Read Siyin Chin Ezekiel 32 Bible Online

Ezekiel 32 - Siyin Chin bible

Ezekiel 32

¹Ih sal tan zawk kum sawm le kum nii kum, tha sawm le tha nii, a ni masabel ni in TOPA in kei hong paupui hi.

²Ama in, “A thithei mihing awng, Egypt kumpipa tungah hi bangin a ciliap huai kidop natu thupia in. Keima thupuak sia son in: Minamte sungah tawpi khat bangin na diang a, ahizong nang sia ngun sungah a kipeak awle khat taw na kibang zaw hi. Na peangte taw tui na nusak ngawp a, ngunte na ninsak hi.

³Minam tam ma hong kikhop uh ciang, ka ngeen taw kong paai tu a, tua ngeen sia amate in vaalbo ah ka kaisak tu hi.

⁴Lei ah nang kong vawk tu a, leitung vacimte le nganhingte theampo sia na sa ne tu in ka kaikhawm tu hi.

⁵Mualte le zaangkuamte a muat sa na luang taw ka dimsak tu hi.

⁶Mualte tungah kizel in luamte a dim dong na chisan ka buasak tu hi.

⁷Nang kong lalsak ciang, van ka seal tu a, aksi te ka mitsak tu hi. Ni sia meei in ka liasak tu a, tha taang ngawl tu hi.

⁸Vantung ah khuavak taang theampo ka sumit tu a, na leitung sia khua ka zingsak ek tu hi. Keima, Vaanglianpipa TOPA in ka son zo hi.

⁹“Na zaak ngeingawl ngamte tungtawnin, na lalcip na thu ka thansak ciang, minam tam mama a thinngim tu uh hi.

¹⁰Nang tung kong vawtnate hu in minam tam mama liinglawng tu uh hi. Ka namsau ka vik ciang kumpite lau in liing tu uh hi. Na puk ni ciangin tuate theampo in amate ii nuntak natu patau in liing tu uh hi,” ci hi.

¹¹Vaanglianpipa TOPA in Egypt kumpipa tungah, “Babylon kumpipa namsau ngal na thuak tu hi.

¹²A ngilo ngamte pan ngalkapte in a namsaute taw na mite theampo ka thatsak tu hi. Na mite theampo le na kiphatsak pui a dang nate theampo ka lalsak tu hi.

¹³Tui omna po ah a taa na ngannote kong ngawlupsak tu hi. Tui a nusak kik tu mihing le ngannote om nawn ngawl tu hi.

¹⁴Na tuite ka ciim sitsetsak tu a na ngunte thim takin ka luangsak tu hi. Keima, Vaanglianpipa TOPA pau zo khi hi.

¹⁵Egypt ngam sia ngamtongta suaksak in, a sungah a teang theampo ka lal siatsak ciang Keima, TOPA ka hi hunlam amate in hong he tu uh hi.

¹⁶Hi a ciliap huai kidop natu ka thu piak sia mithi vuina la suak tu hi. Ngam theampo pan numeite in Egypt le a mite theampo a tu a khuangaina a lakna in tua lasa tu uh hi. Keima, Vaanglianpipa TOPA in pau zo khi hi,” ci hi.

¹⁷Sal ih tan zawk kum sawm le kum ni kum a tha masabel ni sawm le ni nga ni in TOPA in kei hong paupui hi.

¹⁸Ama in, “A thithei mihing awng, a tam mama Egypt mi theampo atu in khuangai in na om in. Amate sia a thahat minamte taw mithi khua ah puaksuk in.

¹⁹Amate tungah hi bangin va son tan: Ngualdang khat pawpo sangin na mealhoi zaw sa nu ziam? Mithi khua ah na tuaksuk tu uh a Pathianzia a he ngawlte sung tua mun ah na lum tu uh hi.

²⁰“Ngal sungah a thite taw Egypt mite thi tu uh hi. Amate theampo a that tu in namsau khat kinging khol zo hi.

²¹Ngalhang belh te le Egypt te sang pan a dote in mithi khua pan Egypt te a muak uh hi. Amate in: ‘Pathianzia a he ngawl ngal sungah a kithatte hong paisuk in hi sungah lum uh hi!’ ci in au uh hi.

²²“Tua munah Assyria om a, a ngalkapte thaan in kiim uum hi. Amate ngal sungah kithat siat a,

²³amate thaan sia mithi khua a thuk belna munah om hi. A ngalkapte theampo ngal sungah thi a, ama thaan sia ngalkapte thaan in kiim uum hi. Ahihang khatvei hunlai in amate in a nungtate ngam liinglawngsak uh hi.

²⁴Tua munah Elam om a, a ngalkapte thaan in kiim uum hi. Amate ngal sungah kithat siat a, vunteap at ngawl ma in mithi khua ah tuaksuk uh hi. A nuntak lai in ngual lauthawngsak a, ahihang tu in mindai in thi uh hi.

²⁵Elam sia ngal sungah a thite taw lum a, a ngalkap thite thaan in kiim uum hi. Amate theampo vunteap ki at ngawlin ngal sungah a thite vive ahi uh hi. A nuntak lai in ngual lauthawngsak a, ahihang tu in amate thi in a maimawl in ngalsung a thite taw kisial khawm hi.

²⁶“Tua munah Meshech le Tubal te om a, a ngalkapte thaan teng a kiim ah om uh hi. Amate theampo vunteap ki at ngawlin ngal sungah a thite vive ahi uh hi. Ahihang, khatvei hunlai in amate in a nungtate liinglawngsak uh hi.

²⁷Amate sia mithi khua ah ngalhiam kicing taw pai in a namsaute lukhamin kineisak a, a lumte a pum tungah a kikoi, taanghlai ngalhangte bangin zatakna taw kiphum ngawl hi. Hi ngalhangte sia khatvei hunlai in a nungtate a liinglawngsak khom tu in a tha uh hat hi.

²⁸“Tuabangin Egypt te sia ngal sungah a kithat, vunteap at ngawlte sungah kisucip tu uh hi.

²⁹“Edom sia a kumpite le a ukte taw tua munah om hi. Amate sia a thahat ngalkapte hi a, ahihang tu in ngal sungah a kithat, vunteap at ngawl ngalkapte taw mithi khua ah lum uh hi.

³⁰“Saksang kumpipa tate theampo tua munah om a, Sidon te zongh tua mun ma ah om uh hi. A thahatna in khatvei lai in ngual liinglawngin lausak ngei hi, ahihang tu in amate sia ngalsung a thite taw vunteap at ngawlin mindai in kiphum khawm uh hi. Amate in mithi khua ah a paisukte taw a kibangin mindaina thuak khawm uh hi.

³¹“Ngal sungah a kithatte a mu uh ciang Egypt kumpipa le a ngalkaphonpi in dik a sa tu uh hi,” Vaanglianpipa TOPA in ci hi.

³²“A nungta te liinglawngsak tu in Egypt kumpipa ka sawl ahi hi. Ahihang ama le a ngalkaphonpi theampo sia kithatlum tu a, ngal sungah a thi, vunteap at ngawlte theampo taw kisial tu hi.” Vaanglianpipa TOPA pau zo hi.