Read Siyin Chin Ezekiel 31 Bible Online

Ezekiel 31 - Siyin Chin bible

Ezekiel 31

¹Sal ih tan zawk kum sawm le kum khatna, a tha thum zawk ni masabel ni in TOPA in keima hong paupui hi.

²Ama in, “A thithei mihing awng, Egypt kumpipa tung le a mite theampo tungah hi bangin son in: Bangza in thahat ni ziam! Nang bang taw hong teengat thei tu khi ziam?

³Lebanon ngam a cedar thingkung taw na kibang hi. Tua thingkung ii baakte hoi a, a teete boai hi, Saang mama in van ah meeite banto hi.

⁴A khangtosak tu tui om a, Tui a pia tu leinuai ngunte om hi. Tuate in a pona munah tui buak a, Duisung thing pona theampo ah luite puak hi.

⁵Tui kham ahikom, thingkung dangte sangin saang zaw hi. A baakte ziing in sau hi.

⁶Vacim namcin in a baakte tungah a bute vawt uh hi; A lim nuai ah ngamsate in no nei uh hi; Leitung minamte in a lim bealhin tawlnga uh hi.

⁷Bangza ta in tua thingkung etlawm ziam — A kung saang mama in tuabang baak saute nei hi. A zungte in a thukna a, a luang tuite bansuk hi.

⁸Pathian huan sungah a om cedar thingkung taw kitee ngat thei ngawl hi. Tuabangin baak a nei taakthing om ngeingawl hi. Tuaciang tua bang a meang pha a nei thing ngil om ngawl hi. Pathian ii neisa huan sungah a hoi zaw dang om ngawl hi.

⁹A et hoi tu in keima in a baakte ka zaamsak hi. Pathian ii huan Eden ah om thingkungte theampo ii du ngawk ahi hi.

¹⁰“Tu in Keima, Vaanglianpipa TOPA in van ah meei a banto dongin a saang, tua thingkung tungah bang piang tu ziam kong son tu hi. Saangto vaial in khangto a, kiphasak vaial hi;

¹¹tua ahikom, ama ka nial zo a, ngamdang kumpi khat in ka tangsak tu hi. Ama in a ngitlona taw kiphu in tua thingkung tungah vawt tu hi.

¹²Cizat nei ngawl ngamdangmite in phuk in nusia tu hi. A baakte le a zikpi taltante sia ngamsung mual tung le kuam theampo ah taak tu hi. A lim nuai a bealh ngei minam theampo in paisan tu uh hi.

¹³Vacimte tua a puksa thingkung tungah hong to tu a, ngamsate in a baakte tung tawn tu uh hi.

¹⁴Tua ahikom, tu pan kipan bangza po in tui kham hikale thingkung khat zongh, tua tan a saang mama in khangto ngawl tu a, van ah meei kaanto in a dokto kik nawn buatu hi. A thithei mihingte bangin lalin thi siat tu a, mithi khua a zuansukte taw tonkhawm tu uh hi.”

¹⁵Hi sia in Vaanglianpipa TOPA ci ahi hi: “Mithite khua ah tua thingkung a zot ciangin, heena lim lakna in leinuai tuite in ka tuamsak tu hi, Ngunte khak in luite tam ma ka luangsak nawn buatu hi. Thingkung thi zo ahikom Lebanon mualte tungah khua ka zingsak tu a, tua duisung ah a po thingkungte theampo ka vulsak tu hi.

¹⁶Mithi khua ah ka puaksuk ciang tua thingkung puksuk nging sia in minamte liingsak tu hi. Eden huan thingkung theampo le leinuai a theng sa tui pha tak a kibuak Lebanon thingkung deiteal theampo in ama ii puksuk hangin a lungdam tu uh hi.

¹⁷Amate sia mithi khua a zuan sate kungah ama taw paikhawm tu uh hi. Tuaciang tuasia ii limh nuai bealhin a nungta theampo minamte sungah kithethaang tu hi.

¹⁸“Tua thingkung sia Egypt kumpipa le a ngammite theampo ahi hi. Eden huan sung thingkung ngawngawn amate bangin saangin thupisakhuai ngawl hi. Ahihang tu in Eden huan thingkungte bangma in mithi khua ah paisuk tu a, ngalsung a thite le Pathianzia a hi ngawlte taw omkhawm tu uh hi. Keima ka pau zo hi,” Vaanglianpipa TOPA in ci hi.