Read Siyin Chin Ezekiel 44 Bible Online

Ezekiel 44 - Siyin Chin bible

Ezekiel 44

¹Tua pa in biakinn mun nisuana sangah a om a puasang kongpi ah hong paipui hi. Kongpi kikhak a,

²TOPA in kei tungah, “Hi kongpi kikhak top tu a, kihong kik ngeingawl tu hi. Mihing kuama in kizanghsak ngawl tu hi, banghang ziam cile, Keima, Israel TOPA Pathian in tua kongpi kaantanin ka tum zo hi. Hi kongpi kikhak top tu hi.

³Ngamukpa ahile keima omna ah a thiangtho an ne tu in pai thei tu hi. Ama in kongpi vang pan sungtanna inndoi lian sia tawn a, tum in pusuak tu hi,” hong ci hi.

⁴Tuaciang tua pa in saksang kongpi tawnin Biakinnpi mai ah kei hong paipui hi. Ka et ciang TOPA Biakinnpi sia ama ompuina khuavak taang velvol sia taw kidim ka mu hi. Keima le keima lei ah ka boksuk hi,

⁵tuaciang TOPA in kei tungah, “A thithei mihing awng, na mu theampo le na zaak theampo pha takin ngaisun in. Biakinnpi taw kisai zui tu thute le ngeinate kong son tu hi. Biakinnpi sungah a kitumsak tu a kipusuaksak tu mihingte le a tum ngawl tu a pusuak ngawl tu mihingte pha takin ciamtee in.

⁶“Israel mi kei hong langpante tungah, Keima, Vaanglianpipa TOPA in a kiihuai amate ngamtatnate thuak zo nawn ngawl tu khi hi ci sia son in.

⁷Keima sangaw biakpiakna ii a thau le a chi hong kipiak ciangin amate in ka thu a ni ngawl, vunteap at ngawl ngamdangmite sia Biakinnpi sungah a tumsak hu in ka Biakinnpi ninsak uh hi. Tua ahikom a kiihuai a ngamtatnate taw ka mite in ka thuciamna paltan uh hi.

⁸Ka Biakinnpi sungah a zeksa a thiangtho biakpiaknate ah amate in uk ngawlin ngamdangmite in uksak zaw uh hi.

⁹“Keima, Vaanglianpipa TOPA in vunteap at ngawl ngamdangmi, ka thu hong ni ngawl peuma, Israel mite taw a teang khawm ngamdangmi khat ngawngawn ka Biakinnpi sungah tum thei ngawl tu hi, ci thu ka thangsak hi,” hong ci hi.

¹⁰TOPA in kei tungah, “Israel midangte taw kei hong taisan khawm a, milim a bia Levi mite daan ka pia tu hi.

¹¹Amate in ka Biakinnpi sungah kongpite cingin Biakinnpi nasepte seamin keima na a seam thei tu uh hi. Amate in mihingte ii meihal le sangaw biakpiakna ah a piak nganhing te ngo thei tu a, mihingte kisapnate sepsak tu uh hi.

¹²Ahihang amate in Israel mite atu in milim biakna vawtsak a, tuabangin mite mawna sungah paipui ahikom, Keima, Vaanglianpipa TOPA in, amate daan piak kul tu hi, ci in ciliap huai kiciamna ka vawt hi.

¹³Amate in thiampite bangin keima ii na seam ngawl tu hi, kei atu a thiangtho khat pawpo ii a nai neak ngawl tu, ahibuale Thiangthobel Mun ah tum ngawl tu hi. Hite in a kiihuai a ngamtatnate hu in daan piakna ahi hi.

¹⁴Biakinnpi sungah nasep nawno teng sia amate sep tu in ka see tu hi,” hong ci hi.

¹⁵Vaanglianpipa TOPA in, “Tua Levi minam Zadok ii suan le paal thiampite ahile Israel midangte ii kei hong taisat zawkciang, Biakinnpi sungah thumaan takin ka na seam suak uh hi. Tua ahiciang tu in amate sia ka na seam a, ka omna ah hong pai in sangaw biakpiakna a thau le a chi taw biakpiakna hong nei tute ahi uh hi.

¹⁶Amate bekma ka Biakinnpi sung tum in biaknatau ah seam tu a, biakinn sungah biakna vawt tu hi.

¹⁷Amate Biakinnpi suum sungnung paina kongpi vang a tum ciangin puanneal silh tu uh hi. Biakinnpi suum sungnung, ahibuale Biakinnpi sungah na a sep laitakin amate in samul taw kivawt khat pawpo silh ngawl tu uh hi.

¹⁸A khua ul ngawl natu in amate in puanneal dial khim tu a, puanneal ngoaipuan tual teangin, kawngkhau sawm ngawl tu uh hi.

¹⁹Mihonpite omna suum puanung ah a pai ma in, amate in Biakinnpi sung a nasepna ah a silh puante sut tu a, a thiangtho inndoite sungah nusiat kul tu hi. A thiangtho biakpiakna puante ii mite ngim a piak ngawl natu in amate in puan dang silh tu uh hi.

²⁰“Thiampite in a sam meettol ngawl tu a, a sam sausak ngawl tu uh hi. Amate in a sam a pha bekin hoai tu uh hi.

²¹Thiampite in suum sungnung ah a pai ma in, sapittui ne ngawl het tu hi.

²²Thiampi khat in a kikhul sa numei khat teenpui ngawl tu hi; Israel numei thiangtho khat ahibuale thiampi dang khat ii zi, meingong nu bek taw teang tu hi.

²³“Thiampite in ka mite tungah biakna taw kisai a thiangtho le a thiangtho ngawlte kilamdanna le a zeksa ngeina thiangtho le a thiangtho ngawlte hil tu hi.

²⁴Thukhen tu thu khat a pian ciang, thiampite in keima thukhamte bangin thukhen tu hi. Amate in biakna poaite sia a zui tu ka piak thute le ngeinate bangin vawt tu a, ka Sabbath thiangthosak tu uh hi.

²⁵“Thiampi khat sia mithi luang a thamna taw in zeksa ngeina taw in nin tu hi, ahihang a thi sia ama ii a nu a pa khat, a tate khat ahibuale a suapui pa khat ahibuale pasal nei ngawl lai a suapuinu khat ahile a nin suak ngawl tu hi.

²⁶Ama a thiantho kik zawkciang, ni sali sung ngak tu a,

²⁷tuaciang Biakinnpi suum sungnung ah pai in, a kithiansua natu in sangaw biakpiakna pia tu hi, tua hile ama in Biakinnpi sungah na seam kik thei tu hi. Keima, Vaanglianpipa TOPA ka pau zo hi.

²⁸“Israel tungah ka piaksa khang khat pan khang dangkhat ah a ki aap susuk tu thiampiza sia thiampite ii a saan tel ahi hi. Israel ngam ah thiampite in nei le lamh nei ngawl tu a; amate kisap theampo sia keima ka hi hi.

²⁹Antang taw biakpiakna, mawna le khialna kiphel natu biakpiakna le kitatna in a kipia biakpiakna theampo sia thiampite an hi tu a, Israel ngam ah keima atu in a kipia tuam theampo amate nga tu ahi hi.

³⁰Thiampite in anpal teng sung pan a limci belte le kei tungah a dang hong kipia theampo tang tu uh hi. Mihingte in anluum a em simin, a em maksakbel sia biakpiakna in thiampite tungah pia tu uh hi, tuasia ciang amate inn sungah ka thupha tung tu hi

³¹Ama thu in a thi thawthong vacim le nganhing ii sa ahibuale nganhing dang khat ii thalup sia ii sa thiampite in ne ngawl tu uh hi,” ci hi.