Read Siyin Chin Ezekiel 39 Bible Online

Ezekiel 39 - Siyin Chin bible

Ezekiel 39

¹Vaanglianpipa TOPA in, “A thithei mihing awng, Meshech le Tubal ngamte ukpi pa Gog sonsia in a, keima sia a ngal ka hi hunlam ama tungah son in.

²Keima in ama sia lam thak khat ah ka heak tu a, saksang pek panin, Israel ngam mualte a thet dong lam ka pui tu hi.

³Tua zawkciang a khut veisang ah a toai thal le a khut ziatsang ah a toai thaltangte ka bekkeaksak tu hi.

⁴Gog le a ngalkaphonpite, a kipawlpuite Israel mualte tungah thi tu uh a, a mithi luangte sia ngamsate le vacimte an ka suaksak tu hi.

⁵Amate lozau sungah thi tu uh hi. Keima, Vaanglianpipa TOPA ka pau zo hi.

⁶Magog ngam le thinmuang takin a mite teenna tuipi dung theampo mei taw ka hal tu hi, tuaciang mite theampo in, Keima, TOPA ka hi hunlam hong he tu uh hi.

⁷Israel ka mite in ka min thiangtho ka hesak takpi tu a, ka min a kidaisak nawn buatu hi. Tuasia ciang, minamte in Keima, TOPA sia Israel ii Thiangtho Pathian ka hi hunlam hong he tu uh hi,” ci hi.

⁸Vaanglianpipa TOPA in, “A thu ka sonsa ni sia hong tung takpi tu hi.

⁹Israel khuapite ah a teang mite pai in, a kinusia ngalhiamte thingthu tu in khawm tu uh hi. Lumte, thalte, thaltangte, teite le molte thingin thut tu a, kum sali sung khom tu uh hi.

¹⁰Amate in lo sung pan thing tom tu le duisung pan thing phuk tu kul ngawl hi, banghang ziam cile amate in ngalhiam nusiatte a thut tu in nei uh hi. A ngalte ii a suttol a laaksak vanhte, amate in suttol a, laaksak tu hi,” Vaanglianpipa TOPA in son zo hi.

¹¹TOPA in, “Hi thu teng hong pian ciang, Gog kiphumna tu mun khat sia Tuipi Thi ii nisuana sang Israel ngam Khualhawte Ngamkuam sungah ka pia tu hi. Gog le a ngalkapte theampo tua munah kiphum tu a, tua kuam sia ‘Gog ii Ngalkaphonpi Kuam’ kici tu hi.,

¹²Israel mite in mithi luangte theampo a phum natu le a leitang thiangthosak kik natu in tha sali hun bo tu hi.

¹³Ngamsung a teang mihingte theampo in mithi phumpui tu hi, tua ahiciang ka ngal zaw ni in amate minphatna kipia tu hi. Keima, Vaanglianpipa in ka son zo hi.

¹⁴Tha sali a bo zawkciang leitang a thianthosak thei natu in, ngamsung theampo ah khualhaw in mithi luang a kiphum ngawl lai theampo a zong tu le a phum tu pasalte kiteal tu hi.

¹⁵Amate sia ngamsung suk le to ah vak kawkoai in, mithi ngu khat a mu simin, tua ii hui ah tepteena khat vawt tu hi, tua hile thaankhuk tote pai in Gog ii Ngalkaphonpi Kuam sungah phum thei tu uh hi.

¹⁶(Tua mun taw a kinai na ah ngalkaphonpi ii min a kitap khua khat om tu hi) Tuabangin a leitang kithiangthosak kik tu hi,” ci hi.

¹⁷Vaanglianpipa TOPA in kei tungah, “A thithei mihing awng, amate atu ka vawt sangaw biakpiakna sate ne tu in, kiim le paam theampo pan vacim le nganhingte theampo hong pai natu in sam in. Tua in Israel mual tungah poaipi khat hi tu a, tua munah sa ne in chi dawn thei tu uh hi.

¹⁸Tuate in tuutalte ahibuale, tuunote ahibuale kealte ahibuale, khuital thaute bangin a kithatlum ngalkapte ii luangte ne in, leitung ngamukte ii chi dawn tu uh hi.

¹⁹Sangaw biakpiaknate bangin hi mihingte ka thalup ciangin, vacimte le nganhingte in a chi le a thaute theampo a kham dongin ne tu uh hi.

²⁰Keima sabuai tungah tuate in siphute le a tungtote, ngalkapte le ngalsim mihingte ii sa a neak zawk zaza ne tu uh hi. Keima, Vaanglianpipa in ka son zo hi,” hong ci hi.

²¹TOPA in, “Minamte in ka vaangletna ka musak tu hi, tuaciang a maan a thu ka khensat natu in bangbangin ka vaangletna zangh khi ziam ci sia ka lak tu hi.

²²Israel te in tua hun pan kipan Keima sia TOPA a Pathian ka hi hunlam hong he tu uh hi.

²³Minamte in kei tungah mawna khialna hong vawt nate hangin Israel te sal tang a hina thu a tel tu uh hi. Amate nungngat in a ngalte in ka zosak a, ngal sungah ka thatlumsak hi.

²⁴Amate a ninnoi na le a seksol nate taw a kilawm bangin ka thuaksak a, amate ka nungngat hi,” ci hi.

²⁵Vaanglianpipa TOPA in, “Ahihang tu in Jacob suan le paal Israel mite ka hesuak tu a, ka nuamsasak kik tu hi. Ka min thiangtho ka sungsia tu hi.

²⁶Amate kuama in tawng nawn ngawlin, a ngam sungah ngammuangin khatvei a teen kik ciangin, keima hong leeheak hu in, bangbangin a mindai ci sia a mangil thei tu uh hi.

²⁷Keima thiangtho ka hi hunlam sia minam tampi ka lak natu in, a ngalte teenna ngam theampo panin ka mite ka pui kik tu hi.

²⁸Tua hun ciangin, ka minamte in Keima, TOPA a Pathian ka hi hunlam hong he tu uh hi. Hi thu amate ii a tel theina sia, keima in amate matsa in ka puak a, tu in khawm kikin, khat zongh kikhe ngawlin, a ngam ah ka puak kik hu ahi hi.

²⁹Israel mite tungah ka thaa ka buak tu a, amate ka nungngat kik ngei buatu hi. Keima, Vaanglianpipa TOPA in son zo khi hi,” ci hi.