapte, tuaciang, ka mite sung pan ngawngawnin a that tu hi.

⁶TOPA in, “Saksang Migdol khua pan thangsang Aswan khua dong, Egypt ngam a huute theampo ngal sungah kithatlum tu hi. A kiphasak Egypt ngalkaphonpi kilalcipsak tu hi, Keima Vaanglianpipa TOPA in son zo khi hi.

⁷A ngam sia leitung ah a ngamtongtabel suak tu a, a khuapite theampo a lalcip sa in kinusia tu hi.

⁸Egypt mei taw ka hal a, ngam huute theampo a kithalup ciang, amate in keima sia TOPA ka hi hunlam hong he tu uh hi.

⁹“Tua ni hong thengin Egypt ngam a siat ciang in, bangma khua phawk ngawlin a om Ethiopia mite a phawng tu in thupuakte teambaw taw ka paisak tu hi, amate sia liinglawngin lau mama tu uh hi. Tua ni hong theng tu hi,” ci hi.

¹⁰Vaanglianpipa TOPA in, “Babylon kumpipa Nebuchadnezzar zanghin Egypt ii hauna ka bosak tu hi.

¹¹Ama le cizat nei ngawl a ngalkaphonpi sia, ngam susia tu in hong pai tu hi. Amate in namsau taw Egypt sim tu a, tua ngam sia mithiluang taw kidim tu hi.

¹²Nile nguntui ka kangsak tu a, mi ngilote khutnuai ah Egypt ka koi tu hi. Ngamdangmite in tua ngam bup susia tu hi. Keima Vaanglianpipa TOPA in ka son zo hi,” ci hi.

¹³Vaanglianpipa TOPA in, “Memphis ah a om milimte le pathian maan ngawl te ka susia tu hi. Egypt a uk tu kuama a om nawn buatu a, mihing theampo ka lausak vadil tu hi.

¹⁴Egypt thangsang teng ngamtongta ka suaksak tu a, saksang Zoan khuapi mei taw ka hal tu hi. Thebes khuapi daan ka pia tu hi.

¹⁵Egypt ii a kulh lian Pelusium khuapi in ka thin uukna ka he sak tu hi. Thebes ii nei le lamh teng ka siasak tu hi.

¹⁶Egypt meitaw ka hal tu a, tua ciang Pelusium sia ngimna nasia thuak tu hi. Thebes luphung te kisiatham tu a, tua khuapi ah namthuam tu hi.

¹⁷Heliopolis khuapi le Bubastis khuapi tangvalte ngal sungah thi tu a, a dang teng thongtaak tu uh hi.

¹⁸Amate ii kiphatsakpui Egypt vaangletna le thahatna ka bosak ciang, Tahpanhes khuapi sia khuazing tu hi. Meeikaai khat in Egypt tuam tu hi, tua ciang a khuapi teng theampo sungah mite thongtaak siat tu hi.

¹⁹Egypt sia hi bangin daan ka piak ciang, amate in TOPA ka hi hunlam hong he tu uh hi.

²⁰Sal a ih om zawk kum sawm le kum khat na a tha masabel, ni sali ni in TOPA in kei hong paupui hi.

²¹Ama in, “A thithei mihing awng, Egypt kumpipa khut ka thiaktan zo hi. A khut dam kik a, namsau a toai kik zawk natu in kuama in a khut tuamsak ngawlin, puan taw zong kuasak ngawl hi.

²²Tua ahiciang tu in hi sia Keima, Vaanglianpipa TOPA ii ci ahi hi: Egypt kumpipa ngal ka hi hi. A khutte ngeal — a dam lai sia le a talsa sia — ka thiatansak tu a, a khut sung pan namsau hong taak tu hi.

²³Egypt te leitung mun theampo ah ka thethaang tu hi.

²⁴Tua zawkciang Babylon kumpipa ii khut a tha ka hatsak tu a, ka namsau a khut sungah ka koi tu hi. Ahihang Egypt kumpipa khut ka thiaktan tu a, a ngalte mai ah tau in a thi tu hi.

²⁵Hi hi, ama ii tha ka kiamsak tu a, Babylon kumpipa ka thahatsak tu hi. Ka namsau ama ka pia a, ama in Egypt ngam sang a ngat tak ciang ngual theampo in TOPA ka hi hunlam he tu uh hi.

²⁶Egypt te leitung mun theampo ah ka thethaang tu hi. Tuasia hun ciang, TOPA ka hi hunlam amate in hong he tu uh hi,” hong ci hi.