Read Siyin Chin Ezekiel 43 Bible Online

Ezekiel 43 - Siyin Chin bible

Ezekiel 43

¹Tua pa in nisuana sang a nga kongpi ah kei hong paipui a,

²tualai ah Israel te ii Pathian ii ompuina ahi khuavak taang velvol khat nisuana sang pan hong pai ka mu hi. Tui kihual nging bangin, Pathian aw nging a, khuavak taang velvol sia in leitung taangsak hemhom hi.

³Hi mukholna in Pathian ii Jerusalem khua siasak tu hong pai lai in ka mu sia le Chebar ngunhui ah ka mu mukholna khat taw kibang hi. Tuaciang, keima le keima ka khup lamin lei ah ka bok hi.

⁴Khuavak taang velvol sia in nisuana kongpi kaantan a, Biakinnpi sungah tum hi.

⁵TOPA ii thaa in kei hong laamto in, a suum sungnung ah hong paipui a, tua munah Biakinnpi sia TOPA vaangletna taw kidim ka mu hi.

⁶Tua munah tua pa sia ka kungah hong ding a, Biakinn sung pan TOPA hong paupui ka za hi.

⁷“A thithei mihing awng, hi lai ah ka kumpi tokhum om hi. Hi lai Israel mite sungah teangin, amate a tawntung ka uk tu hi. Israel mite le a kumpite in pathian dangte biakna taw ahizong, a kumpite luang hi munah phumna taw ahizong, ka min thiangtho daisak kik nawn ngawl tu hi.

⁸Kumpite in a kumpi inn kongkha khuamte le a saamkiilte sia ka Biakinnpi kongkha le kongkha saamkiilte nealin vawt a, tua ahikom ka kilaklaw uh pang khat bek in daa hi. Amate in a kiihuai a sep nate theampo taw ka min thiangtho daisak ahikom, ka thin uukna taw amate ka lalcipsak hi.

⁹Tu in amate sia pathian dangte bia nawn ngawl tu a, a kumpite ii luangte heam tu uh hi. Tuabang a ngamta le, amate sungah ka teang tawntung tu hi,” hong ci hi.

¹⁰TOPA in a pau zom a, “A thithei mihing awng, Israel mite tungah Biakinnpi thu son in a, a kivawt ngealnate amate kansak in. Khialna mawna a vawtte hangin amate maizumsak in.

¹¹A vawt sate hu in a mai uh a zum le, Biakinnpi sak tu ngealnate amate thiangson in: a vawt tu lim, a sung tumna le pusuana, a pung, na theampo vawt tu zia le a zui tu thute le ngeinate theampo son in. Hi thute theampo amate atu in at in, tua hile na theampo bangbang kingeal ci sia mu thei tu a, ngeina zeksa theampo vawt thei tu uh hi.

¹²Hi thu sia Biakinnpi thukham ahi hi: Biakinnpi omna mualdawn le a kiimkot mun theampo sia ciliaphuai in thiangtho hi,” ci hi.

¹³Hite sia biaknatau teenate ahi hi. Biakinnpi teena ah a kizangh piciang pikhaute ma kizangh hi. Biakinnpi ii a bul kiimkot ah centimetre 50 a thuk, centimetre 50 a zai, a ngong nei tuiluanna khat om a, a puasang mong ah centimetre 25 saang hi.

¹⁴Biaknatau nuainungbel khen sia a dawn pan a bul metre 1 saang hi. A khen kik sia a kiil pan a nungah centimetre 50 zai in a kiimkot ah kivawt a, metre 2 saang hi. A khen zom kik sia zongh a kiil pan a nungah centimetre 50 zai in a kiimkot ah kivawt hi.

¹⁵A tungbel dawl biakpiaknate halna sia zongh metre 2 saang hi. A king li tungah a dokte sia a dawn dangte saangin saangzaw hi.

¹⁶Biaknatau dawn sia a kikim pangh li nei hi a, pangh khat sia metre 6 veu pha hi.

¹⁷A laizang khen zongh a dung a vai kikim a, pangh khat metre 7 veu hi a, a pua sang mong ah centimetre 25 a saang a ngong tuamna nei hi. (Tui luanna sia centimetre 50 zai hi.) Nisuana sangah biaknatau tung kaatona kealleite om hi.

¹⁸Vaanglianpipa TOPA in, kei tungah, “A thithei mihing awng, kong sonte hong ngai ta'n. Biaknatau a kisak ciangin, meihal biakpiakna le sangaw biakpiakna ah a kingo nganhingte ii chi a tungah the in aapna vawt tu nu hi.

¹⁹Zadok suan le paal ahi Levi minam thiampite bek in keima ompuina ah hong pai in ka na seam tu uh hi. Keima, Vaanglianpipa TOPA in hi thu kong pia hi. Amate tungah mawphel sangaw biakpiak natu in, khuital moi khat na pia tu hi.

²⁰Nang in a chi pawlkhat na la tu a, biaknatau dawn king li tung a dokte le a lai khen biaknatau kingte tung le a mong kiimkot theampo ah na koi tu hi. Hi bangin biaknatau na thiansua tu uh a na aap tu uh hi.

²¹Mawphel biakpiakna in a kipia khuital sia nang in na la tu a, biakinn mun ii a puasang, a kiciangtan sa munah na hal tu hi.

²²A zing ciangin a mealhem ngawl kealtal khat kengin mawphel biakpiakna in pia tu ni hi. Biaknatau sia khuital chi taw na thiansua bangma in, kealtal chi taw thiansua in.

²³Tua teng na man zawkciang, a nii ngealin a mealhem ngawl khuital moi khat le tuutal moi khat kengin,

²⁴keima kungah hong paipui ta'n. Thiampite in tua cherub te tungah ci al the tu a, keima hong biakpiakna in hal tu uh hi.

²⁵Ni sali sung ni simin mawphel biakpiakna in keal khat, khuital khat le tuutal khat pia tu nu hi. A vekpi in a mealhem ngawl het te hi tu hi.

²⁶Ni sali sung thiampite in biaknatau aap tu a, zak thei tu in kinging kholsak tu hi.

²⁷Tua nipi kaal a bo zawkciang thiampite in meihal biakpiakna le mite kipawlkhop biakpiaknate biaknatau tungah a piak kipan tu uh hi. Tua hun ciang note theampo tungah ka lungdam tu hi. Keima, Vaanglianpipa TOPA pau zo khi hi,” hong ci hi.