Read Siyin Chin Ezekiel 4 Bible Online

Ezekiel 4 - Siyin Chin bible

Ezekiel 4

¹Pathian in, “A thithei mihing awng, uksuang khat la in a, na mai ah koi in, tuaciang a tungah Jerusalem khuapi lakna in lam ngiit in.

²Tuaciang Jerusalem khuapi a ki uumci na lim lak natu in, kanhte, leiciante, ngiaphual te le kulh sukthapna moltumte a kiimkot ah koi in.

³Thik daalkuang khat la in, nang le khuapi kilaklaw ah pang khat bangin koi in. Khuapi maingat in. Tua khuapi sia ki uumci a, a uumci sia nangma ni hi. Hisia in Israel ngammite atu in lim khat a hi tu hi.

⁴“Tua zawkciang, na siiklam veisang delpha in lum in, tuaciangin Israel minam ii mawna sia nang tungah kong koi tu hi. Ni 390 sung tua munah na om tu a, amate mawna hu in na thuak tu hi. Amate daan thuak tu, kum khat ai atu in, ni khat veu daan kong pia tu hi.

⁶Tua teng na man zawkciang, na ziatsang pangh delpha in a, Judah mite mawna hu in ni 40 sung thuak in -- amate daan thuakna kum khat ciang ni khat ahi hi.

⁷“Jerusalem khuapi a ki uumci sia mitsuan nginge in. Khuapi sia na khuttum ngat in vau in a, tua khuapi siat natu thu sonkhol in.

⁸Tua khuapi a ki uumci hun a bo mateng na pangh langkhat pan a langkhat ah na kiheak thei ngawl natu in kong heencip tu hi.

⁹“Tu in mangtaang, zungtaang ham, benaang, be, taangzik le mangtaang nam dang pawlkhat veu la in. A vekpi hel in anluum vawt in. Tua anluum sia ni 390 sung na siiklam veisang delpha in na lup hun sung na neak tu an ahi tu hi.

¹⁰Ni khat in anluum gram 230 veu hong kipia tu a, a zing ciang dong na khom tu hi tu hi.

¹¹Tui zongh a kiciangtan in na ne tu a, ni khat in hai nii veu na ne tu hi.

¹²Mihing eakko taw mei na thut tu a, na anluumte a kaam tungah em in mihing theampo ii nang hong mu theina munah na ne tu hi,” ci hi.

¹³TOPA in, “Hisia sia a ngam uh pan ngamdangte ah ka thethaang hun ciang, thukham ii a khaam an sia Israel te ii a neak natu lim ahi hi,” hong ci hi.

¹⁴Ahihang ka zo kik a, “Vaanglianpipa TOPA awng, hi ngawl hi, tuabang hong hisak heak in! Bangma hun in keima le keima kininsak ngeingawl khi hi. Ka no a kipan, ama thu in a thi thawthong nganhing sa ahibuale ngamsate thalup peuma ii sa ka ne ngei bua hi. A nin in a kingaisun an peuma ne ngawl khi hi,” ka ci hi.

¹⁵Tua ahikom Pathian in, “Pha mama hi, khui eak kong zanghsak zaw tu a, tua tungah na anluum na em thei tu hi,” hong ci hi.

¹⁶Ama in, “A thithei mihing awng, Jerusalem atu anluum hong paina ka khaktan tu hi. A anneak a tuidawn lealte vathiam in hong om uh ciang, tua munah mihingte sia khuangai in a thinngim tu uh hi.

¹⁷Amate in neak tu le dawn tu an le tui hong nei ngawl tu a; a thin uh kiamin, a mawnate hu in a ci a sa hingkiam tu uh hi,” hong ci thua lai hi.