Read Siyin Chin Ezekiel 34 Bible Online

Ezekiel 34 - Siyin Chin bible

Ezekiel 34

¹TOPA in kei hong paupui hi.

²Ama in, “A thithei mihing awng, Israel ngam ukte sonsia in, kamsaanna taw, Keima, Vaanglianpipa TOPA ii kong ci teng amate munah son in: No Israel ii tuucingte awng a lal na hi uh hi: Noma le noma na kikeam cing uh a, ahihang na tuute na keamcing ngei bua uh hi.

³Note in a noai taw kivaak in, a mul taw a kivawt puante silh a, a limcibel tuute ngoin a sa na ne uh hi. Ahihang tuute na keamcing ngei bua uh hi.

⁴Note in tuu zawngkhalte na ou bua uh a, a ciinate bawl ngawl, a liamte a liamma tuamsak ngawl, a lampialte khoi kik ngawlin, ahibuale a bote na zong kik bua uh hi. Tuasia luangin na vawtsia lalai uh hi.

⁵Tuute sia a cing nei ngawl ahikom, peakkeak a, ngamsate in manin a sa ne uh hi.

⁶Ka tuute mualtung le mual bawk saang na munte ah a vakvai uh hi. Leitung theampo ah peakkeak a, kuama in amate zong ngawlin a kan bua uh hi.

⁷“Tu in, no tuucingte awng, TOPA ahi Keima ii son bang hong ngai tavun.

⁸Keima in a nungta takpi Pathian ka hi bangma, keima ii thuson nong ngai tu uh phazaw hi. Ngamsate in ka tuute manin, thatin a sa ne uh hi, banghang ziam cile tuucing om ngawl hi. Ka tuucingte in tuute kanin zong ngawl hi. Amate le amate kikeam a, tuute a keam bua uh hi.

⁹Tua ahikom, no tuucingte awng, ka thuson hong ngai tavun.

¹⁰Keima, Vaanglianpipa TOPA in note ngal ka hi na thu ka thangsak hi. Ka tuute noma khut sung pan ka la kik tu a, bangma hunin amate ii tuucingte kong hisak kik ngei buatu hi; noma le noma bekma a kikeam tu in kong koi kik ngei buatu hi. Noma khut sung pan ka tuute ka suatak tu a, no kong nesak buatu hi.

¹¹“Keima, Vaanglianpipa TOPA in kong ci na pan keima mama in ka tuute ka zong tu a, ka keam tu hi,

¹²tuucing khat in a kithethaang tuute kaikhawm in a kep bangma in ka tuute ka keam tu hi. Tua khuazing le a lauhuai tuasiatna ni in, a kithethaang na mun theampo panin amate ka khawm kik tu hi.

¹³Ngamdang tuatuamte pan amate ka la tu a, kaikhawm in, a ngam leitang tungah ka ciapui kik tu hi. Israel ngam luite le mualte ah keima in lampui kikin, lo hingna ah an ka vaak tu hi.

¹⁴Israel ngam lopa omna mualtung le ngamkuam te, tua ciang lohingna theampo ah amate ngam muang takin ka taasak tu hi.

¹⁵Keima in ka tuute a cing tuucingpa ka hi tu a, a tawlngak natu mun khat ka zonsak tu hi. Keima, Vaanglianpipa TOPA ka pau zo hi.

¹⁶“Keima in a bote ka zong tu a, a lampial te ka khoi kik tu hi, a liamte a liamma ka tuamsak tu a, a ciinate ka damsak tu hi; ahihang thau in a thahatte ka susia tu hi, banghang ziam cile keima in a maan in a ngamta tuucingpa ka hi hi.

¹⁷“Tu in no ka tuuhonte awng, Keima, Vaanglianpipa TOPA in kong cina pan, note khat sim tungah thu kong khen tu a, a pha le a sia, tuu le keal kong khen tu hi.

¹⁸Note pawlkhat in lopa limcibel na neak uh taw lungkim zo ngawl a; na neak ngawl te ngawngawn na tuanhcil uh hi! Tui thiang na dawn uh a, na dawn ngawl teng na nusak uh hi!

¹⁹Ka tuu dangte in na totcil lopate le na nutsaksa tuite ma a neak uh kul hi.

²⁰“Tua ahikom tu in Keima, Vaanglianpipa TOPA in no a thahat tuute le a thazawm tuute kilaklaw ah thu kong khen tu hi, ci in kong son hi.

²¹Note in tuu a ciinate na kii uh taw na sii uh a, tuuhon sung pan na niil keak uh hi.

²²Ahizong ka tuute ka suatak tu a, kuama in ka vawtsiasak nawn buatu hi. Ka tuute khat sim tungah thukhenin a sia le a pha ka doi tu hi.

²³Ka naseampa David bang ahi kumpi khat amate ii khat bek ahi tuucing pa tu in ka pia tu a; amate a keam tu hi.

²⁴Keima, TOPA sia amate ii Pathian ka hi tu a, ka naseampa David bang ahi kumpi khat in amate a uk tu hi. Keima ka pau zo hi.

²⁵Amate thin muang hiithiat in a om natu in amate taw thuciamna khat ka vawt tu hi. Nganhing a kiitakhuaite theampo a ngamsung pan ka heam tu hi, tuasia in ka tuute ngammuang takin lote sungah nungta in, taam sungah a mut thei natu uh ahi hi.

²⁶“Amate thupha ka pia tu a, ka mual thiangtho kiimkot ah ka teangsak tu hi. Tua munah a kisap hunin thupha nguatui ka zusak tu hi.

²⁷Thingkungte a nga nga tu a, lote pan an piangin, mihing theampo thinmuang takin a leitang tung tek ah a teang tu uh hi. Ka mite ii thikkol sutan in, a sila kaaina pan ka suut ciang TOPA ka hi hunlam amate in he tu uh hi.

²⁸Pathian he ngawl minamte in amate ii neisate suttol nawn ngawl tu a, ngamsate in ne lum ngawl tu hi. Amate ngam muang takin teang tu a, kuama in lauthawn ngawl tu hi.

²⁹Leipha leihoi lote ka pia tu a, a ngam sungah ngilkialna ka omsak buatu hi. Ngamdangte in selno ngawl tu hi.

³⁰Mihing theampo in Israel te keima ii ka huuk hunlam le amate ka minam ahi hunlam he tu uh hi. Keima, Vaanglianpipa Topa pau zo khi hi.

³¹“No, ka tuute, kong vaak sa tuuhon, keima mite na hi uh a, keima in note Pathian ka hi hi,” Vaanglianpipa TOPA in ci hi.