Read Siyin Chin Ezekiel 41 Bible Online

Ezekiel 41 - Siyin Chin bible

Ezekiel 41

¹Tua zawkciang, tua pa in A Thiangtho Mun, a laizang inndoi sungah hong paipui hi. Ama in tuasung tumna lamzin sia tee a: metre thum thuk in,

²metre nga zai a, a lang le a lang pangte metre nii le lang veu saa hi. Ama in tua inndoi mama tee a: metre kul sau in metre sawm zai hi.

³Tuaciang ama sia a sungnung khakbel inndoi ah pai hi. Ama in tuasung tumna lamzin tee a: metre 1 thukin metre 3 zai hi, a lang le a lang pangte metre 3.5 veve saa hi.

⁴Ama in tua inndoi mama tee a, a pang simin metre 10 veu pha hi. Hi inndoi sia a laizang inndoi ii ngalkhat ah om hi. Ama in kei tungah “Hi sia a Thiangtho Bel Mun hi,” hong ci hi.

⁵Tua pa in Biakinn ii sungnung pang saana tee a, metre 3 pha hi. Biakinnpi kiimkot ah hi pang nealin, metre 2 veu a zai inndoi note a kipee in kisa hi.

⁶Hi inndoite dawl thum pha a, dawl khat simin inndoi sawmthum om hi. Biakinnpi ii a dawl simin a puasang pang sia a nuaidawl pang sangin pa zaw hi, tuabangin a tung inndoite pang tungah kilh kul ngawlin kinga hi.

⁷Biakinn pangte a puasang pan et ciang, a vekpi in a dawn dong a saana a kikim bangin kimu hi. Biakinnpi ii puanung pang nealin inndoite pua sangah a zai keallei ni kidaw a, tuabangin a nuaidawl pan a lai dawl le a tungnungbel dawlte ah kikaato thei hi.

⁸Hi inndoite ii puasang pang sia metre 2.5 saa a; Biakinnpi saksang inndoite tumna innkha khat om a, thangsang inndoite tumna innkha khat om hi. Biakinnpi kiimkot ah metre 2.5 a zai a cial khat ka mu a; lei pan metre 3 saang hi, Biakinn pangte kungah a om inndoite tawdap taw kikim hi. Tua a cial le thiampite zak innte kilaklaw ah metre 10 a sau mun awng khat, Biakinnpi ii panghte ii dung tengah om hi.

¹²Mun awngthong ii mongbel, Biakinnpi ii nitumna sangah metre 45 a sau metre 35 a zai inn khat om a; a kiimkot pang sia metre 2.5 saa hi.

¹³Biakinnpi puasang teng tua pa in tee a, metre 50 sau hi. Biakinnpi nungsang pan mun awngna kaantan in nitumna innpangh dong zongh metre 50 pha hi.

¹⁴Biakinnpi mai, a lang le lang ah a om mun awngthong a kihel sia zongh metre 50 pha hi.

¹⁵Nitumna sang inn sia ii sauna ama in tee a, a lang le a lang ah a om dawtuam a kihel in metre 50 ma pha hi. Biakinnpi sungtanna innkhan, a Thiangtho Mun le A Thiangtho Bel Mun teng theampo sia

¹⁶suat pan khelki dong thing taw ki uum hi. Hi khelkite sia kituam thei hi.

¹⁷Biakinnpi pang sungsangte tung, innkhate tung sia a saangna dong ah, palm le cherubim lim kisuai te taw kidim hi.

¹⁸Inndoi sung theampo ah palm kung le cherubim limte a kithekin kisuai hi. Cherub simin maitang nii veu nei hi:

¹⁹a langkhat ah palm kung sang a maingat mihing maitang khat om a, a langkhat ah thingkung sang a maingat tawpi maitang khat om hi. Tuasia pang tung theampo,

²⁰suat pan innkhate tung dong kibang siat hi.

²¹A Thiangtho Mun ii innkha khuamte sia a saanna le a zaina, a pangh li teng kikim hi. A Thiangtho Bel Mun tumna ii mai ah

²²thing biaknatau taw kibang na khat om hi. Tuasia sia metre 1.5 saang a, metre 1 zai hi. A king khuamte, a bul le a pangh theampo thing taw kivawt hi. Tua pa in kei tungah, “Hi sabuai sia TOPA ompuina ah a ding sia ahi hi.” hong ci hi.

²³A Thiangtho Mun paina lamzin tawpna ah innkha khat om a, a Thiangtho Bel Mun paina lamzin ah a dang khat zongh om hi.

²⁴Tuate sia a lai pan a kihong thei kongkha kithuapte ahi hi.

²⁵Pangte tungah a kisuai bangin a Thiangtho Mun kongkhate tungah palm kung le cherub te lim kisuai hi. Sungtanna inndoi ii innkha puasang sia thing taw kituam hi.

²⁶Hi inndoi panghte ah khelkite om a, a pangte sia palm kung limte taw a kizeam hi.