Read Siyin Chin Ezekiel 38 Bible Online

Ezekiel 38 - Siyin Chin bible

Ezekiel 38

¹Pathian in kei hong paupui hi.

²Ama in, “A thithei mihing awng, Magog ngam sungah om Mesheh le Tubal ngam ukpipa Gog sonsia in. Ama sonsia in a,

³Keima, Vaanglianpipa TOPA sia ama ii ngal ka hi hunlam ama tungah son in.

⁴Ama heak zazaan in a, a kha ngu sia thikkoai bulin ama le ama ii ngalkapte theampo ka kaikeak tu hi. Ama ngalkaphonpi sia a siphute le a kibang puan a silh siphu tungtote taw, tam mama a, ngalkapte theampo in lum le namsau khat tek toai uh hi.

⁵Persia, Ethiopia le Libya pan mite sia ama sang pangin lum le thik lukhute nei siat uh hi.

⁶Saksang Gomer ngam le Beth Togarmah ngamte pan, ngalsim mite theampo le a dang ngam tam ma pan ngalkapte in ama panpui uh hi.

⁷Ama a kingin khol natu son in a, a thupiak bangin, a ngalkapte theampo kinging kholsa in omsak hen.

⁸Kum tam mama zawkciang, ngam theampo pan a cia kik, ngal muang sa in a om mihingte teenna ngam sim tu in ama ka sawl tu hi. Ama in ngei mama a kinusia sa hi a, ngamtongta ahihang tu in mihingte theampo ngammuang takin a teenna mun Israel mualte sim tu hi.

⁹Ama le a ngalkapte le ama taw kipawl ngam tam mamate in vuipi bangin sim tu a, meei bangin a ngamsung a tuamcip tu uh hi,” ci hi.

¹⁰Hi sia in Vaanglianpipa TOPA ii Gog tungah a son ahi hi: “Tua hun hong thet ciangin nang in thusia tupna khat na ngaisun tu hi.

¹¹Nang in a mite thinmuang takin a teenna, a khuate ngaldalna kulh taw a ki uum ngawl, a hung tu om ngawl ngam khat sim tu in na khensat tu hi.

¹²A lal ngeisa khuapite sungah a teang mite ii neisate suttol in na laaksak tu hi. Amate sia minamte sung pan kikaikhawm a, tu in vul le khoai, nei le lamh hong nei a, leitung lamkaa bomte ah a teang uh hi.

¹³Sheba le Dedan mite le Spain ngam khuate pan sum vawtte in, ‘Na ngalkaphonpite ngual neisate suttol tu le a sim tu in na khawm zo ziam? Ngunn le khamh, vul le khoaite le a neisa a lamh sate laaksak siatin, tua vanhte theampo ciapui tu na sawm ziam?’ ci in nang hong dongh tu hi.”

¹⁴Tua ahikom, Vaanglianpipa TOPA in ama ci teng Gog tungah a son tu in kei hong paisak hi: “Tu in Israel ka mite thin muang in a teen laitakin nangma in

¹⁵a khualana saksang mun na laakna panin, ngam tam mama pan a thahat le a tam mama siphu ngalkapte lampui in na kuan tu hi.

¹⁶Vuipi suangval sia ngamsung kaantan in a vak bangin Israel ka mite na sim tu hi. A hun hong thet ciang, nang tungtawnin ka sep sia taw ka thianthona le keima akua ka hi sia minamte in hong heak natu ka lakna in ka ngam sim tu in nangma kong paisak tu hi.

¹⁷Ka naseam Israel kamsaangte tungtawnin, a ni a hun hong thet ciang Israel te a sim tu khat kong puak tu hi ci a nidang pek pan ka taangko sia nangma na hi hi.” Vaanglianpipa TOPA in son zo hi.

¹⁸Vaanglianpipa TOPA in, “Israel mite Gog ii a sim ni in ka thinso tu hi.

¹⁹Ka thin uuk mama hu in tua ni ciang Israel ngam ah nasia takin zinliing tu hi ci in ka thangsak hi.

²⁰Ngasa le vacim theampo, nganhing a lian a no theampo le leitung ah a om mihing theampo in kei hong kiita in a liing tu uh hi. Mualte le liangte cim tu a, luphung theampo puk tu hi.

²¹Gog mite tuasiatna namcin taw ka lausak tu hi. Keima, Vaanglianpipa in son zo khi hi. Ama ii mihingte khat le khat namsau taw kisaat tu uh hi.

²²Chisan luanna le natna taw ama daan ka pia tu hi. Nguapi le ngialtang, meikuang le kaan, ama le a ngalkaphonpi tung le ama taw kipawl minam tam mamate tungah buasuk tu hi.

²³Hi bangin keima letna le ka thiantho na sia minam theampo ka lak tu hi. Tua hun ciang amate in TOPA ka hi hunlam hong he tu uh hi,” ci hi.